LIVEBLOG Siumut Qeqqani siuttuuinnarpoq: - Qujamasuppugut tulluusimaarlutalu

- Europami iligiit arlallit suliassamik præsidentip sumiginnaasutut isumaqarfigisaanik tigusisimanerat tunuliaqutaralugu præsidentip taamatut oqariartornera akornusiisuuvoq. Tamatumaliuna tamanna ajornakusoortilerlugulu imminut assortortunngortikkaa.

Taama nunanut allanut ministeri Lars Løkke Rasmussen Norgip nunanut allanut ministeria Espen Barth Eide peqatigalugu Donald Trumpip akitsuusiinissamik qunusaarinera pillugu tusagassiortunik katersortitsinermi oqarpoq.

Suliassaq innersuussutigisaa Issittup illersorneqarneranut tunngavoq, Danmarkimmi NATO-milu ilit arlallit maanna sakkutuunik Kalaallit Nunaannukartitsipput.

Trump Danmarkimut Europamilu nunanut arfineq marlunnut 10 procentimik akitsuusiinissamik aarlerisaarivoq. Taamaaliortoqarnerli ajortoq, Lars Løkke oqarpoq.

- Qunusaarineq manna takkuttoq nunanut ikinnerusunut oqaatigisaagaluarpoq, tamannali EU-mik tamarmiusumik eqquivoq, akitsuuseeqatigiittarpugummi.

- Tassunga atatillugu EU-mit tapersiinissaq tamakkiisumik isumaqartigineqartoq matumunnga atatillugu aamma maluginiarpara, Lars Løkke Rasmussen tusagassiortunik katersuutsitsinermi oqarpoq.

Europa Donald Trumpip akitsuusersuinissamik siorasaarineranit pinngitsaalineqarsinnaanngilaq.

Taama statsministeri Mette Frederiksen (S) Ritzaumut allakkatigut akissummini allappoq.

- Kunngeqarfik Danmark annertoorujussuarmik tapersersorneqarpoq. Peqatigisaanillu maanna pisoq manna nammineq killeqarfivut qaangerlugit susassarineqartoq erseqqissiartorpoq.

- Suleqatigiinnissaq kissaatigaarput, uagullu saqitsaassutissarsiunngilagut. Europap sinneranit assigiimmik nipilimmik oqariartorneq nuannaarutigaara: Europa pinngitsaalineqassanngilaq.

Amerikamiut præsidentiata Donald Trumpip ulloq 1. februarimit Europami nunanik arlalinnik, nammineq Kalaallit Nunaannik tigusinissaminik kissaateqarnerminik tapersersuinngitsunut 10 procentinik akitsuusiinissamik arfininngornermi aarlerisaarinerata kingorna oqariartortoqarpoq.

Danskit nunanut allanut ministeriat Lars Løkke Rasmussen (Moderaterne) ulluni tallimani aggersuni Europami angalaarluni Issittumi isumannaallisaanermi pissutsit suleqatiminut oqaloqatigiissutiginiarpaa.

Taama nunanut allanut ministereqarfik sapaammi ullaakkut tusagassiuutinut nalunaarummi allappoq.

Sapaammi aallaqqaasiullugu norskit nunanut allanut ministeriat Espen Barth Eide Oslomut tikeraassavaa, kingornalu Londoniliarsinnarluni Stockholmimut ingerlaqqissaaq.

- Nunarsuarmi eqqissisimanngitsumi siumullu takorlooruminaatsumi qanimut ikinnguteqarnissaq ileqarnissarlu Danmarkip pisariaqartippaa, taanna nalunaarummi oqaaseqarpoq.

- Kunngeqarfiup piffissami ajornakusoorfimmi Norgip, Tuluit Nunaata Sverigellu ataatsimiinnerni annertoorujussuarmik tapersiinerannik qujassuteqarfigissavakka.

- NATO-p issittumi inissisimanerata nukittorsarnissaata isumaqatigiissutiginera nunani taakkunani ataatsimoorfigaarput, tamatumalu qanoq pinissaanik oqallisigeqatiginissaat qilanaaraara.

USA-p præsidentiata Donald Trumpip Truth Socialikkut Danmarkip nunallu Europamiittut arlallit, Kalaallit Nunaat pillugu isumaqatigiinnginneq pissutigalugu 10 procentimik akitsuummik eqqugaanissaannik allaaserinninnerata kinguninngua tikeraarnerit ingerlanneqarput.

Arfininngornermi Aalborgimi akerliussutsimik takutitsinermi kalaallit danskillu 700-ngujaat ataatsimoorlutik præsident Trumpip taassumalu Kalaallit Nunaannik tigusinissamik pilersaarutaanut akerliunerminnik nittarsaapput.

Akerliussutsimik takutitsineq Nytorvimi, Aalborgimi illoqarfiup bussiisa kateriffianni pivoq – ataatsimoornermullu ilapittuiumallutik illoqarfimmi bussit ullumikkut kalaallit danskillu erfalasuinik erfalasoqarput.

Kalaallit erfalasuat sumi tamani takussaavoq. Aaqqissuisut erfalasut pappiaqqat 500-t agguaappaat – amerlasuullu nammineq erfalasuutiminnik nassarput. Ilaatigut Henry Broberg Qeqertarsuarmeersoq, maanna ukiuni marlunni Aalborgimi najugaqartoq, erfalasumik toqulu Trumpimik inuusartalik nassarpai.

- Erfalasoq matutta saavaniitittagarput nassarpara. Kalaaliusugut ataatsimoornissatsinnik Trumpillu pilersaarutaanik akuersaannginnitsinnik takutitsinissarput pingaaruteqarpoq, Henry Broberg oqarpoq.

Politikiinnaanngilaq

Kalaallit Peqatigiiffiisa Kattuffiata Inuit siulittaasua Camilla Siezing siulliulluni oqalugiarpoq, nalinginnaasumillu peqatigiiffiup politikimut akuliuttannginnera nassuiaatigalugu.

- Manna politikimuinnaq tunnganngilaq. Nunarput pineqarpoq, Camilla Siezing erseqqissaavoq. Camilla Siezingip saniatigut folketingimut ilaasortaq Flemming Møller Mortensen (A), inuusuttuunermini Ilulissani sulisimasoq, kommunalbestyrelsimut ilaasortaq Nuuradiin S. Hussein Ivalo Lyberthilu kalaallit kulturimi peqatigiiffiani Tikiusaami siulittaasoq oqalugiarput.

Oqalugiarnerit kingorna nipilersortoqarlunilu erinarsoqatigiittoqarpoq. Erinarsornerit akornanni ”Kalaallit Nunaat, Kalaallit Nunaat” nillerrateqattaartoqartarpoq – naak tunuliaqutaq nuanniikkaluartoq.

Billedtekst: Camilla Siezing akerliussutsimik takutitsisoqarnerani oqalugiarpoq.

– Pisoq una sussaanngitsumik ineriartorpoq, taamaammallu aqqusinermut avalalluta taamaattoqarneranut akerliussutsimik takutitsisariaqarpugut. Tamakku peqataafigisinnaanngilagut, Margrethe Johansen Københavnimi Elisa T.L. Christensen peqatigalugu akerliussutsimik takutitseqataasoq oqarpoq, imalu nangilluni:

– Inuit Trumpip iliorneratulli pineqarneq ajorput. Inuuvugut inuit allat assigalugit nalinginnaasumillu inuuneqarpugut. Taamaattoqarneranit paatsiveerutinneqarpugut. Pissutsit ajorput alianarporlu akerliussutsimik takutitsisariaqarnerput. Taamali amerlatigisut takkunnerat pitsaavoq. Uanga nammineq kalaaliullungalu danskiuvunga, kalaallillu, danskit allamiullu taama amerlatigisut takkunnerat pingaaruteqarpoq.

Nunatsinni piffinni arlalinni akerliussutsimik takutitsisoqarnissaa sioqqullugu, Kalaallit Nunaanni piffinni arlalinni ataatsip qeqqanit akerliussutsimik takutitsinerit naammassinissaasa tungaannut angallanneq akornuserneqassasoq ilimagineqartoq, Kalaallit Nunaanni Politiit Facebookikkut allapput.

Nuummi Aqqusinersuaq kaajallattarfimmit ammut aallartitaqarfiup tungaanut asserneqassaaq. Akerliussutsimik takutitsisut piffik qaangerpassuk aqqusinermi assiaqutit peerneqassapput. Assiinerit peerneqarpata, politiit tamanna nalunaarutigissavaat.

Akerliussutsimik takutitsisut politiillu innimigisigit. Akerliussutsimik takutitsisuni politiit najuutissapput.

Nuummi, Qaqortumi, Aasianni, Sisimiuni Ilulissanilu akerliussutsimik takutitsisoqarnissaa pilersaarutigineqarpoq.

Sermitsiaq Københavnimi akerliussutsimik peqataasunut peqataavoq, tassani inuit tuusintilippassuit Rådhuspladsimit Østerbromi Amerikamiut aallartitaqarfiannut pisoqatigiipput.

Akerliussutsimik takutitsisunut amerikamioq-kalaaleq Ajana Watson danskerlu Henriette Dybdal Andersen ilaapput.

– Amerikamiutut aamma eqqortup illersornissaa pingaaruteqarpoq. Pissutsit qanoq ineriartornerat takullugu kanngunarpoq. Trumpip inuiaat kalaallit niuerutaannartut oqaluuserai, tamannalu upperiuminaatsippara. Danskit taama amerlatigisut akerliussutsimik takutitsinermut peqataanerat, nunarsuarlu tamakkerlugu Kalaallit Nunaannik tapersersuisut taamak amerlatiginerat pikkunartoq isumaqarpunga. Amerikamiut amerlasuut pisut tujorminarnerannik uattulli isumaqartut nalunngilara, Ajana Watson, Alaskamit Kalaallillu Nunaannit kingoqqisoq, ulluinnarnilu New Yorkimi najugaqartoq oqarpoq.

Henriette Dybdal Andersen inuiannik kalaallinik tapersersuinermik takutitsiniarluni peqataasoq peqatigalugu akerliussutsimik takutitsisunut peqataavoq.

– Danskiulluni inuiaat kalaallit imminnut oqartussaaffiginissamik pisinnaatitaanerannik tapersersuinermik takutitsinissaq pingaartoq isumaqarpunga, Henriette Dybdal Andersen oqarpoq.

KNR naapertorlugu inuit 15.700-t akerliussutsimik takutitsinermi peqataapput.

Københavni Rådhuspladsi inunnik kalaallinik illersuiartorlutik akerliussutsimik takutitsiartortunik ulikkaartoq, tv-mi assilisat takutippaat.

Arfininngornermi Danmarkimi Københavnimi, Aarhusimi, Odensimi, Aalborgimi Esbjergimilu akerliussutsimik takutitsinissamik aaqqissuisoqarpoq. Kalaallit Nunaat tamanna Nuummi ingerlanneqassaaq.

USA-p præsidentiata Donald Trumpip Kalaallit Nunaannik tigusiniarnerminik oqaatigisaminik uteqqiisarnerata kingorna, akerliussutsimik takutitsinerit ingerlanneqarput.

Nunatsinni illoqarfinni arlalinni, Nuummi Qaqortumi Aasiannilu aamma akerliussutsimik takutitsisoqassaaq.

Nutarterneqarpoq nal. 17.32

Flightradar naapertorlugu timmisartoq C-130 Hercules USA-mi Philadelphiamiit aallartoq Narsarsuarmut nal. 15:25 mippoq.

Timmisartoq mittarfimmiittoq Mittarfeqarfiit YouTubemi qupperneranni takuneqarsinnaavoq.

Timmisartoq ingerlaqqissalluni mikkallaannarnersoq Flightradarimi allassimanngilaq.

Issittumi sakkutooqarfik Sermitsiamut ilisimatitsivoq timmisartoq Hercules franskit timmisartorigaat, Narsarsuarmullu orseriartorluni missimasoq. Timmisartoq aallaqqereerpoq.

USA-p præsidentia Donald Trump “naatsorsuutigineqarsinnaanngilluinnartoq” Danmarksdemokratit siulittaasuat, Inger Støjberg, isumaqarpoq.

Folketingimi partiit siulittaasui ilaasortallu Atlantikup avannaaneersut naalakkersuisunit ilisimatinneqareersullu partiimi siulittaasoq taama tallimanngornermi oqarpoq.

Angut tatiginaranilu naatsorsuutigisassaanngilaq. Qnaorluunniit pisinnaallunilu misigissutsiminit aqunneqartorujussuusinnaasoq pineqarpoq, taanna oqarpoq.

Liberal Alliancep siulittaasua Alex Vanopslagh paasissutissiisoqareersorlu Kalaallit Nunaanni pisut pillugit toqqissisimanerulersimanani oqaluttuarpoq.

Aamma toqqissisimalersinniarlunga taamaaliortoqanngitsoq isumaqarpunga, taanna oqarpoq.

Alex Vanopslagh USA „Europamut iliginnittuugaanni pissusissamisuunngitsunik iliuuseqartoq“ isumaqarluni nangilluni oqarpoq.

Erfalasutta piumaneqarnera qaffariangaatsiarsimasoq erfalasuliortartut arlallit ulluni kingullerni nalunaarutigaat.

Taakku ilagaat Aalborg Flagfabrik, DR-imit oqaloqatigineqarsimasoq.

“Kalaallit erfalasuat piumaneqarnerungaatsialersimasoq” erfalasuliortarfimmi aqutsisoq Charlotte Pii Rasmussen oqaluttuarpoq.

Inuinnaat suliffeqarfiillu erfalasuliorfimmi Jyllandip avannaaniittumi aqutsisoq naapertorlugu Kalaallit erfalasuat inniminnertarpaat.

Dahls Flagfabrikkimi Københavnimiittumi aamma Langkilde & Søn-imi Herlevimiittumi, Radio IIII-mit aamma TV 2 Kosmopolimit sapaatip-akunnerata ingerlanerani oqaloqatigineqartuni, assinganik pisoqarpoq.

Sapaatip-akunnerani matumani nittartakkakkut inniminniisutta 90 procentipajaavi kalaallit erfalasuinik inniminniisimasut takusinnaavara.

3-5 procentiinnaasaraluartunit qaffariangaatsiarpoq, Dahls Flagfabrikkimi pisortaaneq Peter Østerbye Radio IIII-p nittartagaanut taama oqarpoq.

Folketingip Siulittaasoqarfia Christiansborgip saavani Rigsdagsgårdenimi Erfalasorput tallimanngorpat amuneqassasoq nalunaarpoq.

Kalaallit, danskit amerikamiullu Inatsisartuni, Folketingimi USA-milu Kongressimi ilaasortat ataatsimiinnissaat Erfalasup amuneqarnissaanut pissutaavoq.

Kunngeqarfimmi Kalaallit Nunaannilu piviusoq nutaajuvoq, ataatsimiinnissarlu immikkuullarilluinnartuuvoq, Folketingimi siulittaasoq Søren Gade (V) oqarpoq.

Ruslandip nunat Nato-mi ilaasortat Kalaallit Nunaanniititaqarnertik annertusinerat "ernummatigingaatsiarpaa".

Ruslandip Belgiami aallartitaqarfianiit, Nato-p qullersaqarfeqarfianiittumi, taamatut nalunaaruteqartoqartoq, nutaarsiassaqartitsivik AFP allappoq.

- Avannaani pisut uagutsinnut annertuumik ernumalersitsipput, oqariartuutigineqarpoq.

Danmarkip Nato-miit akulerutsitsinermigut "akerleriissutaasunik ajornerulersitsissasoq", Ruslandip Danmarkimi aallartitaa Vladimir Barbin Ritzauimut allakkatigut oqarpoq.

- Danmark nunap killeqarfiini isumannaatsuunermut tunngasunik aalajangiinissamut akisussaassuseqarpoq.

- Nato-lli Issittumi, Kalaallit Nunaat ilanngullugu, akuliutsinneratigut Danmarkip akerleriinneq siuarsarpaa, tamannalu isumannaallisaanermik pitsanngorsaaniarnermut ajornerulersitsilluni sumiiffimmi sakkutooqarnikkut naalarulunnermik annerulersitsiuaannarpoq.

Nunat tamalaat, aamma Issittoq eqqarsaatigalugu, isumannaallisarnerat ataatsimoorluni qulakkeerneqarsinnaasoq, Ruslandip aallartitaa isumaqarpoq.

- Issittumi naalagaaffiit tamarmik peqataasussaapput, Vladimir Barbin Ritzauimut allappoq.

Naalagaaffiit Issittumiittut tassaapput Kunngeqarfiup Danmarkip saniatigut USA, Canada, Finland, Norge, Sverige, Island Ruslandilu.

Folketingimi ilaasortat, nunatsinnit ataatsimiititaliat aamma Amerikamiut kongressimi ilaasortaatitaat nunat taakku pingasut suleqatigiinnerat eqqartorniarlugu tallimanngornermi Folketingimi naapinneqassapput.

Tamanna Folketingip tusagassiutitigut nalunaarutaani allassimavoq.

Ataatsimiinnermi nunanut allanut sillimaniarnermullu politikkimut tunngasut naalagaaffeqatigiinnermut Atlantikulu akimorlugu attaveqarnermut pingaaruteqartut qitiusutut sammineqassapput, nalunaarummi allassimavoq.

Ataatsimiinneq nalunaaqutaq 11.00 aallartissaaq, tamatumalu kingorna nalunaaqutaq 12.00 tusagassiortunik katersortitsisoqassalluni.

Kikkut Amerikamiut aallartitaannut ilaanersut Folketingip ilisimatitsissutiginngilai.

Senatorilli Chris Coons Demokraatineersup USA-mi inatsisartuni ilaasortat arfineq-marluk aamma kongressimi ilaasortat allat ilagalugit tikeraassalluni siusinnerusukkut ilisimatitsissutigaa.

Politikerit Demokraatineersut Jeanne Shaheen, Dick Durbin, Gregory Meeks, Madeleine Dean, Sara Jacobs aamma Sarah McBride ilagalugit angalassaaq, aammali senatorip replublikanerineersup Thom Tillisip suleqatini demokraatiusut angalaqatigissavai.

Inatsisartut nunanut allanut sillimaniarnermullu ataatsimiititaliaat aamma peqataassaaq.

EU-Kommissionip siulittaasuata Ursula von der Leyenip Kalaallit Nunaat tapersersorpaa.

"Kalaallit Nunaata naatsorsuutigisinnaavaatigut.“ AFP naapertorlugu Bruxellesimi tusagassiortunik katersortitsisoqarnerani oqarpoq:

- Uannut pingaaruteqarpoq Kalaallit Nunaata paasissagaat – oqaatsitigut kisimi pinnani, iliuuseqarnikkulli – kalaallit kissaataannik soqutigisaannillu ataqqinnilluta, aamma naatsorsuutigisinnaasaraatigut, von der Leyen oqarpoq.

Taama nalunaaruteqarpoq Nunanut Allanut Tunngasunut Naalakkersuisup Vivian Motzfeldtip (S) qallunaallu nunanut allanut ministeriata Lars Løkke Rasmussenip (Moderaterne), USA-mi præsidentip tullianik J.D. Vancemik nunanullu allanut ministeriannik Marco Rubiomik Washington DC-mi Det Hvide Husip eqqaani vicepræsidentep allaffiani ataatsimeeqateqarnissaat nalunaaquttap akunnerinik sisamanik sioqqullugu.

USA-p præsidentiata Donald Trumpip Kalaallit Nunaannik aqutsilernissamik piumasaqaateqarnerata kingorna ataatsimiinneq piviusunngorpoq. Ataatsimiinneq Kalaallit Nunaata nalunaaqutaa naapertorlugu 13:30 aallartissaaq.

Vivian Motzfeldt Lars Løkkelu Det Hvide Husimut maanna apuussimalerput, tassanilu J. D. Vance Marco Rubiolu vicepræsidentip allaffiani Eisenhower Executive Office Building, Det Hvide Husip sanianiittumi ataatsimeeqatigissavaat.

Ataatsimiinneq nunatta nalunaaqutaat malillugu 13.30 aallartippoq.

Ataatsimiinneq USA-p nunatsinnik annertusiartuinnartumik tatisimanninneranut tunngassaaq.

Ataatsimiinnerup kingorna Vivian Motzfeldt aamma Lars Løkke tusagassiortunik katersortitsissapput.

Pingasunngornermiiit Nato-mi nunat iligisat qanimut suleqatigalugit Kalaallit Nunaanni eqqaanilu sakkutooqarnerussaaq, Illersornissaqarfik ilisimatitsivoq.

Naalakkersuisut Illersornissaqarfillu tusagassiutitigut nalunaarummi ima allapput.

- Nato-mut ilaasortatut Kalaallit Nunaanni eqqaanilu illersornissap isumannaallisaanerullu nukittorsarnissaa Nato-milu nunanik iligisatsinnik qanimut suleqateqarluni pinissaa Naalakkersuisunit qitiutillugu pingaartinneqarpoq. Illersornissaqarfik Naalakkersuisullu suliniutit aallartinnissaannut qanimut suleqatigiillutillu issittumi Europamilu ilitta akornanni suleqatigiipput.

- Sungiusarnerit aallartippata inuiaat kalaallit Issittumi Sakkutooqarfiup attaveqaatai aqqutigalugit ataavartumik ilisimatinneqartarumaarput, nunanut allanut tunngasunut naalakkersuisoq Vivian Motzfeldt (S) oqarpoq.

- Illersornissaqarfiup Issittumi sakkutooqarnerunissaa sungiusarnissarlu qanorpiaq pisinnaanersoq issittumi Europamilu iligisat arlallit peqatigalugit sapaatit-akunnerini tulliuttuni misissussavaa, illersornissamut ministeri Troels Lund Poulsen (V) oqarpoq.

Atortut innuttaasunut pingaarutillt ilaatigut nakkutigineqarlutillu, Kalaallit Nunaanni oqartussanik, ilaatigut politiinik, ikiuineq, sakkutuunik nunanit iligisaneersunik tikittunik isumaginninneq, Kalaallit Nunaanni eqqaanilu timmisartunik sorsuutinik atulersitsineq kiisalu sakkutuut imarsiortut suliassamik naammassinninnissaat 2026-mi sungiusarnerni ilaatigut sungiusarneqassapput.

USA-p, Kalaallit Nunaata Danmarkillu Washington D.C.-mi ataatsimiinnissaanni Sermitsiaq USA-mi aqqusinermi pisut pillugit nutaarsiassiisarnissaminut piareersimavoq.

Sermitsiami assiliisoq Oscar Scott Carl Washingtonimut tikissimalersoq pissutsinut qanimut malinnaassaaq.

Ullumikkut ataatsimiinnissami nunanut allanut tunngasunut naalakkersuisoq Vivian Motzfeldt (S) aamma danskit nunanut allanut tunngasunut ministeriat Lars Løkke Rasmussen (Moderaterne), USA-llu præsidentiata tullia J.D. Vance, USA-p nunanut allanut tunngasunut ministeria Marco Rubio, præsidentip tulliata allaffiani præsidentip illorsuata eqqaaniittumi pisussami peqataassapput.

Ataatsimiinnerup kingorna Lars Løkkep Vivian Motzfeldtillu tusagassiortunik katersortitsinissaat naatsorsuutigineqarpoq.

USA-p, Kalaallit Nunaata Danmarkillu ullumikkut ataatsimiinnissaasa præsidentip tulliata Eisenhower Executiv Office Buildingimi allaffianut nuunneqarnera silatusaartumik aaqqiineruvoq, Sermitsiami aaqqissuisuuneq Masaana Egede naliliivoq.

- Pisumi silatusaartumik aaqqiinertut paasineqarsinnaavoq. J.D. Vancelli, siornatigut aamma misigisaqarfiginikuusatta, neriuutigisatsinnik diplomatii naapertorlugu ataatsimiinnissaq sinaakkuteqartissanerlugu ersarissumik oqaatiginngilaa, Masaana Egede oqarpoq.

Ataatsimiinneq aallaqqaammut nunanut allanut ministerit akornanni pisussaagaluarpoq, taamaammallu nunanut allanut tunngasunut naalakkersuisoq Vivian Motzfeldt (S), danskillu nunanut allanut minsteriat Lars Løkke Rasmussen (Moderaterne), Amerikami nunanut allanut ministeri Marco Rubio ataatsimeeqatigissallugu Washington D.C-liartinneqarput.

Taavali præsidentip tullia J.D. Vance peqataarusuttoq nalunaarutigineqarpoq. Taamaammat ataatsimiinnissaq aallaqqaammut Det Hvide Husimut nuunneqarpoq. Maanna præsidentip tulliata allaffianut nuunneqarsimasoq tusagassiuutit arlallit paasivaat.

Naalakkersuisut, Savalimmiuni inatsisartut Danmarkimilu naalakkersuisut aqagu januaarip 14-iani Københavnimi ukiup affakkaartumik naalagaaffeqatigiit ataatsimiillutillu Nunanut Allanut, Sillimaniarnermut Illersornermullu Ataatsimiititaliami ataatsimiissapput.

Ministeruneqarfik tusagassiutitigut nalunaarummi taama allappoq.

Lagmand Aksel V. Johannesen, Naalakkersuisuni siulittaasoq Jens-Frederik Nielsen ministeriunerlu Mette Frederiksen naalagaaffeqatigiit ataatsimiinneranni peqataassapput. Tassani nunat taakku pingasut naalgaaffeqatigiinnermi politikkikkut aningaasaqarnikkullu pisut eqqartussallugit periarfissaqassapput.

Naalagaaffeqatigiit ataatsimeereerpata Nunanut Allanut, Sillimaniarnermut Illersornermullu Ataatsimiititaliami ataatsimiittoqassaaq. Tassani ministeriunerup tulliata, illersornissamut ministerip inatsiseqarnermullu ministerip suleqatitik kalaallit savalimmiormiullu peqatigissavaat, Ministeriuneqarfik taama allappoq.

Nunanut allanut tunngasunut Naalakkersuisoq Vivian Motzfeldt (S), aamma nunanut allanut ministeri Lars Løkke Rasmussen (Moderaterne), USA-mi nunanut allanut ministeri Marco Rubio USA-milu præsidentip tullia J.D. Vance Det Hvide Husimi ataatsimeeqatigissagamikkit ataatsimiinnermi peqataassanngillat.

USA-mi præsidentip Donald Trumpip Kalaallit Nunaat isumannaallisaaneq pissutigalugu “periusullugu” piffissami sivitsortumi oqaatigisareeraalu ataatsimiinnissaq taanna pissanngatigineqarpoq.