Løkke: Danmarkip Kalaallit Nunaat tunisinnaanngilaa
Danmark USA-lu Kalaallit Nunaat pillugu oqaloqatigiilluarsinnaappata aaqqiissutissarsiortoqarsinnaavoq, Løkke Rubiop apersorneqareernerata kingorna oqarpoq.
Nunanut allanut ministeri Lars Løkke Rasmussen (M) tallimanngormat ullaap tungaani Kalaallit Nunaat pillugu USA-p nunanut allanut ministeriata Marco Rubiop sisamanngornermi unnukkut apersorneqarneranut qisuariarpoq.
Assi: Ida Marie Odgaard/Ritzau Scanpix
USA-p nunanut allanut ministeriata Marco Rubiop præsident Donald Trumpip Kalaallit Nunaat pisiariniarlugu oqarnera "piaarinerunngitsoq“ sisamanngornermi unnukkut oqaatigereernerata kingorna qallunaat Kalaallit Nunaannut inissisimaffianik allannguisitsinngilaq.
Nunanut allanut ministeri Lars Løkke Rasmussen (M) Rubiop oqaaseqaataa pillugu Danmarkip “Kalaallit Nunaat USA-mut tuniunnanngikkaa” TV 2 Newsimut tallimanngormat ullaap tungaani oqarpoq.
- Taama pisoqarunnanngilaq, taama pisoqarsinnaanngilaq. Kalaallit inuiaapput. Kalaallit Nunaat Naalagaaffiit Peqatigiit isumaqatigiissutaannit illersorneqarpoq. Taama pisoqarsinnaanngilaq, Løkke TV 2 Newsimut oqarpoq.
Nunanik tunisineq "qanga pissutsinut atuukkunnaarnikunut" atuuttoq Lars Løkke DR-imut oqarpoq.
- Indiap Kippasissuaniittut qeqertat inuit tassaniittut apereqqaarnagit 1917-imi tunivagut. Ullutsinni taamaaliorsinnaanngilagut, aamma taamaaliorunnanngilagut, DR-imut oqarpoq.
Tamanna Marco Rubiop SiriusXM Radio-mit sisamanngornermi unnukkut apersorneqarnerani pingaarnerunngitsoq Lars Løkke TV 2 News-imut aamma oqarpoq.
- Maluginiarpara oqallinneq una toqqaannartumik oqaloqatigiissutigissallugu pitsaanerpaasoq aamma oqaatigigaa. Tamatumalu kingorna Amerikamiut soqutigisaat uagut Danmarkimi soqutigisatsinnut assingulluinnartut assigiinngitsorpassuartigut eqqartorpai.
- Oqaloqatigiissutigilluarsinnaagutsigu aaqqiissutissarsisinnaavarput, Løkke oqarpoq.
Rubiop Kalaallit Nunaat pillugu Amerikamiut pitsaanersunik iliuuseqarsinnaasimagaluartut sisamanngornermi nassuerutigaa.
- Pisut annerpaartaat tamanut ammasumik oqaluuserineqakulapput, tamannalu iluaqutaanngilaq, illuatungeriissummi nunami namminermut tunngasutigut pitsaanngitsumik inissittarput.
- Taamatut oqaloqatigiinnerit pisariaqarput, Rubio oqarpoq. Aamma USA-p isumannaallisaanikkut soqutigisai pineqartut erseqqissaatigai.
Løkke naapertorlugu Issittumi isumannaallisaanermut tunngatillugu Danmark USA-lu "soqutigisaqaqatigiipput“.
Løkke Rubiolu tallimanngormat kingullermi oqarasuaatikkut oqaloqatigiipput, issittumili isumannaallisaaneq oqaluuserineqanngilaq.
USA-lli, Danmarkip Kalaallit Nunaatalu Issittumi isumannaallisaaneq "kingusinnerusukkut“ oqaloqatigiissutigiumaaraat isumaqatigiissutigineqarpoq.
- Oqaloqatigiinneq pitsaasumik ineriartornartumillu minutsillu 20-t ingerlanerini ingerlanneqarpoq. Danmarkip Amerikallu attaveqatigiinnerat pitsaasuusoq isumaqatigiissutigineqarpoq, aamma siunissami qanimut attaveqatigiittuarnissaq piaarnerpaamillu naapinnissaq isumaqatigiissutigineqarpoq, Løkke oqaloqatigiinneq pillugu tusagassiuutinut nalunaarummi allappoq.
/ritzau/
