Kujallermi immikkut ittumik ataatsimiinnissat kinguartinneqarput
Kommune Kujallermi aningaasaqarnermut ataatsimiititaliaq kommunalbestyrelsilu ataasinngormat immikkut ittumik ataatsimiittussaagaluarput, pingasunngornermulli kinguartinneqarput.
Borgmesteri Stine Egede (IA) Islandimit ingerlariaqqissinnaajunnaaqqavoq, taamaattumillu immikkut ittumik ataatsimiinnerit kinguartinneqarput.
Assiliisoq: Kommune Kujalleq
Maluginiaruk: Borgmesteri najuussinnaaqqullugu ataatsimiinnerit kinguartinneqarnissaannik Demokraatit kissaateqarsimasut allaaserisami erseqqissarneqarpoq.
Kommune Kujalleq 2023-mi akileraarutinut A-nut 43 millionit koruuninik akiliisimanngimmat, aningaasat taakku sumut atorneqarsimanersut apeqquterujussuuvoq.
Apeqqut tamanna kommunimi politikerit ataasinngormat aningaasaqarnermut ataatsimiititaliap kommunalbestyrelsillu immikkut ittumik ataatsimiinneranni akissutissarsilluarnerusussaagaluarpaat.
Borgmesteri Stine Egede Islandimit ingerlariaqqissinnaajunnaaqqammat ataatsimiinnissat taakku ingerlanneqarsimanngillat.
Borgmesterip najuussinnaalernissaata tungaanut ataatsimiinnerit kinguartinneqarnissaannik Demokraatit kommunalbestyrelsimut ilaasortaatitaat kissaateqartuupput.
Aasaanerani sulinngiffeqannginnermi immikkut ittumik ataatsimiinnissaq piviusunngortinniarlugu Demokraatit kommunalbestyrelsimi ilaasortaatitai ilungersortuusimapputtaaq, pisimasummi pillugit qularnaatsumik partiit paasisaqarnerorusummata. Immikkut ittumik ataatsimiinnissamut oqaluuserisassat sapaatiummat kingusissukkut tiguneqarsimasut Margrethe Thårup Andersen (D) marlunngormat Sermitsiamut ilisimatitsivoq.
Suli piumasaqartoq
Demokraatit ataatsimiinnerup nuunnissaanut akuersisimapput, borgmesterip ataatsimiinnermut najuunnissaa naleqquttuummat.
Ataatsimiinnermi oqaluuserineqartussat suunersut aningaasarpassuillu qanoq atorneqarsimanerannik akissuteqartoqassanersoq, Margrethe Thårup Andersenip suli oqaatigiumanngilaa.
- Misissuinerit piaarnerpaamik ingerlanneqarnissaat Demokraatinit suli piumasarineqarpoq.
- Aningaasat sumut pisimanersut paaserusupparput, oqarpoq pingasunngorpallu ataatsimiinnerit kingorna oqaaseqarumaarnerminut innersuussilluni.
Suliami nutaanik pisoqarsimanersoq oqaaseqarfigeqqaartinnagu ataatsimiinnerit ingerlateqqaarusullugit, Borgmester Stine Egede Sermitsiamut oqarpoq.
Kommunip naatsorsuutai misissorneqalersut akileraarutinullu akiitsut annertuut malitsigisaannik kommunimut akiliutigeriaannagassatut atukkiussassat qaffanneqartariaqartut, borgmesteri siusinnerusukkut ilisimatitsivoq.
