Nunanut allanut sillimaniarnermullu ataatsimiititaliap matoqqasumik siunersiuisoqareernerata kingorna, tassani nunanut allanut tunngasunut Naalakkersuisoq Vivian Motzfeldt (S) siunersioreerlugu, ataatsimiititaliap nalunaarutigaa oqaloqatigiinneq kissaatigisaraluartik piunngitsoq, tamannalu attanneqarsinnaanngitsoq.
Inatsisartuni ilaasortap, Pipaluk Lynge-p (IA), Sermitsiamut uppernarsarpaa, nunanut allanut tunngasunut Naalakkersuisoq Vivian Motzfeldt (S) aamma nunanut allanut ataatsimiititaliap, taamaalillunilu Inatsisartut, akornanni attaveqatigiinnikkut ajornartorsiuteqartoqartoq:
Nunanut allanut sillimaniarnermullu ataatsimiititaliap matoqqasumik siunersiuisoqareernerata kingorna, tassani nunanut allanut tunngasunut Naalakkersuisoq Vivian Motzfeldt (S) siunersioreerlugu, ataatsimiititaliap nalunaarutigaa oqaloqatigiinneq kissaatigisaraluartik piunngitsoq, tamannalu attanneqarsinnaanngitsoq.
Inatsisartuni ilaasortap, Pipaluk Lynge-p (IA), Sermitsiamut uppernarsarpaa, nunanut allanut tunngasunut Naalakkersuisoq Vivian Motzfeldt (S) aamma nunanut allanut ataatsimiititaliap, taamaalillunilu Inatsisartut, akornanni attaveqatigiinnikkut ajornartorsiuteqartoqartoq:
- Sivitsortumi piumasaralugulu kissaatigisaraluarparput nunanut allanut tunngasunut Naalakkersuisoq aalaakkaasumik oqaloqatigisarnissaa. Ataatsimiititaliamit apeqqutit amerlasuut saqqummiuppagut, tamatumalu saniatigut § 37 naapertorlugu Inatsisartuni ilaasortat apeqqutaat akineqanngitsut amerlasuut paamaarunneqarput akuutinneqarnissarpullu naammaginartumik pinngilaq, Pipaluk Lynge (IA) oqarpoq.
Taassuma erseqqissaatigaa, Sermitsiamit apeqqutinut akissutini ataatsimiititaliaq sinnerlugu akissutaanngitsut, taamaallaalli Inatsisartuni ilaasortatut aammalu ataatsimiititaliami ilaasortatut imminut sinnerluni akissuteqarluni.
- Oqaloqatigiinneq amigaataasoq tatigeqatigiinnermut ajoqutaavoq
Pipaluk Lynge oqaluttuarpoq oqaloqatigiinnerup amigaataanera sivisuumik ajornartorsiutaasoq, tamannalu isumaqartoq Naalakkersuisunit iliuuserineqartut aatsaat tusagassiuutitigut tusartaritsik:
- Oqaloqatigiinnerup amigaataanerata kingunerisaanik Nunanut allanut Sillimaniarnermullu Ataatsimiititaliap aatsaat tusagassiuutit aqqutigalugit ilisimatinneqartarpoq. Tamanna pivoq naak massa ilisimatinneqarnissatsinnik isummatsinnillu saqqummiusserusuttaraluartugut minnerunngitsumillu aamma paaseqatigiinneq tunngavigalugu Naalakkersuisunut pisinnaatitsissutinik tunniusserusuttaraluartugut, taamaalillunilu Kalaallit Nunaata nunanut allanut sillimaniarnermullu politikkia ataqatigiillunilu tutsuiginartuunissaa peqataaffigerusukkaluaripput.
- Tamanna iluatsinneq ajorpoq, taamaalilluta oqarsinnaavugut ataatsimiititaliaq ilisimateqqaarnagu nunarsuarmi pisunut assigiinngitsunut akuusarpoq.
- Kalaallit Nunaannut pingaaruteqartorujussuuvoq, pingaartumik ulluni makkunani, nunarsuarmioqatitsinnit nunatta Issittullu isiginiarneqartorujussuuffiisa nalaani, ataatsimoorussamik aallaaveqarnissarput. Pingaartumik aamma Naalakkersuisut iliuuserisaannut tapersersuisuullutalu tunuliaqutaanissarput kissaatigigaluarparput. Pisullu aatsaat pereeraangata tusagassiuutitigut tusagaqartarnerput ilungersunartorujussuuvoq isornarlunilu.
Tamanna tunngavigalugu kinguneqartitsisoqassava imaluunniit oqaloqatigiinneq uteqqinneqarpat naammaginnissavisi?
- Allat sinnerlugit oqaaseqarsinnaanngilanga, kisianni uanga eqqarsaatinni piffissami sivisuallaami naammagittarsimavugut. Taamaattumik tatigeqatigiilluni allorissaaqatigiinneq pissappat Naalakkersuisunut ilaasortamit malunnaatilimmik nassuerutiginnittoqartariaqarpoq.
Pipaluk Lynge innersuussivoq Naalakkersuisuni ilaasortat allat matoqqasumik aggersagaanissartik utaqqinagu namminneq iliuuseqarnermikkut ataatsimiititaliat susassaqartut, taamaalillunilu Inatsisartut, ataavartumik ilisimatittaraat, akuutittaraat oqaloqatigiinnerlu piusartoq.
- Assersuutigalugu Naaja H. Nathanielsen qiviaannarsinnaavarput. Taanna nammineq iliuuseqartarpoq ataatsimiititaliat naalakkersuisuuffimminut attuumassuteqartut aggersartarpai, taamaalillunilu ataavartumik ilisimatillugillu akuutittarpai. Tamannali nunanut allanut sillimaniarnermullu ataatsimiititaliamut atuutinngilaq.
- Soorunami ilisimavarput nunanut allanut tunngasutigut sulineq amerlanertigut nipangiussisimanermik imaqartariaqartoq, aammalu immikkut isiginiagassat arlaqartut. Kisianni tamanna isumaqanngilaq Naalakkersuisut ilaasortaatitaat kisimiilluni isummanilu kisiat malillugu suliassat Kalaallit Nunaannut pingaaruteqarluinnartut pillugit aalajangiisinnaasoq.
Amerikamiut ataatsimiinneri pillugit ilisimatinneqanngillat
Tusagassiortut kingullermik maluginiarpaat amerikamiut aallartitaata atorfilittallu Kalaallit Nunaannut tikeraarnerannut atatillugu ataatsimiinnerit matoqqasorujussuarmik ingerlanneqartut. Maannakkut paasinarsivoq tusagassiortut kisimik nalaatinngikkaat, aammali Nunanut allanut Sillimaniarnermullu Ataatsimiititaliaq peqataatinneqarsimanngitsoq:
- Tusagassiutit aqqutigalugit ilisimalerparput amerikamiut peqatigalugit oqaloqatigiinneq sivisuumik utaqqisaasimasoq maanna ingerlanneqartoq. Aammalu maanna ilisimavarput Kalaallit Nunaat, Danmarki USA-lu akornanni tatigeqatigiinneq iluarsiniarlugu Naalakkersuisuni sulissuteqartoqartoq. Kisianni tamanna tusagassiutitigut tusarparput, Naalakkersuisunilu ilaasortamit paasinngilarput. Tamannalu akuersaarneqarsinnaanngilaq. Inatsisartoqarpugut tassuunalu qulakkeerniarneqartarpoq naalakkersuinikkut attaveqaqatigiinnerup pissusissamisut ingerlanneqarnissaa.
- Kisianni aamma ajornakusoorpoq paasissallugu suna tatigeqatigiinneq iluarsiniarneqassanersoq, Naalakkersuisuni ilaasortap Inatsisartut ataqqinngippagit aammalu minnerpaamik isumaginngippagu Nunanut Allanut Sillimaniarnermullu Ataatsimiititaliap ilisimatinneqartarnissaa peqataatinneqarnissaalu, Pipaluk Lynge naggataatigut oqarpoq, taassumalu kingumut erseqqissaatigaa ataatsimiititaliamut siulittaasutut akinnginnami namminerli Inatsisartuni ilaasortatut ataatsimiititaliamilu ilaasortatut apeqqutinut akilluni.
Naggaterpiaatigullu aamma Pipaluk Lyngep Naalakkersuisuni ilaasortaq isornartorsiorpaa sulinermi nunatsinni kommunit borgmesterii aamma akuutinneqanngimmata, taamaallaalli Kommuneqarfik Sermersuup borgmesteria kimigiisernermi kingorna aatsaat akuutinneqalersimammat:
- Allanngortoqartussaavoq illersornissaq pillugu Naalakkersuisut Danmarkimik isumaqatigiissuteqarnerat tunngavigalugu, allannguinerillu tamakku aamma nunatsinni kommuninut arlalinnut sunniuteqartussaapput, assullu isornarpoq Naalakkersuisuni ilaasortap illersornissap tungaatigut allannguutissat pillugit isumagisimanngimmagu aamma kommunit borgmesterii suliat pilersaarutillu pillugit ilisimatittarlugillu peqataatinngimmagit.
Naalakkersuisuni ilaasortaq Vivian Motzfeldt (S) oqaaseqartinniarlugu Sermitsiamit sulissutigaarput.
