EQQARTUUSSINEQ ANNERTOOQ
KNI A/S-imi naatsorsuuserinermut pisortaasimasoq eqqartuussivimmi sassartinneqarpoq
KNI A/S-imi Sisimiuni naatsorsuuserinermi pisortaasimasoq ullumi eqqartuussivimmi sassartinneqassaaq. Unnerluutigineqartoq Sisimiunut tikippoq, Danmarkimilu eqqartuussissuserisuminik illersuisussatut peqateqarluni eqqartuussivimmut sassarluni. Pissutsini tamani pinngitsuunerarpoq, unnerluussissutigineqartullu tamaasa tunngavigalugit pinngitsuutinneqarumalluni.
Peqquserlunneq pillugu suliaq annertooq Qeqqata Eqqartuussiviani ulluni tallimani suliarineqassaaq, tassani KNI-mi pisortaasimasoq unnerluutigineqarluni. Illersuisup pinngitsuutinneqarnissaa piumasaraa, unnerluussisullu ukiuni sisamani pineqaatissinneqarsimasunut inissiisarfimmiittussanngortinnissaa piumasaraat.
Dorthea Reimer-Johansen
Tallimanngormat maajip qulingani ullaakkut unnerluunneqartoq eqqartuussivimmut takkummat silaannaq oqippoq. Tungujortunik qarlittalinnik kavaajaqarpoq, eqqartuussissuserisunilu Danmarkimeersoq peqatigaa.
Ullaaq seqinnarissuugaluartoq timmissallu qarlorpalukkaluartut, eqqartuussisoq eqqartuussisooqataasartullu pingasut isernissaat minutsialuit sioqqullugit eqqartuussivik nipaalluinnarpoq.
Eqqartuussisoq eqqartuussisooqataasartunik pingasunik iseqateqarpoq, taakkuali ilaat marluinnaat taaseqataassapput. Eqqartuussisooqataasartut pingasuusarput, assersuutigalugulu napparsimaleriataarnikkut taaseqataanngitsoqarpat, taartissaq ataaseq inissinneqareertarpoq.
- Eqqartuussineq aallartippoq, nalunaaqutaq qulingiluanut eqqartuussisoq nalunaarpoq.
Unnerluussisussaatitaasut unnerluussut atuffassissutigaat. Namminersorlutik Oqartussat ingerlatseqatigiiffiutaannut KNI A/S-imut millionilikkaanik peqquserluttoqarsimaneranik unnerluussisoqarpoq. Unnerluussut naapertorlugu unnerluutigineqartoq 3,3 millionit koruunit ataannagit pisinnaatitaanani aningaasarsisimavoq, soorluttaaq KNI A/S 5,8 millionit koruunit ataannagit annaasaqarsimasoq.
Kingorna eqqartuussisup unnerluutigineqartoq aperaa unnerluussissutigineqartut nassuerutigisimanerai. Aalajangersimalluni pinngitsuunerarpoq, illersuisullu pinngitsuutinnissaa piumasaraa.
Ulluni suliffiusuni tallimani eqqartuussineq ingerlanneqassaaq, ullormilu matumani unnerluutigineqartoq killisiorneqassalluni.
Atuartartut nutaarsiassanik nutaanik tusartittarniarlugit, Sermitsiaq Sisimiuni Qeqqata Eqqartuussivianiippoq eqqartuussineq malinnaavigalugu.
Ukiuni sisamani pineqaatissinneqarsimasunut inissiisarfimmiittussanngortinnissaa unnerluussisussaatitaatut piumasaraat.
