Nakuuserfigineqarsimasoq Islandimukaanneqartoq
Angut qaratsamigut aanaartoorsimasoq ajunngitsoq navianartorsiortorli Islandimut timmisartuunneqarpoq. Angut nakuuserfigineqarsimavoq, nakuusernerulli qaratsakkullu aanaartoornerup imminnut attuumassuteqarnerat politiit uppernarsarsinnaanngilaat.
Assiliisoq: Leiff Josefsen
Aasianni nakuusertoqarsimaneranut atatillugu suliami pissutsit ilungersunarnerulersimasut, Kalaallit Nunaanni Politiit pigaartuisa pisortaat Carl Sværd oqaluttuarpoq.
Aggustip 17-ianni illoqarfimmi imerniartarfiup silataani nakuuserneq taanna pivoq.
Angut pinerlineqartoq nammineq politiinut nalunaaruteqanngilaq, kollegiaminulli angerlarsimavoq. Tamatuma kingorna eqqumiitsumik pissusilersulersimavoq, aallaqqaammullu isumaqartoqarpoq ikiaroornartumik sunnerneqarsimassasoq, sakkortoorujussuarmimmi pissusilersormat.
Taava sinilerpoq itersarneqarsinnaananilu, Carl Sværd oqaluttuarpoq.
Qaratsamigut aanaartoorsimanera skannertinnerani paasinarsivoq
Tamatuma kingorna angut Nuummi napparsimmaviliaanneqarpoq, tassanilu qaratsamigut aanaartorsimasoq paasineqarpoq.
Tamatuma kingorna Islandimut nuunneqarpoq, tassanilu suliaritereerluni ajunngitsoq navianartorsiortorli nalunaarutigineqarpoq.
Tamatuma kingorna Aasianni imerniartarfiup silataani aggustip 17-ianni qanoq pisoqarsimanersoq politiit paasiniarpaat.
Takunnittut videomillu nakkutilliineq aqqutigalugit pasineqartoq nassaarineqarpoq tigusarineqarlunilu. Nakuusernerup angutip qaratsamigut aanaartoorsimaneranik kinguneqarnera politiit ingerlaannaq uppernarsarsinnaanngilaat, Carl Sværd oqaluttuarpoq.
Taamaattumik unnerluussineq ima sakkortutiginngilaq pasisap tigummigallarneqarnissaanut pissutissaqarani. Pasisarli nakuusersimasutut unnerluutigineqarpoq.
