Unnerluussisuuneq:
Peqquserlussimasutut unnerluussaasup eqqartuussivimmi sassarnissaa naatsorsuutigaarput
Naak KNI A/S-imi naatsorsuuserinermi pisortaasimasup akiliisinnaajunnaarsinneqarneranut suliaq ingerlagaluartoq taamaattumillu aningaasatigut ajornartorsiorsimassasoq ilimagineqarsinnaagaluartoq, Københavnimit Sisimiuni Eqqartuussivimmut angalalluni tallimanngorpat maajip qulingani sassarnissaa Kalaallit Nunaanni Politiit naatsorsuutigaat, tassanilu pillarneqaataasinnaasumik suliaq aallartinneqassaaq.
Toqqorsivimmit assilisaq: Leiff Josefsen
KNI A/S-imi naatsorsuuserinermi pisortaasimasoq, peqquserluttuliorsimasutut allakkanillu eqqunngitsunik suliaqarsimasutut unnerluutigineqartoq suli passianik arsaarneqanngilaq, maajimilu 2021-mi namminersorlutik oqartussat ingerlatseqatigiiffiutaannit soraarsitaanermi kingorna suliami aallartissimasumi, tigummigallarneqarsimanngilaq.
- Pinerluttulerinermi suliani unnerluutigineqartup eqqartuussivimmi sassarnissaa politiit qulakkeersinnaanngilaat, tigummigallarneqartut politiinit angallanneqarnissaat pineqartinnagu, Kalaallit Nunaanni Politiini unnerluussisuuneq Mariam Khalil Sermitsiamut oqarpoq, nangillunilu:
- Suliamili matumani unnerluutigineqartup Sisimiuni Eqqartuussivimmut maajip qulingani 2024-mi sassarnissaa unnerluussisup naatsorsuutigaa. Unnerluutigineqartup Sisimiunut angallanneqarnissaanut najugaqarnissaanullu atatillugu, Kalaallit Nunaanni Politiit angalanissamut najugaqarnissamullu inniminniisimanngillat.
Eqqartuussinerup nalaani timmisartumut bilitsimut Sisimiunilu najugaqarnermut unnerluutigineqartoq nammineq akiliisinnaanngikkuni eqqartuussisunut saaffiginnissinnaavoq, angalanermullu aningaasartuutit namminneq akilerniarnerlugit taakkua aalajangersinnaapput.
Unnerluutigineqartoq, ullumikkut Københavnimi najugaqartoq, Sermitsiap attaveqarfigisinnaasimanngilaa.
Eqqartuussivimmi Østre Landsrettimi KNI A/S-ip suliassanngortitaani, 5,4 millionit koruuninik akiliisussanngortinneqarpoq.
Pinerluttulerinermi suliaq ilungersunarpoq, angummi ukiuni sisamani pineqaatissinneqarsimasunut inissiisarfimmiittussanngortinneqassasoq unnerluussisut piumasarimmassuk.
Naatsorsuuserinermi pisortaasimasoq KNI A/S-imi 2017-imi apriilip aallaqqaataanit 2021-mi maajip aallaqqaataata tungaanut sulinermini „akissarsialereriaatsimut unnerluutigineqartup nalunaarsorneqartariaqarneranik, akissarsialereriaatsitigullu siunissami akissarsisalernissaminik, tamanna pillugu isumaqatigiissuteqartoqarsimanngikkaluarpalluunniit, piumasaqarnermigut“ KNI-mi akissarsialerivimmik salloqittaasimasoq unnerluussisussaatitaasunit uppernarsarneqarsimasoq, peqquserlunneq pillugu unnerluussummi allassimavoq.
„Pisinnaatitaanngitsumik 3,3 millionit koruunit ataannagit aningaasarsisimasoq, KNI A/S-ilu 5,8 millionit koruunit ataannagit annaasaqarsimasoq“ aamma allassimavoq.
Atsiornernik eqqunngitsunik allattarsimasutut, akiligassanik akuerineqareersunik allanngortitsisarsimasutut akiligassallu assigiinngitsut qaffasinnerusumik akuerineqarsimasutut isikkoqartutut pillugit mailinik eqqunngitsunik nassiussisarsimasutut, aammattaaq unnerluutigineqarpoq.
Allakkanik peqquserlunnerit pissutsit 28-upput, 2014-imi aggustip 31-annit 2021-mi februaarip 28-ata tungaanut pisimasut, unnerluussummi allassimavoq, „tamakkulu tamarmik nammineq allatigulluunniit pisinnaatitaanngitsumik iluanaaruteqarnissaq siunertaralugu unnerluunneqartup 2,1 millionit koruuninit ikinnerunngitsut kontominut nuussissimagai" tassani allassimavoq.
Suliaq “peqquserlunnermut tunngasunit Kalaallit Nunaanni Politiit suliaannit allanit amerlanernit annertunerusoq”, unnerluussisusuuneq Mariam Khalil oqarpoq.
- Taamaakkaluartoq peqquserlunnermik nalunaarutiginninnerit tamaasa Kalaallit Nunaanni Politiit pimoorullugit suliarisarpaat, suliap naammaginartumik qulaajarnissaanut misissuineq qanoq annertutigisoq annikitsigisorluunniit pisariaqartinneqartoq apeqqutaatinnagu, unnerluussisuuneq oqarpoq, Kalaallillu Nunaanni Politiit Danmarkimi aningaasanik pinerluuteqarnermut immikkut ilisimasalimmit SØIK-imit ikiorneqarsimasut taassuma ilumuunnginnerarpaa.
Eqqartuussineq maajip qulingani aallartissaaq, maajillu 13-iannit 16-iannut ingerlaqqissalluni.
