Naalakkersuisut Landryp ataatsimeeqatiginera pillugu paasissutissiisut: Kalaallit Nunaat tuninavianngilarput
Jens-Frederik Nielsenip Múte B. Egedellu immikkut aallartitap Jeff Landryp sinniisullu Ken Howeryp ataasinngornermi ataatsimeeqatiginerat pillugu tusagassiortunut naatsumik ilisimatitsissapput.
Assi: Trine Juncher Jørgensen
Naalakkersuisut siulittaasuat Jens-Frederik Nielsen (D) nunanullu allanut tunngasunut, inuussutissarsiornermut aatsitassanullu naalakkersuisoq Múte B. Egede (IA) ataasinngornermi nalunaaqutaq 12:15 – 12:25 tusagassiortunik naatsumik paasissutissiipput.
USA-p Danmarkimi sinniisua Kenneth A. Howery aamma USA-p Kalaallit Nunaannut immikkut aallartitaa Louisianami guvernøri Jeff Landry ataatsimeeqatiginerat pillugu Naalakkersuisut paasissutissiipput.
Sermitsiaq tusagassiortunik katersortitsinermik malinnaavoq, paasissutissiinermiillu tigulaakkat ataani atuarneqarsinnaapput:
Nutartigaq 12.28: Kalaallit pisiarineqarsinnaanngillat
Jens-Frederik Nielsen Naalakkersuisut oqariartuutaat aatsaat taama pingaaruteqartigisoq oqarpoq.
- Oqaloqatigiinnerup ingerlateqqinnissaa Kalaallit Nunaannullu pitsaanerpaamik aaqqiissutissarsinissaq pisussaaffigivarput.
- Kalaallit pisiarineqarsinnaanngitsut oqaatigisaqattaarnikuuarput, namminerlu aalajangiisinnaatitaanerput allanngortinneqarsinnaanngitsoq, oqarpoq.
Múte B. Egede ima oqarpoq:
- Killissaqarpugut. Kalaallit Nunaat tuninavianngilarput. Kalaallit Nunaat pigiuassavarput, oqarpoq.
Nutartigaq 12:23: Peqqinnaranilu angusaqarfiunngitsoq
Jens-Frederik Nielsen Landryp nakorsamik amerikamiumik ilaqarnersoq aperineqarpoq:
- Siullermik nakorsaq Amerikamiu ataatsimeeqatigissanerlutigu uppernarsarsinnaanngilara. Kalaallit Nunaannili peqqinnissaqarfimmut tunngasunik paasisaqarusukkaanni attaveqaatit eqqortut atorlugit attaveqartoqartariaqartoq isumaqatigaara.
- Umiarsuit eqqartorneqartut tusagassiuutitigut ingerlanneqarput. Tamanna peqqinnaranilu angusaqarfiunngilaq. Aqqutit eqqortut atorneqartussaapput, Jens-Frederik Nielsen oqarpoq, nangipporlu:
- Præsidentip oqaloriaasaa tusarnaaraanni piginnikkusuttutut nipeqarpoq. Taamaattumik suleqatigiissitaliorpugut, suliaallu ataqqissavavut, nangippoq.
Nutartigaq 12.20: Ataqqinninneq kipilittunarsimavoq
Jens-Frederik Nielsenip Kalaallit Nunaanniit suleqatigiilluarnissamik ujartuisoqartoq, suleqatigiissitarlu ataqqineqassasoq oqaatigisimallugu aamma oqarpoq.
- Suleqatigiissitaq pilersinneqarnikoq ataqqissavarput, sulinerlu aqqutit eqqortut atorlugit ingerlanneqassalluni, oqarpoq.
Múte B. Egede amerikamiut oqaloqatiginerat ajunngitsumik torersumillu ingerlasoq oqaatigaa:
- Suleqatigiinnerup ajunngitsumik ingerlasup uterfigeqqinnissaa naqissuserusuppara, aamma tungitsinniit ersarissumik oqaatigaarput. Ataqqeqatigiilluta. Ataqqinninneq ukiuni kingullerni kipilittunalaarsimavoq, Múte B. Egede oqarpoq, nangipporlu:
- Suleqatigiinnerunissamik oqaaseqarneq ukiuni arfinilinni kingullerni ujartorsimavarput. Suleqatigiinnissamut akimmiffilersuinikuunngilagut. Suleqatigiissitat sulinerisa naammassinissaat utaqqissavarput, oqarpoq.
Nutartigaq 12.18: Ataqqeqatigiittoqarpoq
Jens-Frederik Nielsen tusagassiortunik katersortitsinermi aallarniilluni Amerikamiut ataatsimeeqatigineqaqqammertut oqaatigaa:
- Ken Howery aamma Jeff Landry ataatsimeeqatigeqqammerpavut, ataqqeqatigiillutalu oqaloqatigiilluta, Jens-Frederik Nielsen oqarpoq nangillunilu:
- Suut pingaartinnerlugit soorunami paasitippagut. Ataatsimiinnermi aallaqqaammulli oqaatigisartakkavut assigiinngitsut erseqqissarpavut: Kalaallit Nunaat inuiaqatigiillu kalaallit ataqqineqassasut, oqarpoq.
Nalunaaqutaq 12.10 nutartigaq: Tusagassiortut qulit missaanniittut tusagassiortunik katersortitsinerup aallartinnissaa sioqqullugu Naalakkersuisut tusagassiortunut katersuutsitsisarfianniipput.
Landry sapaatiummat tikippoq
Jeff Landry aallartitanik ikittunik ilaqarluni Nuummut sapaammi ualikkut tikippoq, sinniisorlu Howery Københavnimiit timmisartumik ullaaq manna tikilluni. Taakku marluullutik marlunngornermi pingasunngornermilu inuussutissarsiorneq pillugu ataatsimeersuarnermi Future Greenlandimi peqataaniarlutik nalunaarutiginikuuaat.
Aammattaaq Howeryp Amerikamiut Nuummi sinniisoqarfittaavat atoqqaartissavaa. Tamanna sisamanngorpat pissaaq. Landryli pingasunngorpat angerlamut aallassaaq, taamaattumillu peqataassanngilaq.
Jeff Landryp Kalaallit Nunaanni tikeraarnermini pilersaarutai annikitsuinnarmik paasissutissiissutigineqarnikuupput, tikereerneratali kingorna naalakkersuisunut sinniisuusunik ataatsimeeqateqarnissaa pilersaarutaasoq paasinarsivoq.
