KNR-imi nutaarsiassaqartitsivimmi sulisut suliartoqqipput
KNR-ip nutaarsiassaqartitsiviani sulisut sisamanngornermi ullaakkut sulinerminnik unitsitsisut tallimanngornermi ullup-qeqqanut sulileqqittut, nutaarsiassaqartitsivimmi aaqqissuisuuneq Jens Thorin ilisimatitsivoq.
KNR-ip nutaarsiassai maanna Danmarkimi tv-kkut isiginnaartunit amerlanerusunit isiginnaarneqarsinnaapput.
Arkivfoto: Leiff Josefsen
KNR-imi nutaarsiassaqartitsivimmi sulisut pisortaagallartoq kiisalu nutaarsiassaqartitsivimmi pisortaq Irene Jeppson tallimanngormat ataatsimeeqatigiinnermi isumaqatigiissutigineqarpoq sulisut 16-it suliunnaarsimasut sulileqqissasut.
Nutaarsiassaqartitsivimmi aaqqissuisuuneq Jens Thorin, taama tusagassiuutinut nalunaarummi allappoq:
- Pisortaagallartup paasilluarsinnaavaa sulisut immikkoortortaqarfimmi sulisut ikippallaarnerat pakatsinartoq, immikkoortortaqarfimmi sulisut tamarmik suliassaannik kivitsisariaqarmata.
Qallunaatut radioaviisi unikkallassasoq
Ilanngullugu paasissutissiissutigineqarpoq qallunaatut radioaviisi ataasinngornermi marsip pingajuannit unikaallatsinneqassasoq. Oqaatigineqarsinnaanngilaq qanoq sivisutigisumik unikaallatsinneqassanersoq.
Kalaallisut radioaviisimi atuaasussaq ullaakkut nal. 05.30 suliartoraangami tusagassiortumik ilinniarsimasumit ikorfartorneqartassaaq.
- Sulisut gruppianni KNR-imi sulinerput suli nuannaralugu erseqqissaatigaarput, kisianni aamma pisortat naatsorsuutigisariaqarpaat isumaqatigiissutit malillugit sapaatip akunneranut akunnerit 40-ut sulisariaqartugut.
Taamaattumik isumaqatigiissutigineqarpoq sulisut nalinginnaasumik sulisarnissaat, aamma allaaserisaq allaaserisaluunniit pissutsit avatangiisitsinniittut pissutigalugit naammassineqanngikkaluarpat.
Soraarsitsinissamik mianersoqqussut
KNR-imi sulisut 16-it sapaatip akunneranik sioqqutsillutik nalunaareerlutik suliunnaarput. Suliunnaarnertik kinguneqartussaasoq pisortanit nalunaarutigineqarpoq.
Sulisut 16-it, taakkua ilarpassui ukiorpassuarni misilittagaqarluartut, maanna suliffeqarunnaarnissartik annilaanngatigaat, tusagassiuutinut nalunaarummi allassimavoq.
Sulisut kissaatigaat KNR-ip soraarsitsinissamik nalunaarutit atorunnaarsissagai, sulisut suliassatik pingaarnerpaatileqqissinnaaniassammatigik.
