Mettemut naalagaaffimmullu timmisartut nutaat

Illersornissamut ministerip Troels Lund Poulsenip (V) timmisartumik Challengerimik ataavartumik Kalaallit Nunaanni nakkutilliisutut atorfeqartitsinikkut sakkutuut timmisartortartut unammilligassaat aaqqinniarsarilerpai.

Tamanna naalagaaffimmi timmisartuussinernut timmisartunik allanik attartornikkut pissaaq – tassa ministerit kunngikkormiullu pingaartumik Europamut, Amerikamut Avannarlermut Kangia Qiterlermullu angallanneqartarnerannut. Suliassaq Illersornissaqarfiup atortunik pisiortornermillu aqutsivianiit EU-mi suliarinnittussarsiuunneqaleqqammerpoq.

Suliniut 40 millionit euronik – 300 millionit koruunit missaanni – naleqartussaavoq, tassanilu neqerooruteqartup timmisartut marluk illersornissamut ministeriaqarfiup timmisartuussineranut atugassanngortissavai. Timmisartut marluk Københavnip timmisartoqarfianiit ikiffigineqarnissaminnut akunnernik 72-inik sioqqulluni nalunaaruteqarnikkut ikiffigeriaannanngotlugit piareersimassapput.

Teknikkikkut aserfallatsaaliuinermillu kinguaattoornerit pinngitsoortinniarlugit timmisartunik marlunnik piareersimasoqartussanngorlugu suliassaq suliariumannittussarsiuunneqarpoq.

Suliffeqarfik ukiumut nalunaaquttap-akunneri 480-it timmisartuussisinnaassaaq. Isumaqatigiissut ukiunik sisamanik sivisussuseqassaaq, ukiunik marlunnik sivitsorneqarsinnaalluni. Neqeroorutit kingusinnerpaamik 2024-mi septembarip 17-ianni nassiunneqassapput, ukiullu naannginnerani isumaqatigiissut atsiorneqassasoq illersornissaqarfiup atortutunut pisiortornermullu aqutsisoqarfiata naatsorsuutigaa.

Timmisartortitseqatigiiffiit eqqarsartut

Kikkut naalagaaffiup timmisartuussinissaanik neqerooruteqassanersut timmisartullu sorliit atorneqartassanersut taamaammat suli ilisimaneqanngilaq . Timmisartuussinermi tusagassiorfik Check-in naapertorlugu danskit timmisartortitseqatigiiffii sisamaagallartut maanna eqqarsarput naalagaaffiullu timmisartuussinissaanik neqerooruteqassanerlutik nalilersorpaat.

Naalagaaffiup timmisartuussisarnissaanut neqeroorut Christiansborgimi uissuummissutigineqarpoq. Illersornissamut ministerip Troels Lund Poulsenip neqeroorut pillugu illersornissamut isumaqatigiissut pillugu ataatsimiititaq ilisimatissimallugu aggustip 14-ianni tusagassiuutinut nalunaarummi ilisimatitsivoq.

Partiit illersornissamut oqaaseqartartuisa arlallit tamanna ilumuunnginnerarpaat.

- Timmisartumik namminersortumik 300 million koruuninik akeqartumik attartornissaq akuersissutiginngillara, taamaammat isumaqatiginninniartut akuersissutigisimasaattut illersornissamut ministerip oqarnermini suna pisimaneraa naluara, illersornissamut oqaaseqartartoq Lise Bech (DD) Ritzau Politiken naapertorlugu oqarpoq.

Carsten Bach Liberal Alliancemeersoq taamatut isumaqatigiissuteqartoqarsimaneranik eqqaamasaqanngilaq. Timmisartut attartorneqartut illersornissami suliassanik naammassinnissinnaasussaasut paasitinneqarsimavoq, taama Politikenimut oqarpoq.

Rasmus Jarlovip Konservativenit ilaasortaasup ministerip nassuiaataa aamma naammaginngilaa, Ritzau septembarip arfernani ilisimatitsivoq.

Qanoq sunniuteqarnissaa ilisimaneqanngitsoq

Naalagaaffiup timmisartut Challengerit atorunnaarlugit timmisartut attartukkat atulerpagit tamanna Kalaallit Nunaata nakkutigineqarneranut qanoq sunniuteqassanersoq apeqqutaalerpoq. Illersornissaqarfiup timmisartut Challengerit sisamat atorpai, taakkunannga pingasut Kalaallit Nunaata nakkutigineqarneranut atorneqarput. Timmisartut sisamat kingullersaat sungiusaanermut naalagaaffiullu timmisartuussineranut atorneqartarpoq

Taamaammat timmisartut alapernaarsuutit pingasut taakku naalagaaffimmi timmisartuussinermut akunnerit qassit atorneqartarnersut Sermitsiap Illersornissamut ministereqarfik apeqquteqarfigaa. Tamanna aggustip 20-ani pivoq – aaqqissuinerullu septembarip qulingani naammassinerani apeqqut suli akineqarsimanngilaq.

Timmisartunilli attartorneq Challenger-inut oqilisaataasinnaasoq qularutissaanngilaq. Timmisartut Aalborgimi timmisartoqarfimmi Air Transport Wing-imut atassuteqarput, ministerillu amerlanertigut Kastrupimit Roskildemilluunniit timmisartuussisarput. Taamaammat politikerit ataatsimiigiaqqusaasut ullumikkut timmisartuunneqaraangata Aalborgip illoqarfiillu pingaarnersaata akornanni timmisartoq ilaasoqarani tingikulavoq.

Timmisartoq Challenger atorlugu nunatta imartaa ukiup ingerlanerani ulloq unnuarlu nakkutigissallugu illersornissaqarfimmut unamminiarnartorujussuuvoq. Sakkutuut timmisartortartut timmisartumik Challenger-imik Kalaallit Nunaanni ataavartumik inissisimatitaqartussaasut 2021-mi isumaqatigiissutigineqaraluarpoq. 

Tatiginnikkunnaariartortut

Timmisartut Challengerit piffissami 2022-mi 1. aggustimiit 2023-mi juunip 23-anut aserfallatsaaliortariaqalernertik pissutigalugu ulluni 87-ini Kalaallit Nunaanni atorneqarsinnaasimanngitsut siorna Folketingimi illersornissamut ataatsimiititaliap naatsorsuinerata takutippaa.

- Issittumi nakkutilliinerulernissamik isumaqatigiissutit danskinit naammassineqarsinnaannginnerat Kalaallit Nunaata Danmarkillu akornanni tatiginnikkunnaariartornermik kinguneqarpoq, folketingimi ilaasortaq Aaja Chemnitz Sermitsiamut taamani saqqummertumut oqarpoq. (Sermitsiaq 2023/31 takuuk)

Illersornissamut ministerip Troels Lund Poulsenip unaammillernartut nassuerutigai.

- Challengerip atorneqarsinnaanera ukiuni kingullerni unammillernartoqarsimavoq atorneqarsinnaajunnaangajalerlunilu. Tamanna timmisartut atorneqarsinnaanerannik annikillisaanermik kinguneqarpoq, tamatumalu kingunerisaanik suliassat suliarineqartartut pingaarnersiussavagut, pingaartumik naalagaaffeqatigiinni pisussaaffigisatta naammassinissaat. Taamaammat naalagaaffiup timmisartuanut taarsiullugu allamik atorneqarsinnaasumik misissuiniarluta aalajangerpugut, illersornissamut ministeri Troels Lund Poulsen oqarpoq.

- Challengerip atorneqarsinnaaneranut ataavartumik aaqqiissutissap isumaqatiginninniutigineqarnissaasa tungaanut attartortitsineq atuuttussatut siunnersuutigineqarpoq.