Ataatsimiititaliaq siunersioqatigeereernermi: Naalakkersuisumik suleqateqarniarneq kipiluttunartutut taaneqartoq

Nunanut allanut ilisimatusarnermullu naalakkersuisoq, Vivian Motzfeldt (S), Nunanut Allanut Sillimaniarnermullu Ataatsimiititaliamit matoqqasumik siunersioqatigineqarnissamut qaaqquneqarsimasoq, Sermitsiami sapaatip-akunnerani matumani allaaserineqarpoq.

Siunersioqatigiinnermi suna pineqarnersoq ataatsimiititaliamit maanna saqqummiunneqarpoq. Ataatsimiititaliaq naapertorlugu siunersioqatigiinneq pingasunngormat pivoq, ajornartorsiutillu arlallit tunngavigalugit naalakkersuisoq aggersarneqarsimalluni:

- Tamatumunnga (siunersiuinermut, aaqq.) peqqutaanerpaajulluni Inatsisartuni ilaasortat § 37 aqqutigalugu apeqqutaat arlallit aammalu ataatsimiititaliap allakkatigut apeqqutai qaammatini arlalinni saaffiginnissutai akineqarneq ajornerat.

- Taamatuttaarlu borgmesterit ilaannaanik akuutitsilluni illersornissamut isumaqatigiissut pillugu oqaloqateqarsimanera ataatsimiititaliami amerlanerussuteqartut ilungersornartutut isumaqarfigimmassuk, ataatsimiititaliaq Inatsisartut nittartagaanni allappoq. 

AAMMA ATUARUK

Qaammatit arlallit qaangiuttullu: Naalakkersuisoq Nato-mi ataatsimeersuarnermut tunngasunut apeqqutinik akissuteqarpoq

Kipiluttunarlunilu ilungersunartoq

Ataatsimiititaliami ilaasortat amerlanerussuteqartut naalakkersuisumik suleqateqarneq kipiluttunaraat, tamannalu Inatsisartut sulineranni ilungersunartutut taaneqarluni.

Ataatsimiititaliaq siunissami suleqatigiinnissamut tunngatillugu ima naggasiivoq:

- Ilaasortat naatsorsuutigaat Naalakkersuisup susassaqartup Inatsisartuni ataatsimiititaliaq qaninnerpaamik suleqatissaraluani aammalu Inatsisartut suleriaatsimi § 14 imm. 3 tunngavigalugu Naalakkersuisoq suleriaqqissasoq.

- Ataatsimiititaliap kissaatigivaa suliassanut paasissutissat ataavartumik ingerlanneqartarnissaat.

Kalaallit Nunaata nunanut allanut tunngasutigut politikkia qinersinerup kingorna sammineqangaatsiarpoq. Amerikamiut Kalaallit Nunaannik piginnittunngorusullutillu aqutsilerusunnerat kiisalu danskit Kalaallit Nunaanni illersornissamut tunngatillugu annertusaanissamut aningaasarpassuarnik atuiniarneranni isumaqatigiinniarnermi ilaatigut pissutigalugit. Isumaqatiginninniarnerni Vivian Motzfeldt pingaarutilimmik inissisimaffeqarpoq.