KOMMUNEP AVINNISSAA
Kommuni innuttaasunik taasititsissaaq
Avannaata Kommunia avinneqassanersoq innuttaasut novembarip 26-ani qinersissapput. Borgmesteri Palle Jerimiassen erseqqissaavoq taasititsisoqarnissaa siunnerfiliisuuginnartoq.
Borgmester Palle Jerimiassen Facebookimi videoliamini ilisimatitsivoq Avannaata Kommuniani innuttaasut novembarip 26-ani kommunip avinneqarnissaanut taasisinnaasut.
Assiliisoq: Avannaata Kommunia / Facebook
Kommunit avinneqarnissaat maanna oqallisaangaarpoq, maannalu kommunit ilaat avinneqarnissaanut taasisoqassaaq.
Tamatumani Avannaata Kommunia pineqarpoq, tassanilu innuttaasunik taasititsinissaq novembarip 26-ani pissasoq kommunalbestyrelse aalajangerpoq.
Tamanna borgmesterip Palle Jerimiassenip Facebookimi videoliamini oqaatigaa.
Videomi borgmesteri nassuiaavoq kommunip avinneqarnissaanut akuersinissamut naaggaarnissamulluunniit qinersisoqarsinnaassasoq.
Inatsisartut aalajangiissasut
Videomi borgmesterip erseqqissarpaa innuttaasut taasinerat siunnerfiliisuusoq, Inatsisartullu kisimik kommunip avinnissaanut qanorlu avinnissaanut aalajangiisinnaatitaasut.
- Innuttaasunik taasititsineq siunnerfiliisuuginnarpoq, kisianni suli pingaaruteqaqaaq, borgmesteri videomi oqarpoq.
Taasinerit naammassineqareerpata Inatsisartunut nalunaarutigineqassapput.
Avannaata Kommunia 2018-imi januaarimi Qaasuitsup Kommuniata Avannaata Kommunianut Kommune Qeqertalimmullu avinneqarneranit pilersinneqarpoq.
Qaasuitsup Kommuniata 2018-imi avinneqarnera sioqqullugu 2014-imi assingusumik taasisoqarpoq, tassanilu innuttaasut 81 procentii kommunip avinneqarnissaanut akuersipput.
Illoqarfiit pingaarnerit avataanniittut tatigininnerat appasittoq
Kommunip avinneqarnerata kingunerisinnaasai nalilersortinniarlugit Avannaata Kommunia aasaq manna suliassiissutiginnippoq, tassanilu kukkunersiuinermik siunnersuisarnermillu suliffeqarfiup BDO-p avinnerit marluk tunngavigalugit nalilersuisimapput, taannalu kommunip nittartakkamini saqqummiutereernikuuaa.
BDO-p missingerpaa kommunip avinneqarnera qanoq isikkoqaraluarpalluunniit allaffissornikkut suliassat amerliartornerat aningaasanik millionilinnik naleqartussaasoq.
Naalakkersuisut qanittukkut innuttaasunik naammagisimaarinninneq pillugu misissuisimanertik saqqummiuppaat, tassanilu ilaatigut erserpoq kommunini illoqarfiit pingaarnersaasa avataanni kommunalbestyrelsit tatigineqarnerat „ernumanartumik appasittoq“.
Avannaata Kommuniata saniatigut aamma Kommune Kujallermi Qeqqatalu Kommuniani kommunip avinneqarnissaa oqallisigineqarpoq.
Palle Jerimiassenip videoliaa uani isiginnaaruk:
