Nalunaarasuartaateqarnermi Aqutsisut qaammataasatigut attaveqarneq iluatsinngitsoorpaat
Tusassip attaveqaqatigiinnermi kisermaassisinnaanera illersorniarlugu Nalunaarasuartaateqarnermi Aqutsisut iliuuseqapallassimanerat, Tasiilami suliami immikkut ittumi, Aqutsisut iluatsitsinngitsoornerattut oqaatigineqarsinnaavoq.
Nunat allat qaammataasatigut attaveqaataannik ingammillu Starlinkip antennenik unioqqutitsilluni atuinermik unitsitsinissamik, februaarimi Nalunaarasuartaateqarnermi Aqutsisut nalunaaruteqarput.
Nalunaarasuartaateqarnermi Aqutsisut qaammatit arfinilingajaat matuma siorna oqarnerat naapertorlugu Tusassip attaveqaqatigiinnermik kiffartuussinermillu neqerooruteqarsinnaanermut kisermaassisussaatitaanera Inu:IT A/S-ip "Starlinkimut antennelersimanikkut aamma Starlink aqqutigalugu nalunaarasuartaatitigut kiffartuussinernik tuniniaaqqissimanikkut" unioqqutikkaa isumaqartoqarmat, Nalunaarasuartaateqarnermi Aqutsisut politiinut nalunaarutiginnipput.
Suliaq ilungersunartoq
Aammattaaq attaveqaqatigiinnermut kiffartuussinissamik neqerooruteqarsinnaanermut akuersissummik atorunnaarsitsinissaq Nalunaarasuartaateqarnermi Aqutsisut isumaliutigaat, tamannalu qarasaasiatigut sullissinermik ingerlatsisumut ilungersunarpoq.
Peqqinnissaqarfimmik, Tasiilami elektroniskimik napparsimasut nalunaarsorneqarnerannut unammilligassaqangaartumik, 2023-mi ukiakkut ikiuiniarluni aalajangerneq ajunngitsumik isumaqarluni iliuusaanerusoq, Inu:IT A/S-ip siulersuisuini siulittaasoq piginnittorlu Martin Gjødvad Sermitsiamut nassuiaavoq.
- Iluatsinngitsumik ileqqussat malillugit peqqinnissaqarfiup ajornartorsiut aaqqinniarsaraa. Taamaattumik peqqinnissaqarfimmi atortunut pingaarutilinnut isersinnaanerup misilinnissaanut, Inu:it suleqatigalugu Tasiilami Nuummilu napparsimmaviit akornanni StarLink aqqutigalugu VPN-tunnelimik misiliummik pilersitsisoqarpoq. Misiliutitut suliniutigineqarsimasoq aaqqiissutissaalluarsimavoq. Misiliutitut suliniutigineqarsimasoq maanna naammassivoq, atortullu piiarneqareerput, Martin Gjødvad apriilimi Sermitsiamut paasissutissiivoq.
Tunngavissaqanngitsut
Qarasaasialerinermik ingerlatsivik ullut 15-it ingerlaneranni nassuiaateqaqqullugu periarfissinneqarpoq, maannalu qaammatit tallimangajaat qaangiuttut Nalunaarasuartaateqarnermi Aqutsisut inatsisilerituui isumaqarluinnarput qarasaasialerinermik ingerlatsiviup attaveqaqatigiinnermut kiffartuussinissamik neqerooruteqarsinnaaneranut akuersissummik utertitsinissaminnik sioorasaarinissamut tunngavissaqarnatik.
- Pissutsit piviusut inatsisinut tunngassuteqartut misissoreerlugit, Inu:IT A/S-ip attaveqaqatigiinnermut kiffartuussinissamut akuersissutaanik atorunnaarsitsinissatsinnut tunngavissaqarnata Nalunaarasuartaateqarnermi Aqutsisuni isumaqarpugut, Nalunaarasuartaateqarnermi Aqutsisuni pisortaq Kasper Juul-Nielsen Martin Gjødvadimut, Inu:IT-meersumut, paasissutissiivoq.
Aqutsisoqarfimmi pisortaq nangilluni allappoq:
- Inu:IT A/S-ip attaveqaqatigiinnermut kiffartuussinissamik neqerooruteqarsinnaatitaaneranik atorunnaarsitsinissamut pilersaarutip saniatigut, attaveqaqatigiinnermut atortunik, illoqarfiit nunaqarfiillu nunallu allamiut akornanni elektroniskimik attaveqarnermik periarfissiisunik, ikkussuinissamut ingerlatsinissamullu Namminersorlutik Oqartussat kisermaassisinnaatitaanerannik Inu:IT A/S-ip unioqqutitsinera pillugu Nalunaarasuartaateqarnermi Aqutsisut politiinut unnerluutiginnipput.
- Nalunaarasuartaateqarnermi Aqutsisut suliami piviusut naliliiffiginerisigut Kalaallit Nunaanni Politiit saaffigisimavaat Inu:IT A/S-imut politiinut nalunaaruteqarneq tunuartinneqassasoq.
Nalunaarasuartaateqarnermi Aqutsisut allamik isumaqalerneranut tunngavittut ilaatigut allassimavoq “Inu:IT A/S-ip Starlink-antenne piginaguluunniit ingerlatinngikkaa, aamma Kalaallit Nunaanni peqqinnissaqarfik Starlink-imi internettimik atuinissamut akiliuteqartinngikkaa”.
Ikiorneqarneq
- Starlink antennemik ikkussuineq ingerlatsinerlu Kalaallit Nunaanni Peqqinnissaqarfimmit Inu:IT A/S-imit ikiorneqarnikkut suliarineqartoq, Nalunaarasuartaateqarnermi Aqutsisut naliliipput. Kalaallit Nunaanni peqqinnissaqarfiup soqutigisaanik isumaginninnissaq siunertaralugu Tusass A/S-illu internetimut aaqqiissutaa Kalaallit Nunaanni peqqinnissaqarfimmut neqeroorutigisaanut taarsiullugu allamik periarfissaqarnersoq misileraanikkut misissorniarlugu Starlink-antenne ikkunneqarpoq atorneqarlunilu.
- Kalaallit Nunaanni Peqqinnissaqarfik nammineq atugassaminik attaveqaqatigiinnermut atortunik ikkussuisoq nalilerneqarpoq. Starlink antennip Kalaallit Nunaanni Peqqinnissaqarfiup pigisaani peqqinnissaqarfimmillu pissuteqartumik inissinneqarnera matumani maluginiarneqarpoq. Starlink-antenne imaluunniit Starlink-imut atuisinnaatitaaneq Kalaallit Nunaanni peqqinnissaqarfimmut atugassatut Inu:IT A/S-ip tunniussimanngikkaa aamma maluginiarneqarpoq. Kiisalu Martin Gjødvad (imaluunniit Inu:IT A/S) Starlink-antennemik Starlink-imulluunniit atuisinnaatitaanermik atuinermut akiliuteqartitsisimannginnera maluginiarneqarpoq.
