JOSE W. FERNANDEZ
Silap pissusaa pillugu ajornartorsiornerup aaqqiiviginiarneqarnerani Kalaallit Nunaat pingaarutilimmik inissisimavoq
Nunarsuarmi inuiaqatigiinni amerlasuuni silap pissusaa pillugu ajornartorsiutip aaqqiiviginiarneqarneranut tunngatillugu USA-mi præsidentissap qanoq iliuuseqarnissaa immikkut eqqumaffigineqarpoq. Taamaattorli Biden/Harris aqutsineranni piffissaq atorluarneqarpoq nunarsuarmi mingutsitsinnginnerusumik ingerlasoqalernissaa qulakkeerniarlugu. Aningaasaqarnikkut ineriartorneq, nukissiuutit avatangiisillu pillugit nunanut allanut ministerip tullersortaa, Jose W. Fernandes, nunatsinnut tikeraaqqammertoq, naqissusiivoq nunarsuarmi silap pissusaa pillugu ajornartorsiutip aaqqiiviginiarneqarnerani Kalaallit Nunaat pingaarutilimmik inissisimasoq.
- Kalaallit Nunaat akisussaassusilimmik ingerlatsisuuvoq, silap pissusaata allanngoriartorneranik akiuiniarnermi aamma aatsitassarsiornermi sapinngisamik mingutsitsinngitsumik qallukkallu maangaannartinneqannginnissaanut tunngatillugu, taamaammat assut ikiuukkusuppugut aatsitassanik pisariaqartinneqaqisunik avammut tunisassiorlualernissaanut, Jose W. Fernandez oqarpoq.
Assiliisoq: Leiff Josefsen
Amerikamiut naalakkersuisui sinnerlugit Kalaallit Nunaannut tikeraaqqamertoq, Jose W. Fernandez, sunaaffa aamma qajartornermik nuannarisaqarluartuuvoq. Taannami oqaluttuarpoq Nuummut tikeraarnermini qajartornissaminik assut neriuuteqarsimagaluarluni taamaattorli periarfissaqarsimanani. Paarlattuanilli Sermitsiaq periarfissinneqarpoq Kalaallit Nunaata USA-llu ataqatigiinnerat pillugu oqaloqatigissallugu.
- Ataqatigiinnerput nukittuujuvoq, tamannalu aningaasaqarnikkut, ilinniartitaanikkut imaluunniit aatsitassarsiornermut suliaqarnikkut piinnarani, nunatut tamat oqartussaaqatigiinnerannik aallaavilittut naleqartitatsinnik avitseqatigaarput. Aamma Kalaallit Nunaat USA-lu nunatut sanileriittuuvugut, immitsinnullu nunatut sanileriittutut ajunngitsumik immitsinnut pissuseqarfigivugut, Jose W. Fernandez Sermitsiamut oqarpoq.
Silap allanngorneranut tunngatillugu Kalaallit Nunaat pingaarutilimmik inissisimavoq
Nunarsuarmi tamarmi aammalu nunat tamalaat akornanni silap pissusaa pillugu anguniakkat atuupput, taakkulu nunat qanittumik suleqatigiinnissaannut aalajangersimasumillu anguniagaqarnissamut pisussaaffiliipput.
Assersuutigalugu USA, Parisimik isumaqatigiissummut (januaarip 2021, red.) uteqqillunilu ilannguteqqinnerata kingorna, 2022-mi aasakkut silap pissusaa pillugu inatsisiliorsimavoq, tassanilu nunap 2030-mi silap pissusaa pillugu anguniagaq inatsisitigut sinaakkuserneqarpoq, tassalu mingutsitsinerup 40 procentimik annikillisinneqarnissaa USA-mit anguniarneqalerluni.
Tassunga ilanngullugu Parisimi isumaqatigiissummut peqataaleqqinnermigut, nunarsuarmi tamarmi suliniummut aamma peqataaleqqippoq, tassa 2050-mi mingutsitsinnginngitsumik tunngaveqalernissamik anguniagaqaqataaqqilerluni.
Taamaattoq anguniakkat taakku anguneqarsinnaassappata, pingaaruteqarpoq aatsitassanik mingutsitsinikillisaanermut pingaarutilinnik ataavartumik pilersorneqarnissaq:
Jose W. Fernandes-ip nunatsinni Naalakkersuisut aammalu Kalaallit Nunaanni aatsitassarsiornissamik akuersissuteqartuusut kiisalu inuussutissarsiuteqartut sinniissaat tikeraarnermini ataatsimeeqatigai, ilaatigut Kalaallit Nunaannut tapersersuinissamut periarfissat oqaluuseralugit, aatsitassarsiornermik tunisassiornermillu aallartitsinissaq siunertaralugu.
Assiliisoq: Amerikamiut aallartitaqarfiat Nuummiittoq
- Kalaallit Nunaat periarfissaqarluarpoq aatsitassanik taakkuninnga pingaarutilinnik, soorlu lithium, cobalt aamma aatsitassanik pingaarutilinnik allanik pilersuilernissaminut. Nunarsuarmi nunat ataasiakkaat pisariaqartitsineq kisimiillutik matussusersinnaanngilaat, nunallu ataasiakkaat kisiisa isumalluutigisinnaanngilagut. Anguniagaq angujumallugu suleqatigiinnissarput pisariaqarpoq, Jose. W. Fernandez naqissusiivoq.
Tassunga ilanngullugu Fernandezip oqaatigaa Kina aatsitassat pisariaqartinneqartut pingaarutillillu annersaannik aqutsisuusoq:
- Pilersuisinnaasut assigiinngitsut ineriartortinniarlugit sulivugut, Kinap ullumikkut aqutsisuunera kisiat pinngikkaluarlugu, kisianni pingaaruteqarpoq taakku aatsitassat pisariaqartinneqartut nunanit assigiinngisitaartunit pissarsiarineqarsinnaanissaat qulakkeerniarlugu, suleqatigiinnerup anersaavani anguniakkat naammassineqarsinnaanissaat pingaaruteqarmat.
- Taamak anguniagaqarnermi Kalaallit Nunaat pingaaruteqarpoq, Kalaallit Nunaat uagutsitut naalakkersuinikkut naleqartitaqarpoq, Kalaallit Nunaat akisussaassuseqartuuvoq, silap allanngoriartornerata ajornartorsiortitsineranut akiuiniarnermi sulineq eqqarsaatigalugu, kisianni aamma Kalaallit Nunaat mingutsitsineq annikillisinniarlugu aammalu atuilluartuunissamik pingaartitsisuummat, taamaattumik Kalaallit Nunaata aatsitassanik pingaarutilinnik pilersuiniarnerani ikiuukkusuttorujussuuvugut.
Qanimut suleqatigiinneq pingaarutilik
Fernandezip aallaqqaammut oqaatigisaa naapertorlugu, tassa aatsitassarsiorneq pissutaaginnanngilaq suleqatigiinnerup annertusiartornerani.
Jose W. Fernandes qilanaarpoq USA-p Kalaallit Nunaatalu akornanni aqqut piviusunngornissaanut:
- Siusinnerusukkut oqaatigereerpara, aatsitassat kisimik suleqatigiinnitsinnut qaninnerulersitsinngillat, Kalaallit Nunaannit sinniisut amerlasuut naapittarpakka, Naalakkersuisut aamma pisortat, inuusuttut kalaallit ilinniariarlutik USA-mut angalasartut, 2020-mi Nuummi aallartitaqarfik kingumut ammarparput, minnerunngitsumillu maanna USA-p Kalaallit Nunaatalu akornanni toqqaannartumik aqqut ammarneqarnissaa siunissatsinniippoq, tamanna qilanaarilluinnarpara, Antony Blinkenip aningaasaqarnikkut ineriartorneq, nukissiuuteqarneq avatangiisillu pillugit suleqataa qaninnerpaaq, Jose W. Fernandes Sermitsiamut oqarpoq.
