Anita Cramer Corpas KNR-imi nutaarsiassaqartitsivimmi pisortaajunnaarpoq
Tamanna sulisoqarnermut pisortap, René Andersenip Sermitsiamut uppernarsarpaa. Nammineq soraarnersoq soraarsitaasimanersorluunniit oqaatigineqanngilaq. KNR maanna nutaarsiassaqartitsivimmi pisortassarsiussarsiortussanngorpoq.
KNR skal finde en ny nyhedschef. Det bekræfter HR-afdelingen i KNR til Sermitsiaq.
Leiff Josefsen
Anita Cramer Corpas KNR-imi nutaarsiassaqartitsivimmi pisortatut apriilip aallaqqaataani ukioq manna atorfinittoq, maanna KNR-imi aqutsisunut ilaajunnaarpoq. Tamanna KNR-imi sulisoqarnermut pisortap, René Andersenip Sermitsiamut uppernarsarpaa.
Anita Cramer Corpas qaammatini pingasuni nutaarsiassaqartitsivimmi pisortatut atorfeqareersorlu maanna KNR nutaamik pisortassarsiortussanngorpoq.
Jens Thorin nutaarsiassaqarfimmi pisortaagallassaaq, pisortaagallarneralu KNR-ip nittartagaani allassimavoq.
KNR-imi aaqqiagiinnginneq Sermitsiap piffissami sivisuumi malinnaavigaa, sulisullu qullersanut allagaat pigalugit, tassani nutaarsiassaqartitsivimmi pisortanngorlaaq pineqarluni.
Sulinerup unitsinneqarnissaanik nalunaaruteqarneq
KNR-imi sulisut juunip ulluisa 28-anni sulinermik unitsitsinissamik nalunaaruteqarput, tassani nutaarsiassaqartitsivimmi pisortap soraarsinneqarnissaa piumasarineqarluni. Ullut marluk qaangiummata, juunip ulluisa 30-anni KNR-imi sulisoqarnermut immikkoortortaqarfik tusagassiuutitigut nalunaaruteqarpoq sulinermik unitsitsinissaq taamaatinneqartoq.
Sulisoqarnermut immikkoortortaqarfik KNR-milu siulersuisut suliamut tunngatillugu taamani oqaaseqarumanngillat, suliaq sulisunut tunngasuummat.
Anita Cramer Corpasip nutaarsiassaqartitsivimmi pisortatut atorfeqarunnarnera pillugu KNR annerusumik oqaaseqarusunngilaq.
