Naalakkersuisut nutaamik Innarluutillit illersuisuissarsiorput
Namminersorlutik Oqartussat Innarluutillit Illersuisuannik, innarluutilinnut tunngasunik soqutigisaqarluartumik, inuit innarluutillit pisinnaatitaaffiinik atugarissaarnissaannillu siuarsaaqataasussamik, ujaasipput.
Leiff Josefsen
Naalakkersuisut nittartagaanni takuneqarsinnaavoq, Naalakkersuisut nutaamik Innarluutillit Illersuisuannik ujaasisut.
Innarluutilinnut illersuisoqarfimmi Tilioq-mi siuttuusussamik, inuiaqatigiinni allannguisussamik ujaasisoqarpoq. Innarluutillit illersuisuat Sisimiuniittumi inuit innarluutillit pisinnaatitaaffiinik atugarisaannik suliniuteqarnermi pingaarutilimmik inissisimaffeqarpoq.
Tilioq 2018-ip aallartinnerani pilersinneqarpoq atoqqaartinneqarlunilu. Innarluutillit Illersuisuat nunatsinni inuit innarluutillit pisinnaatitaaffiinik inuuniarnerminnilu atugarisaannik siuarsaanissamik siunertaqarpoq.
Maanna Innarluutillit Illersuisuattut atuuffeqartoq, Anja Hynne Nielsen 2021-imi ukiup affaa innarluutilinnut illersuisoqanngereersorlu atorfinitsinneqarpoq.
Innarluutillit illersuisuattut siunnersortaaneq ukiut aalajangersimasut malillugit atorfiuvoq ukiuni 3-ni atorfeqarfiusussaq, ukiuni pingasuni ingerlaqqinnissamut toqqaqqinneqarnissamut periarfissaqarluni.
Sermitsiaq Innarluutillit illersuisuannut Anja Hynne Nielsenimut attaveqarpoq, paaserusullugu innarluutillit illersuisuattut ingerlaqqikkusulluni qinnuteqaqqinniarnersoq, taassuma qinnuteqaqqissamaarnini oqaatigaa.
Novembarip ulluisa 13-anni, 2024-imi qinnuteqarfissaq kingulliuvoq.
