KOMMUNE KUJALLEQ
Kommunalbestyrelsi immikkut ittumik ataatsimiitinneqassasoq D piumasaqarpoq
Kommune Kujallermi Demokraatit, maanna Inuit Ataqatigiinnik suleqateqartut, maanna A-akileraarutinik akiliisimannginnermut akisussaanerpaat toqqorternertaqanngitsumik nassuiaateqarnissaannik piumasaqarput. Partiip piumasaraa immikkut ittumik kommunalbestyrelsi piaarnerpaamik ataatsimiitsinneqassasoq.
Karen Marie Kyed Frederiksen (D), Simon Simonsen (D) aamma Margrethe Thårup Andersen (D) pakatsipput A-akileraarutinut tunngatillugu oqaaseqaatitik kommunalbestyrelsimi ataatsimiinnermi imaqarniliamut ilanngunneqarsimanngimmata, taamaattumik suli imaqarniliaq akuersissutiginngilaat, qaavatigulli aamma piumasaqaateqarput immikkut ittumik kommunalbestyrelsi ataatsimiitsinneqassasoq.
Asseq: Demokraatit
- Siullermik tupaallatsitserujussuarluni nalunaaginnartoqarsinnaanngilaq aningaasarsianit A-skatit akilinngitsoorneqartarsimasut 40 millionit koruuninik amerlanerusunik nalillit, taavalu isumaqarluni nipangiullugu ajornartorsiut qaangiukkumaartoq, tamannalu maanna misigaarput sapaatip akunnerimi qaangiuttut nassuiaammik ataatsimilluunniit suli tunineqanngilagut, Margrethe Thårup Andersen Sermitsiamut oqarpoq.
- Uagut Demokraatit Inuit Ataqatigiillu suleqatigiinnerisigut ullumikkut inissisimaffitsinni akisussaaqataavugut, akisussaaqataasutullu piumasaraarput akisussaasuusut qullersaat, tassa borgmesteri kommunaldirektørilu, qinikkanut innuttaasunullu nassuiaateqartariaqartut, sooq kommunip aningaasaqarnermut aqunneqarnera taamak pitsaanngitsiginersoq, allaat kukkunerit taamaattut pisinnaallutik.
Aaqqiissutissanik pilersaarusiortoqartariaqarpoq
Demokraatit nassuiaammik naammaginartumik tunniussisoqassasoq naatsorsuutigaat, tassanilu kommunip A-skatimik akiliinngitsoornera qanoq aamma sooq pisinnaasimanersoq, aammalu aningaasat sumut atorneqarsimanersut nassuiarneqarnissaat naatsorsuutigalugu.
- Immaqa isumaqartoqarsinnaavoq kommunip taarsigassarsiaminik qaffaaniarnera aaqqiissutissaasoq, kisianni tamanna naammaginanngilaq. Demokraatit sinnerlugit akuersisariaqarnikuuvugut kassekreditimik qaffaanissamik qinnuteqaateqartoqassasoq sulianut ingerlasunut pitsaanngitsumik kinguneqartitsisoqarsinnaanera pinngitsoortinniarlugu.
Demokraatit piareersimappat Kujallermi aqutseqatigiinnermut isumaqatigiissummit anissallutik borgmesterip piumasarsi naammassissanngippagu, tassa aasaanerani sulinngiffeqarneq aallartitsinnagu kommunalbestyrelsip immikkut ittumik ataatsimiitsinneqarnissaa pissanngippat?
- Tusagassiutinut nalunaaruteqarnerput sioqqullugu aningaasaqarnermut ataatsimiititaliaq aqqutigalugu piumasaqaateqarnikuuvugut akisussaasut qullersaannit nassuiaasoqassasoq, maannalu piumasaraarput piaartumik kommunalbestyrelsi ataatsimiissasoq. Akisussaallutik qullersaat suli nassuiaateqanngillat, taamaattumik matumani noqqaassuterput qanoq pineqassanersoq takoqqaarallassavarput, Margrethe Thårup Andersen (D) akivoq.
Borgmester Stine Egede Sermitsiamut 23. majimi oqaatigaa ernumassutissaqanngitsoq aammalu ataqatigiissaarineq pitsaasoq:
- Ukiorpassuarni naatsorsuuserinermi ajornartorsiuteqarsimanngilagut, taamaallaat ukiuni kingullerni, tassani aaqqissuussaanerup annertuumik allanngortiterneqarnera ingerlasimavoq, tamatumalu saniatigut aningaasaqarnermik aqutsinermi systemimut nutaamut ikaarsaarsimalluta, taannalu naatsorsuuserinermi ajornartorsiuteqalersitsisimavoq, tassami nutaamik systemimik atuilernissaq ajornaatsuusimanngimmat. Kisianni maanna killiffitsinni isumannaatsumik ingerlatsisoqarpoq, taamaammallu qulakkeersinnaavarput taamatut kukkusoqaqqissanngitsoq, taamaattumik isumaqarpunga kinguneqartitsisoqassanngitsoq, borgmesteri Stine Egede taamani Sermitsiamut oqarpoq.
