PAAMIUT
Katersugaasivimmut pilersaarummut aningaasartuuteqartoqarnerusoqartoq
Kommuneqarfik Sermersuumi Ivittuuni aatsitassarsiorfiusimasoq aamma aatsitassat pillugit katersugaasiviup Paamiuniittup atulerseqqinnissaanut aningaasartuutissatut missingersuutit sinnerlugit aningaasartuuteqartoqarpoq.
Ivittuut Mine- og Mineralmuseum i Paamiut skal ligge i denne tidligere KGH-bygning B-56. Men det kræver først en gennemgribende renovering.
Assiliisoq: Kommuneqarfik Sermersooq
KGH-p illorsuata iluarsaanneqarnera 1 millionit koruuninik akeqartussaagaluarpoq, maannali 5 millionit koruunit sinnerlugit akeqassasoq missingerneqarsimavoq.
Naak 4 millionit koruunit sinnerlugit immikkut aningaasartuuteqarfiussagaluartoq, Kommuneqarfik Sermersuumi aningaasaqarnermut ataatsimiititaliami politikerit Aatsitassanik Mineralinillu Katersugaasiviup, siornatigut Ivittuuniittup, maannali ukiuni qulini uninngareerluni Paamiuni ammaqqinniarneqartup, pilerseqqinneqarnissaa taamaatinngilaat.
Peqqut
KGH-p illorsuata B-56-ip, ullumikkut toqqorsiviusup, 2022-mi nalilerneqartumit ajornerungaarnera aningaasartuutissat amerlanerulerneranut pissutaavoq.
Illu nutarterneqangaassaaq, ilaatigut uku suliarineqassallutik:
- 1. salimiit allerpaamut majuartarfinnik qimaaffissianik pilersitsisoqarnissaa. (2. sali toqqorsivittuinnaq atorneqassaaq)
- Inimi allerpaami kaassuartakkanik atuisunut perusuersartarfiup pilersinneqarnissaa kiisalu 1. salimi perusuersartarfiit marluk
- Torsuusaq nutaaq kaassuartakkanik atuisunut majorallaffissialik suliarineqassaaq
Meeqqanut Atuarfeqarnermullu Ingerlatsivik, aningaasaqarnermut ataatsimiititaliamut innersuussisoq, allappoq iluarsaassineq "illup oqaluttuarisaanermut pingaarutillip ataannartinnissaanut iluaqutaassasoq taamaalillunilu Nunatta oqaluttuarisaanerani eriagisassat pingaarutillit ilaannik ingerlatitseqqeeqataassalluni".
Illoqarfiup kajungernartuunissaa
Ivittuut Aatsitassanik Mineralinillu Katersugaasiviata katersugaataat 2014-imiilli containerinut toqqorneqarsimapput. Illoqarfiup takornarianut allanullu takornariartunut pilerinarnerulernissaa katersugaasiviup Paamiuni ammarniarneqarneranut pissutaavoq.
Tamatuma saniatigut meeqqanut sammititamik immikkoortortaqarnissaa pilersaarutaavoq, siornatigut kommunip oqarneratut Paamiuni atuartut ornigullutik meeqqanullu paasinartumik paasissutissiivigineqarfigisinnaasaannik.
Anguniagaq
Katersugaasivik pillugu pilersaarutit pillugit Vinni Birkedal ukiut qulit matuma siorna ima oqarpoq:
- Kalaallit Nunaanni aatsitassat pillugit oqaluttuarisaanermut tunngatillugu inuit alapernaasilernissaat anguniagarivarput. Aatsitassat suliassaqarfinnut assigiinngitsunut tunngassuteqarmata alapernaaserneq atuarfinni atuaqatigiinnut apuunneqassasoq kissaatigaara, Vinni Birkedal oqarpoq.
Aningaasartuutit ilaneqartut 2025-mut kommunip missingersuusiaanut ilanngunneqarnissaat qinnutigineqassasoq, ataasinngormat aningaasaqarnermut ataatsimiititaliap ataatsimiinnerani aalajangerneqarpoq.
