Nunap immikkoortuani nakorsaaneq Tusassimut: - Ajortumit ajorneruvoq

- Internetip sukkassusia naammaginanngitsoq Tasiilami innuttaasut sivisuallaamik atortariaqarsimasaat Inu:it-ip aaqqiissutissaqartikkaa sooq Tusassip akueriumanngilaa, nakorsaq Hans Chr. Florian Sørensen aperivoq.

Tusassip kisermaassisussaaneranik Inu:it unioqqutitsimmat Nalunaarasuartaateqarneqarnermut Aqutsisut qanittukkut politiinut nalunaarutiginninniarlutik aalajangerput, taakku suliniummik misiliuteqarnermi StarLink atorlugu qaammataasatigut Tunumi attavimmik pilersitsimmata.

Telestyrelsen politianmelder Nuuk-virksomhed

Nakorsap misigisai

Nunap immikkoortuani nakorsap ukiuunerani misigisani oqaluttuarai:

- Ukioq manna tupaallannartumik Tasiilami napparsimmavimmi StarLink ikkupparput. Naqitanik allakkanillu takusimanngilara, teknikerilli marluk ikkuppaat. Aqaguani ajornartorsiuteqarani ingerlalluarpoq. “Cosmic (nunatsinni nakorsaatitigut nalunaarsuivik) atuarsinnaaleratsigu eqqarsarpunga Aesculap-itoqqap atortuarnissaanut tunngavilersuutivut maanna atorunnaarsimasut.

- Attavigingaarmat – attaveerunnertaqanngimmat piffissat nutaat MAANNA allartittut misigisimavunga.

- Kisianni StarLinkip inatsisitigut ajornartorsiornera aallartippoq. Ullut marluk qaangiuttut attavipput Tusassimut utertinneqarpoq.

- Taamanili ajornermit ajorneruleqqavoq. Piffissarujussuaq internetimut attavilunnermut atortarparput, pitsaanerusumillu aaqqiisoqarsinnaanera ilisimatillugu tamanna kamannartorujussuuvoq.

Politiinut nalunaarutiginninneq ”naleqqutinngitsoq”

Nalunaarasuartaateqarneqarnermut Aqutsisut Inu:it pillugu politiinut nalunaarutaa silatusaarnerunngitsoq, Hans Chr. Florian Sørensen isumaqarpoq, tassami ”Tasiilami maani StarLinkimik atuisoqartoq naluneqanngimmat, taakku pitsaasumik sukkassusilimmik internetimik atuillutillu aallertarmata”.

Tusassip kisermaassilluni ingerlatsinera illersorneqartariaqarnera nunap immikkoortuani nakorsap paasisinnaavaa, namminersorlutik oqartussat suliffeqarfiutaat nunaqarfinnut isorliunerusunut akisuumik pisussaaffeqarmat.

- Tusassilli 2022-mi 140 millionit koruuninik sinneqartoornera eqarsarnarpoq, taanna oqarpoq.

- Tamanna Tasiilamiittunut iluaqutaanngilaq. Internet sukkavallaanngilaq akisulluinnarlunilu. Angerlarsimaffimmi mailimik atuisinnaanngilagut qaammammut 499 koruuninik akiliigaluarluta. Mobilikkut attaveqaat atorneqarsinnaavoq, taamaallaalli atorsinnaasap nungunnissaata tungaanut, taanna oqarpoq.

Iluamik kiffartuussineq

Tusassip isorliunerusunut atuisunut pilersuinermik isumannaatsuutitsisussaanini pissutigalugu iluaquserneqartussaanera, taassuma paasisinnaavaa.

Inu:it om politianmeldelse: - Vi handlede i god tro

- Tamannali Tusassip kiffartuussilluarnissaanut aporfiusariaqanngilaq.Tusassimit tusakkavut kingulliit tassaapput Tasiilami sukkanerusumik akikinnerusumillu internetimik neqerooruteqalertoq, tamannali upperineqanngilaq. Tusass arlaleriarluni taama neriorsuuteqartarsimavoq, naammaginartumilli naammassineqarsimanngisaannarpoq, Hans Chr. Florian Sørensen oqarpoq.

Kingullermik apriilip 23-anni internetimut attaveqarnini ajorsimasoq nassuiaavoq — naak aallarteqqikkaluarlugu — mobilikkut e-mailinik nassiussisariaqarsimalluni.

Inu:it aamma StarLink atuisunut iluaqutaasumik aaqqiissutissaqarlutik uppernarsaasimasut Tusassip oqaloqatigissagai, Hans Chr. Florian Sørensenip sakkortuumik kaammattuutigaa.