Nuup qeqqani atuarfissarsuaq, Atuarfik
Inussuk, Kommuneqarfik Sermersuup sanaatornermut 615 million kr-nik
aningaasartuuteqarfigisaa, kingullermik ammaanissatut ilimagineqartutut ukioq
manna aggustimi piareersinnaanngilaq.
Atuarfittaap Inussuup aasaanerani
feeriareernermi ammarnissaa angumerineqarsinnaanngilaq.
Nuup qeqqani atuarfissarsuaq, Atuarfik
Inussuk, Kommuneqarfik Sermersuup sanaatornermut 615 million kr-nik
aningaasartuuteqarfigisaa, kingullermik ammaanissatut ilimagineqartutut ukioq
manna aggustimi piareersinnaanngilaq.
Atuarfittaap Inussuup aasaanerani
feeriareernermi ammarnissaa angumerineqarsinnaanngilaq.
Taama Kommuneqarfik Sermersooq angajoqqaanut
sulisunullu kiisalu ilinniartitsisunut allakkamini allappoq.
Taamaalilluni Islandimiut sanaartortitsisut
Istakip tamakkiisumik sanaartugaata atuarfiup nutaap atulernissaa
kinguaattooqqippoq.
Kommuni naapertorlugu atuarfiup nutaap
atulernissaa sioqqullugu sprinklerinik ivertissuisoqaqqaartussaanera tamatuma
kinguneraa.
Ikuallattoornermik isumannaallisaataaqqaartup
illuutinut malittarisassani piumasaqaatinut naammassinninnginnera tamatumunnga
tunuliaqutaasoq, angajoqqaanut ilinniartitsisunullu allakkami
atuarneqarsinnaavoq.
Taarsiullugu atuartut 1.200-t suli ASK-imi
USK-imilu inini qanganitsani aserfallassimaqisunilu suli atuartinneqassapput.
Kommuni: - Ullormik atulerfissaanik
taasaqarsinnaanngilagut
Atuarfissuaq Inussuk 18.000
kvadratmeterisungajak angitigisoq taaneqareersutut atuartunut 1.200-nut
inissaqartitsivoq, Kalaallillu Nunaanni atuarfinni annersanngortussaavoq.
- Atuarfik Inussuup qaqugu atorneqalernissaanik paaserusuisut suli amerlaqisut nalunngilarput. Qaqugulu ammarnissaa ajoraluartumik suli naluarput. Suliarli ingerlavoq, nuannaarutigalugulu nalunaarutigisinnaavarput alloriarnerit pingaarutillit kingulliit aalajangiiffigineqarmata.
- Atuarfiliornermi sanaartortinneqartut sulinerminni piumasaqaatigineqartunik piviusunngortitsisimanermut sanaartornermik ingerlatsisup uppernarsaasussaanera kinguaattoornermut pissutaasoq siornatigut nassuiaatigineqareerpoq. Pingaartumik ikuallattoqarnerani sillimaniarneq eqqarsaatigalugu.
- Taanna piumasaqaatigineqartoq allanngortikkusunngilarput, tassami atuarfiup atulinnginnerani atuartut sulisullu isumannatsummiinnissaat eqqarsaatigalugu tamakkiisumik uppernarsarneqassammat. Ikuallattoqarnerani isumannaallisaanermi aaqqiissutaaqqaartoq sanaartornermi piumasaqaatinut piviusunngortitsinngitsoq, oqartussat akuersissuteqarnissamik misissuisarneranni paasineqarpoq. Tamannalu isumaqarpoq atuarfimmi ikuallattoqarnerani tissaluttaatilersuisariaqalernermik –taannalu allannguut atuarfiup atorsinnaalernissaanut akuersinissamut pisariaqarpoq, kommunip
angajoqqaanut ilinniartitsisunullu allagaani atuarneqarsinnaavoq.
Ivertissuineq piffissamik
sivisuvoq
Atuarfimmi oqaatigineqareersutut
1.800 kvadratmeteringajannik angissuseqartumi sprinklerinik
ivertissuisoqartussanngornera tamatuma kinguneraa.
Tamanna illorsuup
atorneqarsinnaasutut akuerineqarnissaanik qularnaarinninnissami pisariaqartoq,
kommuni allappoq. Spriklerinik ivertissuinerup qanittumi alartinneqarnissaa
Kommuneqarfik Sermersuup utaqqivaa.
- Ikuallattumi tissaluttartunik ikkussuinissaq aallartingajalerpoq, pisariussaarlu aamma teknikkimut tunngasut suliassaangaatsiarmata sivisussalluni. Tamannalu tunngavigalugu atuarnissap aggusti 2025-p aallartinnissaanut atuarfik ammarsinnaassanngitsoq maanna ajoraluartumik paasinarsivoq.
Atuarfik aatsaat 2025-p ingerlanerani ammarsinnaanera kommunip ilimagaa,
qaqugorpiarli tamatuma pinissaa suli oqaatigineqarsinnaanngikkallarpoq.
- Ikuallattumi tissaluttartunik ikkussuineq aallartereerpat piffissap nalilersoruminarnerulernissaa naatsorsuutigaarput, taamalu aamma ammarnissaata ullulerneqarnissaa. Ikkussuilluni sulinermi piffissaq qanoq sivisutigissanersoq paasinarsippat ilissi siulliullusi paasitikkumaarpassi, atuarfissami angajoqqaanut sulisunullu allakkani taama
allassimasoqarpoq.
Sanaartortoq: - oqaaseqarusunngilagut
Istakimi pisortaaneq Karl
Andreassen suliamut oqaatigisassaqarumanani Sermitsiamut oqarpoq.
Istak Danmarkimi sanaartortitsisut annersaannit Aarsleffimit pigineqarpoq,
taakkulu aamma Permagreenimik pingaarnertut piginnittuupput.
Atuarfissuup
sanaartornera ulloq 1. marts 2024 naammassineqassasoq pilersarutaaqqaarpoq,
atuarfiullu ukioq taanna aggustimi ammersinnaanera kommunip
ilimagisimagaluarpaa.
Atuarfiup Inussuup ammarnissaa arlaleriarluni kinguartinneqartarpoq, tamanna
atuarfiup ilaatigut ikuallattuulernermi isumannaallisaanermi periussissiap
ikuallattornissamullu isumannaallisaanerup akuerineqannginnera, taamaalillunilu
sanaartukkap atulernissaanut akuersissuteqannginnera, atuarfiup
sanaartortitsisumit tunniunneqannginneranut patsisaavoq.
Atulernissaanut
akuersissut inatsisitigut piumasaqaataavoq, sanaartukkap sanaartornermi
inatsisinik malittarisassanillu naapertuuttunik malinninneranik
isumannaarinnittoq, tassani illuutinik malittarisassat, avatangiisinut
malittarisassat kiisalu ikuallattoornermi isumannaallisaaneq ilanngullugit.
