KNR-imi siulersuisut: Suliffimmi isumannaallisaanikkut pissutsit misissorneqassapput
- Suliffimmi avatangiisit eqqarsartaatsikkut qanoq innersut misissorneqassapput, aqutsisut piginnaaneri nukittorsarneqassapput, suliffeqarfiullu iluani attaveqaqatigiinneq pitsanngorsarneqassalluni. Aamma atorfiit inuttassarsiuunneqartut inuttalersorniarlugit aqutsisullu tamakkerniarlugit suliniuteqartoqarpoq, KNR-imi siulersuisuni siulittaasuugallartoq Miki Jensen Sermitsiamut oqarpoq.
Leiff Josefsen
Maannakkorpiaq KNR-imi tusagassiortut, aaqqissuisut nutaarsiassaqartitsivimmilu pisortaq amigaatigineqarput. Nutaarsiassaqartitsivimmi pisortap qaammatini pingasuni atorfeqareersorlu soraarneranut isumaqatigiissuteqartoqarpoq.
KNR-imi pissutsit aalajaatsunngussappata qanoq iliortoqassava?
KNR-imi siulersuisut Sermitsiamut paasissutissiissutigaa sulinermi tarnikkut atugassarititaasut misissorneqassasut, sulisussarsiornermilu pilerinarsaanissaq pillugu assigiinngitsunik aamma suliaqartoqassalluni:
- KNR-ip aalajaatsumik ingerlaleqqinnissaanut suliniutinik arlalinnik iliuuseqartoqarnissaanik siulersuisut kissaateqarput. Ilaatigut suliffimmi avatangiisit tarnikkut qanoq innersut misissorneqassapput, aqutsisut piginnaaneri nukittorsarneqassapput, suliffeqarfiullu iluani attaveqaqatigiinneq pitsanngorsarneqassalluni. Aamma atorfiit inuttassarsiuunneqartut inuttalersorniarlugit aqutsisullu tamakkerniarlugit suliniuteqartoqarpoq, KNR-imi siulersuisuni siulittaasuugallartoq Miki Jensen Sermitsiamut oqarpoq.
KNR nutaanngorsarneqassaaq
KNR-i aalajaatsumik ingerlaqqilerpat periusissiamik aallartitsisoqassaaq, tassani suliffeqarfiup inissisimanera nukittorsarneqassalluni, suliffittut tusagassiorfittullu.
- KNR-ip nutarterneqarnissaanut ilaavoq ullumikkut tusagassiuutitigut piumasaqaatinut naleqqussassalluni. Tamatuma saniatigut KNR-ip inuiaqatigiinni tarrarsuuteqarnera nutaarsiassanullu, paasissutissiinermut, kulturimut timersornermullu qitiusutut inissisimaffini nukittorsassavaa, oqaatsivut kulturerpullu aallaavigalugit, Miki Jensen oqarpoq.
Illorsuaq nutaaq
KNR-ip nutaamik illorsuartaarnissaa qangali kissaataavoq, tamannalu suli suliniutigineqarluni. Februaarip qaammataani ukioq manna KNR-imi siulersuisut nalunaarutigaat kissaat qaqeqqinneqartoq pilersaarutinullu ilaalersoq. Tassani ajornartorsiutit maanna atuuttut, soorlu kalaallisut oqaasilinnik tusagassiortunik sulisoqaannarnissamut aaqqiissutaassalluni.
Nutaamik illorsuartaarnissamut suliniutit pillugit Naalakkersuisut oqaloqatigineqartut KNR-imi siulersuisuni siulittaasuugallartup Miki Jensenip oqaatigaa.
Nutaamik tusagassiorfittaarnissamik pisariaqartitsineq Naalakkersuisut isumaqataaffigaat, isumaqatigiissutigineqarlunilu siunissami qaninnerusumi ataavartumik aaqqiissutissamik suliniuteqartoqassasoq.
- Sanaartornissamut pilersaarutit nutarsarneqassapput, ullutsinnut siunissamullu pisariaqartitat tulluarsarniarlugit. Tusagassiivik nutaaq suliffimmut sulinermilu atugassarititaasunik pitsanngorsaataassaaq.
