Kommune Kujallermi isumaginninnerup ilaa Naalakkersuisut tiguaat
Kommune Kujallermi pissutsit ilungersunarput, taamaattumillu meeqqanut inuusuttunullu naalakkersuisup maannakkut nammineq sulisuni Kujataani meeqqanut, inuusuttunut innarluutilinnullu sullissinerup aaqqissuunneqarnissaanut suliassippai.
Aqqaluaq B. Egede Kommune Kujallermi isumaginninnikkut aaqqissuusseqqinnissamut sulisuminik atuivoq.
Assiliisoq: Leiff Josefsen
Kommune Kujallermi isumaginninnikkut unammilligassat annertuut pissutigalugit Naalakkersuisut maanna aalajangerput kommunimut ikiorsiissuteqarniarlutik. Tamanna isumaqarpoq Meeqqanut Inuusuttunullu Naalakkersuisoqarfiup meeqqanut inuusuttunullu kiisalu innarluutilinnut tunngasunik aqutsineq tigussagaa.
- Isumaginninnermut suliassaqarfimmi malittarisassanik ingerlatsineq aallaavittut kommunip suliassaraa. Kommunimi ajornartorsiutit annertungaarmata pinasuartuullutillu, Naalakkersuisuni Kommune Kujalleq ikiorniarlugu aalajangersimavugut, innuttaasut pisinnaatitaaffii inatsimmillu eqquutsitsineq qulakkeerneqarniassammata kommunimut ingerlaannartumik ikiuinissaq pisariaqarpoq, meeqqanut inuusuttunullu Aqqaluaq B. Egede oqarpoq.
- Akisussaaffik naggaterpiaatigut kommunimut peqqittussaavoq taamaammallu aalajangernermi isumaginninnermut ingerlatsivimmi sulisuni aqutsisunilu piginnaasanik ineriartortitsinissarput aamma qitiutipparput, ilassuteqarpoq.
Ikiorneqarnissaq piumaneqarpoq
Kommune Kujallermi ingammik Nanortalimmi Qaqortumilu sulisussaaleqineq ajornartorsiutaavoq. Kommunip naatsorsuisimanera naapertorlugu meeqqat inuusuttullu pillugit suliat 857-it innarluutillillu pillugit suliat 300-t suli suliarineqanngillat. Siunnersuisartunut avataaniittunut aningaasartuutit aningaasaqarnikkut annertuumik nanertuutaapput.
Taamaattumik Kommune Kujallermi borgmesterip, Stine Egedep (IA), septembarimi Naalakkersuisut ikiorneqarnissamik qinnuigai.
- Naalakkersuisut qanoq ikiorsiiumaarnersut pissangallunga utaqqisimavara. Uannut pingaarnerpaaq tassaavoq innuttaasut pisinnaatitaaffigisartik malillugu ikiorserneqarnissaat, tamannalu maanna pissavaat, Stine Egede aalajangerneq pillugu oqarpoq.
Kommunip isumaginninnermut tunngasut meeqqanut inuusuttunullu kiisalu innarluutilinut tunngasuunngitsut, soorlu utoqqarnut tunngasut, nammineq akisussaaffigiuassavai.
