Qaammatit arlallit qaangiuttullu: Naalakkersuisoq Nato-mi ataatsimeersuarnermut tunngasunut apeqqutinik akissuteqarpoq

Nunanut allanut tunngasunut naalakkersuisumut Vivian Motzfeldtimut (S) paragraf 37 naapertorlugu apeqqutit arlallit qanittukkut akissuteqarfigineqariasaarput. Apeqqutit qaammatini arlalinni akissuteqarfigineqanngikkaluarput.

Pele Brobergip juunip 30-ani apeqquteqaateqarnera, Mariane Paviasenip (IA) apriilip 23-ani apeqquteqaateqarnera Pipaluk Lyngellu (IA) aggustip 13-ani apeqquteqaateqarnera pineqarput. Apeqqutit akineqarnissaannut piffissaliussaq qaangerujussuarneqaqqavoq, tassami §37 naapertorlugu apeqqutit nalinginnaasumik ullut suliffiusut qulit ingerlaneranni akineqartussaatitaasaraluarput.

Aamma Sermitsiap tusarfinnit arlalinnit Inatsisartut Nunanut allanut Sillimaniarnermullu Ataatsimiititaliaata naalakkersuisoq sapaatip-akunnerani matumani isumasioqatigiumallugu qaaqqusimagaa paasivaa.

Ataatsimiititaliami suliamik aalajangersimasumik suliarinninneq naammagisimaarneqanngikkaangat isumasioqatigiinnissamut qaaqqusisoqakkajuttarpoq, isumasioqatigiinnerilli matoqqasarlutil. Taamaammat isumasioqatigiinnermi suut eqqartorneqarsimanersut, apeqqutinut akiniaasaarnerup isumasioqartigiinnerlu imminnut ataqatigiinnerannut paasissutissat tamanut saqqummiunneqarsinnaanerat killeqarpoq.

Nato-mi ataatsimeersuarnermi Kalaallit Nunaat sooq peqataanngila?

§37 naapertorlugu apeqqutit maanna akineqartut ilaat tassaavoq, Inatsisartunut ilaasortap Pele Brobergip (N) Naalakkersuisut Haagimi Nato-p ataatsimeersuarneranut sooq peqataannginnersut pillugu juunip naanerani apeqqutaa.

AAMMA ATUARUK

Broberg akissutissamik ujaasivoq: Naalakkersuisut Nato-mi ataatsimeersuarnermi sooq peqataanngillat?

Danmarkip, USA-p nunalluunniit allat Naalakkersuisut peqataaqqunagit kajumissaarsimaneraat politikerip ilaatigut paaserusuppaa.

Nunanut allanut naalakkersuisup Vivian Motzfeldtip (S) akissutaa decembarip pingajuanni ullulerneqarsimavoq, qaammatinilu tallimani akissuteqarnissamut eqqarsartoqarsimalluni. Kalaallit Nunaatalu sooq peqataannginneranut akissut ajornaatsunnguuvoq.

- NATO-mi qullersat 2025-mi Haagimi ataatsimiinneranni Naalakkersuisut peqataanissamut qaaqqusissummik tigusaqanngillat. Ministeriunerup Mette Frederiksenip, nunanut allanut tunnasunut ministerip Lars Løkke Rasmussenip illersornissamullu ministerip Troels Lund Poulsenip Kunngeqarfik Danmark sinnerlugu politikikkut NATO-mi qullersat ataatsimiinneranni peqataapput, Vivian Motzfeldt allappoq.

USA-p ataatsimeeqatiginissaa neriuutigineqartoq

USA-p nunanut allanut ministeria Marco Rubio ataatsimeeqataassammat Kalaallit Nunaanniit USA-miillu nunami attuumassuteqanngitsumi naapeqatigiinnissaq naalakkersuisup neriuutigalugu Nato-mi ataatsimeersuarnissaq sioqqullugu oqaatigigaluarpaa.

Naalakkersuisullu ullorsiutai pissutaallutik peqataanissaa taamaatinneqarpoq, pisortatigoortumilli ullorsiutaani pilersaarutinik takussaasoqanngimmat Pele Brobergip sooq taassuma peqataasinnaannginnera apeqqutigaa:

Vivian Motzfeldt tassunga ima akivoq:

- Pisortatigoortumik pilersaarutip iluani issittumi iligiit politikikkut ataatsimeeqatigiinnissaannik periarfissaq misissorneqarpoq, illuatungeriilli piffissatigut unammillerneqartoqartitsinerat pissutigalugu tamanna pisinnaanngitsoq paasineqarsivoq.

USA-p præsidentiata Donald Trumpip Kalaallit Nunaata Amerikamit pigineqalerlunilu aqunneqalernissaa pillugit ukiup upernaallu ingerlanerani oqariartuuteqaqattaarnera pissutigalugu Kalaallit Nunaat taamani oqallisaasorujussuuvoq.

Pele Brobergip NATO-p ataatsimeersuarnerani qallunaat ministeriisa Kalaallit Nunaat eqqartorneraat aamma apeqqutigaa.

Vivian Motzfeldt naalakkersuisut paasissutissanik tamakkuninnga tunineqarsimanngitsut akivoq.

Sermitsiap Vivian Motzfeldt suliamut atatillugu itinerusumik oqaaseqartinnissaa sulissutigaa.