Nalunaarasuartaateqarnermi Aqutsisut iliuusaat Inu:IT-p uggorai
Suliffeqarfimmik politiinut nalunaarutiginninnissamik aammalu attaveqaqatigiinnermut kiffartuussinissamik neqerooruteqarsinnaanermut akuersissummik atorunnaarsitsinissamik Nalunaarasuartaateqarnermi Aqutsisut siorasaarisimanerat, suliarlu pillugu tusagassiorfinnut saaffiginnissimanerat Martin Gjødvadip, Inu:IT-mik piginnittup, uggoraa. Maanna suliaq Nalunaarasuartaateqarnermi Aqutsisut unitsippaat politiinullu nalunaarutiginninnertik tunuartillugu.
Nalunaarasuartaateqarnermi Aqutsisut Inu:IT-mik politiinut nalunaarutiginnissimanerat pisariaqarsimanngitsoq Martin Gjødvad isumaqarpoq. Nalunaarutiginninneq maanna tunuartinneqarpoq.
Nammineq assilisaq
- Qangatut susoqarnersoq oqaloqatigiittoqassaarsimanerluni, Martin Gjødvad aperivoq.
- Telefonitta normui nittartakkatsinni allassimapput, soorluttaaq aamma e-mailivut allassimasut. Ilimagisat tunngavigalugit suliamik isumaginninnginnermi Nalunaarasuartaateqarnermi Aqutsisut attavigisimasinnaagaluarpaatigut, tamannalu uggornaqaaq, Martin Gjødvad Sermitsiamut oqarpoq.
Kingornali Nalunaarasuartaateqarnermi Aqutsisut oqaloqatigilluarneqarsimasut Martin Gjødvad erseqqissaavoq, “pingaartumik siunissami pisut qanoq isumagineqartarnissaat pillugu, tamannalu siuariarnertut pitsaasutut isigineqarpoq”.
Tasiilami napparsimmavik napparsimasunut nalunaarsuiffimmut atortorissaarummut iluameersumik isersinnaanissaannut, taamaalillutillu napparsimmaviit qitiusumik qarasaasiatigut atortorissaarutaanut Nuummiittunut Starlink aqqutigalugu attaveqarsinnaanissaannut, suliffeqarfiup Peqqinnissaqarfimmik ikiuisimanera pillugu aalajangiisoqarnissaanut ukiup affangajaa Inu:IT utaqqivoq.
Qarasaasialerinermik suliffeqarfiup piffissalerneqarneranut sanilliullugu suliamik isumaginninneq tamanna sivisoorujussuuvoq.
Ullut 15-it piffissalerneqartut
- Suliaq pillugu nassuiaateqarnissatsinnut sivikitsuararsuarmik piffissalerneqarpugut - ullut 15-it. Taamaaleriarlutik namminneq ukiup affaa utaqqisitsipput. Tamanna naapertuilluanngissoraara, pingaartumik suliap uagutsinnut kingunerisinnaasai eqqarsaatigalugit, Martin Gjødvad oqarpoq, eqqartuussissuserisulli avataaneersup inatsisitigut oqaaseqaataa Nalunaarasuartaateqarnermi Aqutsisut akisussaaffiginngisaannik suliamik suliarinninnermik sivitsorsaataasimasoq taassuma nassuerutigaa.
Peqqinnissaqarfiulli Tasiilami qarasaasiatigut ajornartorsiutaanut iluarsiinissamik Tusassimik suleqateqarneq kingorna ingerlalluarsimasoq, Martin Gjødvadip nuannaarutigaa.
- Tasiilami OneWeb atorlugu Tusass misiliinissamik akuersivoq. Tamanna ingerlalluarpoq, ajoraluartumilli Tusassip Tasiilamilu Peqqinnissaqarfiup akornanni kabelit ajorpallaarsimapput. Napparsimmavimmili ajornartorsiutit aaqqinniarlugit Tusass iliuuseqarsimaqaaq, illoqarfimmili kabelit pisoqaavallaat pissutigalugit tamanna iluatsippallaanngilaq, Martin Gjødvad nassuiaavoq.
Starlink antennemik ikkussinissamik Nalunaarasuartaateqarnermi Aqutsisunut akuersissummik qinnuteqarnissamik Peqqinnissaqarfimmut taanna siunnersuuteqarpoq, Tasiilami aaqqiissutissamik atajuartussamik nassaartoqarnissaata tungaanut.
Ajornartorsiutit aaqqinneqassapput
- Teknologii taamaattoq periarfissaatillugu Nalunaarasuartaateqarnermi Aqutsisut akuersissummik tunniussinissaat neriuutigaara, qarasaasiatigummi ajornartorsiutaat aaqqinneqarniassammata. Soorunami qaammataasanut attaveqarnermut Peqqinnissaqarfik suli akiliisassaaq, taamaalilluni Tusass isertitanik iluanaarutinillu piginnittup nuannaarutigisaanik annaasaqannginniassammat, Inu:IT-mik piginnittoq oqarpoq.
