KNR-imi nutaarsiassaqartitsivimmi sulisut sisamanngormat suliunnaarput.
Suliunnaarneq pineqartoq isumaqatigiissutigineqartunut akerliusumik suliunnaarnerummat akerleralugu Kalaallit Nunaanni tusagassiortut kattuffianni TP-mi siulittaasoq, Arnaq Nielsen, Sermitsiamut oqarpoq.
KNR-imi nutaarsiassaqartitsivimmi sulisut sisamanngormat suliunnaarput.
Suliunnaarneq pineqartoq isumaqatigiissutigineqartunut akerliusumik suliunnaarnerummat akerleralugu Kalaallit Nunaanni tusagassiortut kattuffianni TP-mi siulittaasoq, Arnaq Nielsen, Sermitsiamut oqarpoq.
- Suliunnaarneq tamanna isumaqatigiissutinut akerliulluinnarpoq, tamannalu akerleraara, Arnaq Nielsen oqarpoq, Nutaarsiassaleriffimmili tusagassiortut paasisinnaanerarpai:
- Ilungersuuteqarnerat paasisinnaavara, sivisuumimmi ajornartorsiornikuupput.
Pissutsit ilungersunartut
- Sivisuumik akiuuttariaqarsimapput, tamannalu paasilluarsinnaavara. Maannakkut Inatsisartunut qinersisoqalermat pissutsit ilungersunarput, Arnaq Nielsen oqarpoq.
Piffissami akunnattumi - tassa qineqqusaarfiusumi, suliunnaartoqarnera ajuusaarnartoq nassuerutigaa:
- Qinersineq ataasiinnaanngilaq, marloriarlutami qinersissaagut. Tusagassiorfiit matumami pingaaruteqarput, aamma kalaallit qinersinissaq sioqqullugu nutaarsiassanik tusartinneqartariaqarput.
Taama pisoqarnera ajuusaarnartoq, oqaloqatigiinnissamillu kajumissaaraluni oqarpoq:
- Pisortat ajornartorsiutit aaqqinniarlugit sulisunik oqaloqateqarnissaannut annertuumik kajumissaarpakka.
- Sulisut pitsaanerpaamik aaqqiissutissaqartut isumaqarpunga, kisianni aqutsisut peqatigalugit aaqqiissutissarsisariaqarput, Arnaq Nielsen oqarpoq.
Pissutsit qanittukkut pilersinneqarsimanngitsut eqqaasitsivoq, KNR-imilu nutaarsiassanik aallakaatitsineq ukiuni arlalinni arlaleriarluni annikillisinneqarsimavoq. Taamaammat ajornartorsiutit piviusut paasiumallugit aqutsisut sulisullu ilungersortariaqarput, TP-mi siulittaasoq naqissusiivoq.
