Aaqqissuisuuneq atorfilittanik tikeraartoqarnissaq pillugu: Tikeraarnerinnaajunnaarpoq
USA-p sillimaniarnermut siunnersortaata nukissiornermullu ministeriata Kalaallit Nunaannut tikeraarnissaanik nalunaaruteqarneq pissutsinik ilungersunarnerulersitsisoq Masaana Egede isumaqarpoq.
USA-p atorfilittanik marlunnik tikeraartitsiniarnermigut politikkikkut ersarissumik oqariartuuteqartoq tusagassiorfimmi Sermitsiami pisortaq aaqqissuisuunerlu Masaana Egede oqarpoq.
Assi: Emil Stach
Kalaallit Nunaat akimasuumik sapaatip-akunnerani matumani tikeraarfigineqassaaq. Usha Vance, USA-p præsidentiata tulliata nulia, sisamanngorpamiit arfininngorneq ilanngullugu tikeraassaaq. Taassuma Sisimiuni Avannaata Qimussersua sapaatip-akunnerata naanerani pisussaq ilaatigut isiginnaassavaa.
USA-p sillimaniarneq pillugu siunnersortaa Mike Waltz aamma nukissiornermut ministeri Chris Wright aamma peqataassasut Præsidentip illorsuaniit maanna uppernarsarneqartoq Reuters allappoq.
Angutit taakku marluk, arnaq tikeraartussaq assiginagu, Pituffimmi Space Base tikeraassavaat tassanilu Amerikamiut sulisuinit paasissutissinneqassallutik.
Tamannalu pissutigalugu tikeraarnissaa allatut isumaqalersoq tusagassiorfimmi Sermitsiami pisortaq aaqqissuisuunerlu Masaana Egede oqarpoq:
- Qimussersuarmik isiginnaariaannarluni takornariarnerinnaanngitsuuneranik takussutissaasoq isumaqarpunga.
- Qimussersuarmut takornariarniarnerup nuannersumik nittarsaanneqarnerani nukissiornermut ministerimik isumannaallisaanermullu pisortamik nunamut uuliamik, aatsitassanik erngup nukinganik nukissiorfiusinnaasumut periarfissaqarluartumut tikeraartitsisoqalerpoq. Nunallu inissisimaffia pissutaalluni nunarsuarmi politikkikkut pingaaruteqarnera eqqarsaatigalugu tamanna politikkikkut oqariartuuteqarneruvoq pingaarutilimmik, oqarpoq.
Politikkikkut inuiaqatigiinnilu eqqissiviilliorneq
USA-miit inunnik pingaarutilinnik tikeraartoqarniarnera nalunaarutigineqarmat inuit alapernaalerneraannik kinguneqarpoq.
Timmisartoq qallunaanik isumannaallisaanermik suliaqartunik politiinillu ilaasoqartoq Nuummut sapaatiummat mimmat mittarfiup eqqaani inuit 50-it missaanniittut malinnaapput.
Unnuup ingerlanerani timmisartut marluk aamma tikiupput. Timmisartut Herculesit marluk USA-mi Camp Springsimeersut, inunnik arlalinnik biilinillu sisamanik aqerlumik pitarneqarsinnaanngitsunik usipput. Taakku Usha Vancep tikinnissaanut sillimaniarnermik suliaqartuupput.
Timmisartut Herculesit marluk tikinnerat innuttaasut akornanni eqqissiviilliornerulersitsipput.
Assi: Oscar Scott Carl.
Timmisartut tikinnerat innuttaasut tikeraarnermut isumaannut sunniuteqarsinnaapput.
- Timmisartut Herculesit marluk mimmata toqqissisimajunnaarnermik kinguneqarsinnaasoq isumaqarpunga, maannami tikittoqarnissaa piviusunngorpoq. Soorunami pissutsit assigiinngitsorpassuartigut isummersorfigineqarput, kisianni politikkikkut eqqissiviilliornermik inuiaqatigiinni toqqissisimajunnaarnermik kinguneqartoq isumaqarpunga, Masaana Egede oqarpoq.
Ernumassutissaava?
- Aap, kisianni una tikeraartoqarnissaanik pisoq ernumassutissaanersoq qularaara. Kingornaliuna pisussat, tassa tikeraartut USA-mut utereerunik politikikkut suleqatiminnut oqariartuutissaat ernumanarnerusoq isumaqarpunga.
Politikerit arlallit tikeraartoqarnissaa pillugu oqariartuuteqarput. Inuit Ataqatigiit siulittaasuat Muté Bourup Egede Kalaallit Nunaat nunanit allaniit suleqatigisaniit tapersersortariaqalernera kajumissaarutigaa, Siumullu siulittaasuata Vivian Motzfeldtip ernumavallaarnata USA-mut tunngatillugu periarfissat misissortariaqarivut isumaqarpoq.
