KL

DK

Ukioq Kommuna Kujallermut ajornakusoortoq

Kommuni Kujalliup aningaasatigut ajornartorsiornera ukioq manna oqallisaallunilu ulapputaaqaaq. Borgmesteri kingumut qiviarpoq.

Tôrtia Reimer-Johansen
Journalist
Offentliggjort

Naak Ukioq 2024 Kommune Kujallermut pikkunarpoq.

Aningaasaqarnerup ajornartorsiornera, sipaarniuteqartariaqalernerit illuatungiliuttuniillu sakkortuumik isornartorsiorneqarneq borgmesterimut pikkunarsimaqaat.

Aningaasaqarnerup ajornartorsiornera paasinarsivoq, kommuni akileraarutinik 40 millionit koruuninik akiliisimannginnera ersermat.

Taamaattumik ukioq pikkunarsimaqisoq, Stine Egede oqaluttuarpoq:

-  Kommunimi anguniakkatsinnik iluatsittunik timitalersuileruttornitsinni kommunip aningaasaqarnerata qanoq inissisimaneranik takussutissat siulliit takkummata. Kingorna innuttaasunut paasissutissiissutiginera, paasiniaanerillu kinguneranik torersaaniarluni kommunalbestyrelsemi suliat annertuut ilaatigut imaannaanngitsut aaliangiiffigisariaqartakkat ilaatigut tupinnanngitsumik aalassatsitsisarsimaqisut siuttuuffigineri initusimaqaat.

Akileraarutit akilerneqarsimannginnera peqqutaalluni, Demokraatit sakkortuumik isornartorsiupput, borgmesterilu tunuaqqullugu, taamaakkaluartoq borgmesteri nikisitassaasimanngilaq:

-  Aningaasaqarnermut ataatsimiititaliaq aamma kommunalbestyrelsi sinnerlugit utoqqatserpunga akileraarutit A-t akilersimannginneri pillugit, kisianni akisussaaffiga qimarratiginianngilara, borgmesteri Sermitsiamut taamani oqarpoq.

Akisussaafferujussuarmik nammataqarluni aningaasaqarnerup ajornartorsiornera pitsaasumut saatinnissaa suliaraa.

Aningaasaqarnerup pitsaasumut saatinnissaa anguniarlugu ukiut sinneranut atorfinitsitsisarnerit pisiortornerillu inatsisinik piumasaqaatigineqartunik pingaarutilinnik suliaqarnermut attuumassuteqanngitsut unitsikkallarneqarnissaat aalajangerneqarpoq. 

- Imaannaanngitsut aaliangiiffigisariaqartakkat ilaatigut tupinnanngitsumik aalassatsitsisarsimaqisut siuttuuffigineri initusimaqaat.

Isumaginninnerup ilaata nakkutigisaalernera

Kommune Kujallermini aningaasaqarneq kisimi ukkataanngilaq. Kommunemi isumaginninnermut immikkoortortaqarfik Naalakkersuisuniit tiguneqarpoq. 

-  Naalakkersuisunut ikioqqulluta saaffiginnissuterput piviusunngorpoq, naak isumaginninnerup ilaata nakkutigisaalernera imaannaanngikkaluartoq, periarfissat allat ajornarmata akuerisimavarput. Neriuppungalu tamanna ilaqutariinnut pisariaqartitsisunut iluaqutaalluarumaartoq. Pisariillisaaneq annertooq suliarisariaqarsimavoq.

-  Siullerpaamik takernarialerisunut gebyr isertitassavut 4.350 millionit koruunit tigusussanngorpagut, naak sikorsuit ajornartorsiortitsigaluaqisut, siunissamut isumalluarnarput ineriartortitsinissatsinnut iluaqutaasussaammata.

Ajunngitsoqarporli

Naak aningaasaqarneq isumaginninnerlu unamminartorsiorfiusimagaluartut, borgmesteri nuannaaruteqarpoq. Kunngikkormiummi nunatsinni angalanertik kujataani naggataarpaat.

Kunngikkormiut aasaq juulip qaammataani Narsamut Qassiarsummullu tikeraarput.

Naak sialleraluartoq innuttaasut amerlasuut kunngikkormiunut tikilluaqqusiartorput.

-  Kunngitta siullermik nunatsinni angalanermini kujataani sikorsuit patsisigalugit angalanissaminik allanngortitsinerminut atatillugu Igalikumi unnuinera aamma qaqugumut eqqaamasassanut ilannguppoq.

-  Narsarmijit ukiunik 200-nngortorsiornerat, Qassiarsuup ukiunik 100-nngortorsiornerini peqatigaakka nuanningaartumik. Inuppassuit siulitik ataqqillugit persuarsiortut peqatigalugit killitsinnanngittuunngillat. Nammineerlutillu aqqissuillaqqissusii tulluusimaarutigaakka.

Qimarnguit meeqqerivillu nutaaq

Qimarnguiit Nanortalimmi, Narsami Qaqortumilu ammarput. Angerlarsimaffeqanngitsunut kialaarfik Qaqortumi aamma pilersinneqarpoq.

Borgmesterip aamma nuannaarutaasa ilagaat ukiorpassuarni ilungersuutigisimasartik, tassa aalisarnermik piniarnermillu nakkutilliisoq aammalu ilanngaaserisoq qimmilik pigileramikkit.

Naak ukioq borgmesterimut pikkunarsimagaluartoq, kommunimut qinersilerutta sassaqqikkusuppoq.

-  Isumaqarama suli suleqataaffissaqarlunga, taamaammat sassaqqissaanga.

isumaginninneq inuiaqatigiit aningaasaqarneq kommune kujalleq stine egede kunngikkormiut

ATORFIIT Se alle jobs

Powered by Labrador CMS