KL

DK

Kunngi Frederik: Kunngeqarfimmi atassuteqarneq pisussaaffeqarnerlu

Kunngip Frederiup 2024-mi ulloq ataaseq immikkut maluginiarpaa: Ulloq Danmarkimi kunnginngornini. Ukiortaamut oqalugiaammini Kunngi Frederiup nuliamilu Dronning Maryp kujammiit avannamut atassuteqarneq eqqaavaa: - Ataqatigiippugut, oqarpoq.

Thomas Munk Veirum
Tusagassiortoq
Ritzaus Bureau
Saqqummersinneqarpoq

Kunngi Frederiup januaarip 14-iani kunnginngornera ukiumi qaangiuttumi kunngip Frederiup ulluisa pingaarnersaraat.

Amalienborgimi Frederik VIII-p illussaarsuani ukiortaami oqalugiaammini siullermi oqarpoq.

- Ulloq ataaseq puiunaatsuuvoq - januaarip 14-iat.

- Københavnip aqqusiniatigoorluni Christiansborgimut Statsrådimukaarneq, anaanama naggammik peqataaffigisaa, kunngi Frederik oqarpoq, Christiansborgimilu aneerasaartarfimmut anillanninni puiukkiussimavaa.

- Anillannermi tapersersorneqarluarneq, nuannaarneq asanninnerlu annertooq misigalugu, oqarpoq.

Dronning Margrethenngitsumik oqalugiartoqarsinnaava?

Dronning Margrethep tunuarnerata kingorna kunngi Frederik oqalugiarmat qallunaat tusindilippassuit Christiansborgip saavani katersuupput.

- Attortissutigalugulu tupigusuutigaara. Puiunngisaannassavara. Eqqaamajuassavarput. Qujanarujussuaq, Kunngi Frederik oqarpoq.

Kunngitut perngaammik ukiortaami oqalugiarnini aamma eqqaavaa, taamaattumillu inuit ilaasa pissangatissimagunaraat.

- Dronning Margrethenngitsumik ukiortaami oqalugiartoqarsinnaava?

Slesvigimiit Kalaallit Nunaannut

Kunngip Frederikip ukioq qaangiuttoq kingumut qiviarpaa, ataqatigiilluarnerlu dronninngilu malugisimasartik eqqaallugu:

- Ulluinnaat uagutsinut sukkasutut pisinnaasarput. Sapaatip-akunnera, qaammat ukiulluunniit qaangiutipallattutut ittarput. Suut pippat. Ataqatigiinneq. Marylu januaarip 14-iani (kunnginngornerani, aaqq.) misigaarput, aamma Kunngeqarfik Danmarkimi angalanitsinni misigeqqipparput.

Kunngi Frederik X Københavnimi Amalienborg Slotimi Frederik VIII's Palæmi ukiortaami oqalugiareernermini. Kunngi qalipagarsuup, Kalaallit Nuaannut tunngasut ilaatigut qalipanneqarsimasup, saani issiavoq.

- Najukkassinni inuuffigisassinni naapikkaagassi misigisaq immikkuullarissuusarpoq. Ulluinnasi takullatsiaraangatsigit, oqarpoq.

Kinngeqarfimmi ‘kujataanit avannamut tamatta ataatsimoortugut’ Kunngi aamma oqarpoq.

- Tamatta ataqatigiippugut, tamatta immikkut Danmarkip Kunngeqarfiani pisussaaffeqarnerput. Sydslesvigimi qallunaat ikinnerussuteqartuniit, allaat naalagaaffiup avataaniittunut, Kalaallit Nunaallu tikillugit. Ataqatigiippugut.

- Sumiiffiit taakku marluk aqqutaanilu tikitagut tikeraaratsigit Marylu misigaarput, Savalimmiut tikittussaassavarput, Atlantikullu avannaani aasarsiornissarput qilanaaraarput.

Inuusuttunut oqalugiarfigigai

Kunngi Frederiup ukiortaami oqalugiaammini inuiaqatigiinni avissaartuunneq, ilaatigut qinngarsuinerulersinnaasartoq, mianersoqqussutigaa.

- Isumaqatigiinnginnerit annertusigaangata nunarsuaq annikilliartortissinnaasarparput, oqarpoq.

Aammattaaq meeqqat inuusuttullu oqalugiaammini pingaarutilittut sammivai. Inersimasullu kajumissaarlugit inuusuttut tusaaniartaqqullugit.

- Marylu inuusuttuaqqanik sisamanik meeraqarnitsinni paasivarput tusarnaartarnerup iluaqutaasarnera.

- Meeqqavut assigiinngitsuupput, inuusuttullu allat aamma taamaapput. Perorsaariaaseqanngilaq tamanut assigiimmik.

- Inuusuttut ilikkarnissaannut pitsaanerpaaq tassaavoq tamaasa oqaloqatigisarnissaat. Inuusuttut ullutsinni namminneq oqaaseqarsinnaanertik tunuarsimaarfiginngilaat. Sapiissuseqarput qajannartuullutik nukittuujullutillu, kunngi Frederik oqarpoq.

inuiaqatigiit christiansborg amalienborg tronoverdragelse kong frederik kongeriget danmark samfund

ATORFIIT Se alle jobs

Powered by Labrador CMS