Naaja: Kalaallit Nunaat nunarsuarmi avatangiisinik mingutsitsinikillisaanermut tapertaassaaq
MSP Forum-imi ilaasortatut aammalu aatsitassanik pisariaqartinneqarlutik piumaneqartunik nunatut avammut nioqquteqartartunngorsinnaasutut, Kalaallit Nunaat suleqatigiiffimmi immikkut inissisimalerpoq. Aatsitassanit pisariaqartinneqarlutik piumaneqartunit 50-iusunit 39-t, USA-mit suussusersineqarsimasut, Kalaallit Nunaanni nassaassaapput.
Asseq ataatsimeeqatigeeqqammersumeersoq. Aatsitassanut Naalakkersuisoq naapertorlugu aatsitassanut pisariaqartinneqarlutik piumaneqartunut nunani tamalaani aningaasarsiorfinni siunissami suliaqartutut pingaaruteqarsinnaasutut aammalu pilersuiffiusut aalajaatsuunissaannik qulakkeeriniarluni suliaqarnermi suleqatissatut tutsuiginartutut Kalaallit Nunaata inissisimanera, ataatsimeersuarnermi uppernarsineqarpoq.
Assiliisoq: Amerikamiut konsulatia Nuummi
- Ulloq 20. november Kalaallit Nunaat aatsitassanik pisariaqartinneqarlutik piumaneqartunik ineriartortitsinissaq ukkataralugu MSP Forum-imi nunani aamma MSP-imi aaqqissuussinermik ingerlatsisuusuni, siullersaasutut, oqaluttuarisaanermi inissisimalerpoq, taamak tusagassiuutitigut nalunaaruteqarluni allappoq Inuutissarsiornermut, Niuernermut, Aatsitassanut, Inatsisit
Atuutsinneqarnerannut Naligiisitaanermullu Naalakkersuisoq, Naaja H Nathanielsen (IA).
Nunat killiit aningaasaateqarluartut aamma naalagaaffiit tamat oqartussaaqataanerannik aallaavillit nunarsuarmi tamarmi, ulappupput mingutsitsinikillisaaneq aqqutigalugu avatangiisit illersorneqarnissaat siunertaralugu. Tassa pingaartumik nunani suliffissuaqarnikkut ingerlarsortuni kissaatigineqarpoq teknologiinut eqqiluittunut ikaarsaartoqassasoq.
Siunertaq pingaarneq tassaavoq nunat pineqartut mingutsitsinerup kingunerisaanik nunarsuup innarlerneqarsimaneranik iluarsiiniarnissaq, taamaaliornikkut gassinik nunarsuup illersuutaanik innarliisartunik aniatitsinerup unitsinniarneqarnissaa, taamatullu nunarsuup kiatsikkiartornerata kingunerisaanik silap pissusaanik ajunaarnersuaqartarneranik pinaveersaartitsinissaq.
Taamaattumik nunat killiit naalagaaffiillu suleqatigiit maanna imminnut ikioqatigiinniarput avatangiisit pillugit allannguinissamut. Tamanna nunat akorngini nunallu naalagaaffiillu akorngini suleqatigiinnerit aqqutigalugit pissasoq isumaqatigiissutaavoq.
Maannakkorpiaq nunat aningaasaateqarluartut, suliffissuaqarnikkut siuarsimasumik ingerlataqartut, pisariaqartitsipput aatsitassanik pingaarutilinnik (Nunat MSP-mik suliniummut ilaasortat) taakkulu peqatigalugit nunat aatsitassanik taakkuninnga pilersuisinnaasutut ilimagisat (nunat MSP Forum-imi ilaasortat) suleqatigiinnerat inerisarneqaleruttorpoq.
Tassanilu Kalaallit Nunaat pingaarutilimmik inissisimavoq, taamatullu USA-mi naalakkersuisut sinnerlugit Jose W. Fernandez nalunaarpoq Kalaallit Nunaat assut ikiorusukkitsik.
Aatsitassanit pisariaqartinneqarnerpaanit 50-iniit Kalaallit Nunaat 39-nik pilersuussinnaavoq
MSP Forum-imi ilaasortatut aammalu aatsitassanik pisariaqartinneqarlutik piumaneqartunik nunatut avammut nioqquteqartartunngorsinnaasutut, Kalaallit Nunaat suleqatigiiffimmi immikkut inissisimalerpoq.
Aatsitassanit pisariaqartinneqarlutik piumaneqartunit 50-iusunit 39-t, USA-mit suussusersineqarsimasut, Kalaallit Nunaanni nassaassaapput. Pissusiviusup taassuma aatsitassanik pisariaqartinneqarlutik piumaneqartunik nunarsuarmi pilersuiffiusuni aammalu mingutsitsinngitsumut allanngoriartortitsinermi periusissatigut suliaqartutut Kalaallit Nunaat pingaaruteqartunngortippaa.
Aatsitassarsiorfinnik ingerlatsinerup tunngavissinneratigut aammalu aatsitassanik pisariaqartinneqarlutik piumaneqartunik nunanut MSP-mi ilaasortaasunut avammut nioqquteqartarnikkut, nunarsuarmi mingutsitsinngitsumut allanngoriartortitsinermut tapersiinissaq, Naalakkersuisut aalajangiusimalluinnaraat, Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoq Naaja H. Nathanielsen erseqqissaavoq:
- Aatsitassanik pisariaqartinneqarlutik piumaneqartunik ineriartortitsineq nunarsuarmi ataatsimoorluni suliassatut Naalakkersuisuni isigaarput, tassanilu Kalaallit Nunaat aalajangiisuulluinnartumi inissisimalersinnaavoq. Aatsitassanut pisariaqartinneqarlutik piumaneqartunut nunani tamalaani aningaasarsiorfinni siunissami suliaqartutut pingaaruteqarsinnaasutut aammalu pilersuiffiusut aalajaatsuunissaannik qulakkeeriniarluni suliaqarnermi suleqatissatut tutsuiginartutut Kalaallit Nunaata inissisimanera, ataatsimeersuarnermi uppernarsineqarpoq.
- Taamaattoq taamatut inissisimanermi annertoorujussuarnik aningaasaliinissaq pisariaqarpoq. Taamaattumik Kalaallit Nunaanni aningaasaliinissamut nunani tamalaani soqutiginninnerup siuarsarnissaanik ukkatarinninnerput Naalakkersuisuni ingerlatiinnarparput,Naaja H. Nathanielsen erseqqissaavoq.
Naalakkersuisup piffissaq iluatsillugu aatsitassanut suliassaqarfiup iluani Kalaallit Nunaata periusissatigut nukittuffii anguniaqarumaneralu erseqqissarpai.
Ilaatigut 2025-2029-mut Namminersorlutik Oqartussat Aatsitassanut periusissiaa, akuerineqaruni, Kalaallit Nunaata aatsitassanik pisariaqartinneqarlutik piumaneqartunik nunat MSP-imi ilaasortat pilersornissaat suli annertunerusumik ukkataralugu Kalaallit Nunaata sulisinnaanera, qulakkeerneqartussaasoq oqaatigaa.
Ataatsimeersuarnerup Kalaallit Nunaat nunarsuarmi nunap assinganiilersippaa
Amerikami Nunanut allanut ministereqarfimmi aningaasaqarnikkut siuariartortitsinermut, nukissiuuteqarnermut avatangiisinullu amerikami atorfilittat, Jose W. Fernandez-ip sulisuisa, qaffasissumi inissisimasut, suliniuteqarnerisigut ataatsimeersuarneq piviusunngortinneqarpoq.
USA-p saniatigut Australien-imiit, Tuluit Nunaanniit aamma EU-Kommission-imiit peqataasoqarpoq. Tamatuma saniatigut namminersortut suliassaqarfiinit, aningaasaqarnermut sullissivinnit aallartitat aammalu Kalaallit Nunaanni ingerlatseqatigiiffiit pisinnaatitsissummik pigisaqartut arfineq pingasut ualikkut peqataapput, naalakkersuisoqarfimmit naggataatigut erseqqissaatigineqarpoq.
