Kujallermi sipaarniarneq: 47 millionit koruunit nassaarineqassapput
Borgmesterip Malene Vahl Rasmussenip kommuni aningaasaqarnikkut ingerlanerliortoq akisussaaffigilerpaa. Taamaammat kommunimi aappaagu sipaarniartoqangaatsiartussanngorpoq.
Namminersorlutik Oqartussanut akiitsut meeqqallu angerlarsimaffiup avataanut inissinneqartunut aningaasartuutit Kommune Kujallermi aningaasaqarnikkut sipaarniartariaqarnermik kinguneqarput.
Assi: Trine Juncher
Kommune Kujallermi aningaasaqarnerup ukiuni kingullerni ajorseriarsimanera isertuussaanngilaq.
Kommunip akileraarutinut A-nut 40 millionit koruunit sinnerlugit Namminersorlutik Oqartussanut akilersimanngikkai 2024-mi paasineqarpoq. Kommune taamaattoqarnerata kinguneranik 2025-mi 40-50 millionit koruunit akornanni sipaarniartussanngorpai.
Kommunalbestyrelsimi ilaasortat akileraarutit procentinik marlunnik qaffanneqarnissaat ukioq manna septembarimi oqaluuseraat — inaarutaasumik aalajangiineq aatsaat novembarimi pissaaq.
Aningaasaqarnerup ingerlanerlunnera borgmesterinngorlaap Malene Vahl Rasmussenip (D) unammillernartoqartippaa. Kommunip ukiut siuliini akiitsoqalernerata kinguneranik aningaasat atorneqarsinnaasut amerlanngitsut LinkedIn-imi allappoq.
- Politikkikkut naleqartitakka eqqarsaatigalugit pakatseqqavunga. Aningaasaqarnikkut ingerlalluaqqilernissap pingaarnersiortariaqarnerata kingunerisaanik inuiaqatigiittut siunissatsinnut aalaajangeeqataasussamik pinaveersaartitsinermik suliniuteqarusukkaluarnera tunulliuttariaqarpara, allatamini aallarniutigaa.
Kommunalbestyrelsimi ilaasortat 2026-mut missingersuutit siullermeerneqarnerat naammasseqqammerpaat, aappaagulu 47 millionit koruunit sipaarutigineqartussanngorlutik.
- Kisitsisit nipituumik oqaatigalugit annernarput. Kisitsisinnaanngillammi, koruunit tamarmik kiffartuussinermut, inunnut, suliniutinut annikinnerulersitsinissamik kinguneqarput.
Angerlarsimaffiup avataanut inissiinermut aningaasartuutit
Kommune Kujallermi aningaasaqarnerup sipaarniarfigisariaqarneranut Namminersorlutik Oqartussanut akiitsut kisimik pissutaanngillat. Meeqqat inuusuttullu angerlarsimaffiup avataanut inissinneqarnerannut aningaasartuutit amerliartorput, borgmesterillu oqarnera naapertorlugu ukioq manna missingersuutinut malunnaatilimmik sunniuteqarsimallutik.
Naalakkersuisut kommuni ikiorniarlugu 2024-mi novembarimi aalajangiuppaat. Meeqqanut Inuusuttunullu Naalakkersuisoqarfiup meeqqanut inuusuttunut kiisalu inunnut innarluutilinnut tunngasunik aqutsineq akisussaaffigilerpaa. Kommunimit pisariaqartitsineq annertummat taamatut aalajangertoqarpoq.
Kommune Kujallermi angerlarsimaffiup avataanut inissiinerit amerlanerpaasut, Nunatsinni meeqqanut inuusuttullu atugarliortunut pitsaanerusumik suliniuteqarnissaq pillugu kalaallit danskillu oqartussaasoqarfiisa assigiinngitsunik suliallit akornanni suleqatigiinnermi 2023-mi nalunaarusiami, paasinarsivoq.
Malene Vahl Rasmussenip meeqqat pillugit nuna tamakkerlugu politikerit ataatsimeeqatigineranni peqataasimalluni allatamini aamma eqqaavaa.
- Annernarpoq. Meeqqat atugarissaarnissaat siunissaallu pillugit takorluukkat tusarnaartillugit, aningaasatigut pissutsit maanna atukkavut eqqarsaatigalugit, siunnersuutit affaannaalluunniit piviusunngortissinnaanagit nalunngilara.
Taamaakkaluartoq kommunimi inuussutissarsiornikkut ineriartornerup annertusiartornera borgmesterimut neriuuteqalersitsivoq.
- Suliniutit nutaat suleqatigiilluarnerillu siuariartortut takusinnaavavut, taakkulu piffissap ingerlanerani isertitaqarnerulissutigisinnaallugit. Tamannali piviusunngortinnagu neriorsuissanngilanga, taamaammat siunissaq ungasinnerusoq eqqarsaatigalugu ataasiakkaarinnilluta iliuuseqarnerput attatissavarput.
