KNR-imi sulisut sulinerminni unitsitsinerat: Qinersinissap nalaani inuiaqatigiinnut qanoq sunniuteqarpa?
KNR-imi nutaarsiassaqartitsivimmi sulisut sisamanngornermi ullaamiit tallimanngornermi ullup qeqqata tungaanut sulinerminni unitsitsipput. Suliumajunnaarneq qinersisoqalernerani pivoq, tassani tusagassiuutit innuttaasunik paasissutissiiniarnerannut politikkerinillu akisussaatitsisarnissaannut pingaaruteqarluinnarpoq. - Tamanna nunami maani demokratiimik oqallinnermut ilungersunartumik kinguneqarsinnaavoq, immikkut ilisimasalik oqarpoq.
Arkivfoto: Leiff Josefsen
Nutaarsiassaqarfik uummaarissimaqisoq sulisunillu ulikkaarsimaqisoq, sisamanngirnermi tallimanngornermilu inoqanngilaq.
Sulisut suliffimminnut uteqqissasut sisamanngornermi ullup qeqqarnerani aalajangerneqarpoq, aamma qallunaatut radioaviiseqartitsisarneq aamma unissaaq.
Signe Ravn-Højgaard, siornatigut Ilisimatusarfimmi tusagassiortutut ilinniartitsisuusoq maannalu Digital Infrastrukturimik isumalioqatigiissitamik pilersitseqataasoq, naapertorlugu suliunnaarneq taamaattoq nunami nutaarsiassiinermi iluaqutaanavianngitsoq.
- KNR-ip nutaarsiassaqartitsiviani sulisut Kalaallit Nunaanni nutaarsiassaqartitsisartut tamarmiusut affaasa missaanniipput. Affaat allat tusagassiorfimmi Sermitsiami sulisuupput. Taamaasilluni KNR-ip nutaarsiassaaleqinerani nutaarsiassaaleqinngineraniluunniit tamanna malunnartumik malugineqarsinnaavoq, nutaarsiassaqartitsineq killeqareermat, taanna oqarpoq.
Qineqqusaarfik isornartorsiorfiunngitsoq
Ingammik qineqqusaarnerup nalaani tusagassiuutit pingaaruteqarput, politikkikkut oqariartuutit eqqortuunersut misissorneranni, sammisat pingaaruteqarnerpaat sammineranni innuttaasullu partiit assigiinngitsut politikkiannik assigiinngitsunik paasisaqartinneranni.
- Politikerit neriorsuutiminnik eqqortitsinissaannut aamma kalaallit innuttaasuinut pingaaruteqartunik saqqummiussinissaannut tusagassiorfiit pingaaruteqarput. Nutaarsiassat annertuut saqqummiunneqanngitsooraangata qinersisartut paasissutissanik tunngavilinnik aalajangiinissartik ajornakusoortittarpaat.
Eqqunngitsumik oqaluuserinninnissamut navianartorsiorneq
Sulisut 16-it tallimanngormat ullup-qeqqatanut sulileqqipput, aqutsisulli suliunnaarsitsinerat isumaqatigiissummik unioqqutitsinerummat suliunnaarsitsinissamik mianersoqqusipput.
Aamma ernummatigineqarpoq KNR-ip nutaarsiassanik aallakaatitsinerata killormut saassussisinnaanera. Qallunaat tusagassiorfiisa qinersineq soqutigilluinnarpaat, kisianni qallunaanut sammisaallutik.
- Kalaallinut sammisat affaannanngortinneqarpata, tamanna isumaqarpoq kalaallit isiginnittaasiat tusagassiuutini pingaarnerni sammineqarpallaarunnaarsinnaasoq. Namminiilivinnissaq Danmarkimullu attaveqarneq sammineqarpallaalersinnaapput, sammisat pingaarutillit soorlu meeqqat, peqqinnissaq isumaginninnerlu sammineqarpallaarunnaarlutik, oqarpoq.
