Kommunep atuarfissarsuaq kinguaattoorfiusoq arlaannaannulluunniit attuumassuteqanngitsumik misissuiffigitileraa
Atuarfimmik Inussummik sanaartornerup kinguaattoorfiusup qanoq ingerlanneqarsimaneranik arlaannaannulluunniit attuumassuteqanngitsumik Kommuneqarfik Sermersuumit misissuititsisoqalerpoq.
Nuummi atuarfiup nutaap qaqugu ammarnissaa ilisimaneqanngilaq, kommunilu sanaartornerup qanoq ingerlanneqarsimaneranik arlaannaannulluunniit attuumassuteqanngitsumik misissuititsilerpoq.
Assi: Oscar Scott Carl
Nuup illoqarfiata qeqqani atuarfissuarmik nutaamik sanaartornerup kinguaattoorfioqisup qanoq ingerlasimanera maanna misissorneqassaaq.
Atuarfik sananeqareerpoq, Ikuallattoornermik isumannaallisaanermut aaqqiissutissaq sanaartornermut malittarisassat naapertorlugit sananeqarsimanngilaq, tamannalu Sermitsiap ilaatigut allaaserisami uani allaaseraa: Nuummi atuarfissarsuup ammarnissaa kinguaqqittoq
Atuarfik 2024-mi aasaanerani atuanngiffeqarnerup kingorna atulersinneqartussaanikuugaluarpoq, ajornartorsiulli suli aaqqinneqanngilaq.
Kommuneqarfik Sermersuumit pisoq misissorneqaleruttortoq Sermitsiamut uppernarsarneqarpoq:
- Pisortaqatigiit Allatseqarfiannit Atuarfik Inussuk pillugu arlaannaannulluunniit attuumassuteqanngitsumik misissuititsisoqarnera ilumoorpoq. Sanaartornerup qanoq ingerlasimaneraa kinguaattoornermullu suut pissutaanersut paasiniarlugit misissuisoqassaaq, kommunimi attaveqaqatigiinnermut immikkoortortaqarfik ilisimatitsivoq.
Siunissami suliniutissanut tunngavigineqartussat qulakkeerneqartalissasut
Sanaartornermi qanoq pisoqarsimanera kommunimit paasilluarneqarumalluni, taamaalilluni siunissami assingusunik suliniuteqarnissamut tunngavissaqarluartalernissaq siunertaralugu arlaannaannulluunniit attuumassuteqanngitsunit misissorneqarnissaa qulakkeerniarneqartoq kommunip aamma paasissutissiivoq.
Kommunip misissuineq qaqugu naammassineqassanersoq oqaatigisinnaanngilaa, nalunaarusiarli pissarsiarineqarpat tamanna nalunaarutigineqassalluni.
Atuarfissaq suli atulinngimmat atuarfinni marlunni pisaqaanerusuni, Atuarfik Ukaliusami (USK) Atuarfik Samuel Kleinschmidtimilu, (ASK) atuartitsinerit suli ingerlanneqartarput. Taakku atuarfittaassamit taarserneqartussaagaluarput.
