Naatsorsuuserinermi pisortamut soraarsitaasimasumut KNI inatsisitigut periutsimik atuisimavoq

Peqquserlunnermut uppernarsaatinillu eqqunngitsuliornermut KNI A/S-imi naatsorsuuserisuusimasoq unnerluutigineqarnerminut, tallimanngorpat Sisimiut Eqqartuussiviani eqqartuussaassaaq, ukiunilu sisamani pineqaatissinneqarsimasunut inissiisarfimmiittussanngortinnissaa unnerluussisussaatitaasut piumasaraat.

KNI-mi kanngunartuliornerup annertuup eqqartuussivimmut suliassanngortinneqarnera sioqqullugu, suliaq taanna innuttaasunut eqqartuussivimmi suliarineqarpoq, tassanilu illoqarfiup eqqartuussiviani Østre Landsretimilu naatsorsuuserinermi pisortaasimasoq ajorsarpoq. Østre Landsretimi decembarip arfineq-aappaani 2023-mi KNI A/S-imut 5,4 millionit koruuninik utertitsisussatut pineqaatissinneqarpoq.

Aningaasarpassuit millionillit angutip utertissinnaanerai ilisimaneqanngilaq, KNI A/S-illi pigisani inatsisitigut qulakkeerniarlugit sapinngisani tamaat iliuuseqarpoq.

Illumik tuniniaaneq tigusaanermik kinguneqarpoq

Østre Landsretimi eqqartuussinermit allakkiani, pinerluttulerinermi suliami ingerlanneqartussami pingaarnernik samminnittuni, naatsorsuuserisutut pisortaasimasup illukuani KNI tigusarinninnermik taaneqartartumik suliaqarsimasoq takuneqarsinnaavoq. 2021-mi unnerluutigineqartoq illuminik tuniniaasoq KNI-p paasigamiuk, tamanna inatsisitigut periaaserineqarpoq.

- Naatsorsuuserinermi pisortaasimasumut piumasaqarneq inatsisitigut periarfissat tamaasa atorlugit ingerlateqqipparput. Eqqartuussivimmut suliassanngortitsinissamut utaqqiisaasumik tigusarinninneq iliuusaasinnaavoq, kingusinnerusukkut akiliinissamut periarfissat annertuumik ajorseriarsinnaanerat tunngavigalugu. 2021-mi naatsorsuuserinermi pisortaasimasoq illunik tuniniaasoq KNI-p paasigamiuk, tamanna tunngavigalugu illuummi tigusarinnissalluta aalajangerpugut, KNI A/S-imi pisortaaneq Jeppe Jensen, Sermitsiamut nassuiaavoq.

Naatsorsuuserinermi pisortaasimasoq Grevemi najugaqarsimavoq, taamaattumillu suliaq Danmarkimi eqqartuussivinni suliarineqarpoq, pinerluuteqarsimasunullu eqqartuussivimmi suliaq Sisimiuni eqqartuussivimmi suliarineqassaaq, pinerluuteqarsimasup pinerluffiani.

Pigisatuani tuniniarsimagai

Naatsorsuuserinermi pisortaasimasoq 2021-mi ukiakkut pigisani tamaasa atorlugit Brasiliamut, nuliami Brasiliamiup najugaqarfigisaanut, nuunnissani piviusunngortingajassimaneraa eqqartuussinermi oqaatigineqanngilaq, imatulli allassimavoq:

- A-p (naatsorsuuserinermi pisortaasimasup, aaqq.) Danmarkimi pigisatuani tuniniarsimagai C-p (KNI A/S-ip, aaqq.) ilimagilluinnarpaa, C-p piumasaqaatiminik naammassinninnissamut periarfissai annertuumik ajorseriartinnissai siunertaralugu.

Naatsorsuuserinermi pisortaasimasoq 2022-mi juulimi akiliisinnaajunnaarsinneqarpoq, akiliisinnaajunnaarsinneqarneranullu suliaq suli naammassineqarsimanngitsoq, akiliisinnaajunnaartup pigisaanik nakkutiginnittup, eqqartuussissuserisup Troels Mørch Tuxenip, Sermitsiamut ilisimatitsissutigaa.

Illup tunineqarneranit iluanaarutit

Grevemi illup tunineqarneranit 523.251,55 koruunit pissarsiarineqarput, taakkulu KNI A/S-ip piumasaqaataanik matussuseeqqajarsinnaanngillat. Illup tunineqarneranit aningaasat maanna akiliisinnaajunnaartup pigisaanut ilanngunneqarput. Pisortaasimasup illu taanna pigisatuarinerpaagaa, eqqartuussivimmi allakkiami allassimavoq.

Naatsorsuuserinermi pisortaasimasup 5,4 millionit koruunit KNI A/S-imut utertissanerai nalorninarpoq.

KNI A/S-imi pisortaanerup Jeppe Jensenip aningaasat utertinneqarsinnaanersut nalilerusunngilaa.

-Naatsorsuuserinermi pisortaasimasumut pillaatisinissamik akiliisinnaajunnaartitsinermillu suliat suli ingerlatillugit, tamakkununnga tunngasut oqaaseqarfigeqqinnissaat utaqqivarput, Jeppe Jensen Sermitsiamut ilisimatitsivoq.

Eqqartuussineq maajip qulingani aallartissaaq, maajillu 13-iannit 16-iannut ingerlaqqissalluni.