Nalunaarasuartaateqarnermi Aqutsisut: Taamaattumik Starlink pillugu suliaq sivisuvoq
Qarasaasialerinermik ingerlatsivik Tasiilami napparsimmaviup qaammataasatigut attaveqaat Starlink aqqutigalugu sukkasuumik interneteqalernissaanut ikiuinermigut unioqqutitsisimanngitsoq qaammatit arfinilingajaat utaqqisitsisimaneq, Nalunaarasuartaateqarnermi Aqutsisut Inu:IT-mut ajuusaarutigaat.
Qaammataasanut tunngasut ukiuni kingullerni teknikkikkut siuariartupiloorsimapput, inatsisillu pisoqaavallaartut Nalunaarasuartaateqarnermi Aqutsisunut unammillernarput.
Tele-Post / SES Networks
Inatsisit pisoqaavallaartut aamma qaammataasanut tunngasunik teknologiip ineriartornera pissutigalugit Inu:IT Tasiilami peqqinnissaqarfimmik Starlink-antenne-mik ikiuinermini unioqqutitsisimanersoq, qaammatini arlalinni Nalunaarasuartaateqarnermi Aqutsisut paasiniartariaqarsimavaat.
- Suliaq taanna suliani taamaattuni siulliuvoq, inatsisinullu 2000-kkut aallartinneranni atuuttunit aallaaveqartut tunngavigalugit suliaq nalileqqaartariaqarsimavoq, ilaatigullu attaveqaatinik pilersitsinissaq teknikkikkut ajornakusoortuullunilu akisuujuneranik inatsit tunngaveqarpoq. Inatsisini qaammataasanut tunngasuni ukiuni kingullerni teknologiip ineriartornera eqqarsaatigineqarsimanngilaq, tamannalu suliap sivisuallaarneranut pissutaavoq, attaveqaqatigiinnermut aqutsisuni pisortaq Kasper Juul-Nielsen Sermitsiamut oqarpoq.
Suliat sukkanerusumik suliarineqartalissapput
„Siunissami suliat assingusut sukkanerusumik aalajangiiffigineqartalernissaat“ Aqutsisut pisortaata naatsorsuutigaa, inatsisitigut nassuiaatit isumaliutersuutillu Inu:IT-mut suliamut atatillugu malittaasut maannakkut piareersimaffigineruleramikkit.
Inu:IT-mut suliami suliat marluusimasut Kasper Juul-Nielsen nassuiaavoq:
Politiinut nalunaaruteqarnermut tunngatillugu sooq qarasaasialerinermik ingerlatsivik Nalunaarasuartaateqarnermi Aqutsisut attaveqarfigiinnarsimannginneraat Inu:IT-mik piginnittup Martin Gjødvad paasiuminaatsippaa, taarsiullugumi suliami suut iluaqutaanersut ajoqutaanersulluunniit paasiniarlugu oqaloqatigiittoqarsimasinnaagaluarmat, politiinut nalunaaruteqanngikkaluarluni.
- Inatsimmik unioqqutitsisoqarneranik Nalunaarasuartaateqarnermut Aqutsisut pasitsaassippata, inatsimmi iliuuseqarnissamut periarfissat eqqarsaatigisariaqarpavut, Aqutsisut pisortaat oqarpoq, aammalu unioqqutitsineq unitsinniarlugu suliffeqarfiit innuttaasullu peqquneqartarnissaannut innersuussuteqarpoq.
Politiinut taamaallaat nalunaarutiginnissinnaasut
Pisumi matumani Attaveqaatinut inatsisit naapertorlugit Nalunaarasuartaateqarnermi Aqutsisut inatsisinik unioqqutitsisoqarnersoq paasiniarlugu inuit angerlarsimaffiinut isersinnaanngillat.
- Attaveqaatinut inatsisinik unioqqutitsinermik pasilliuteqarneq tunngavissaqarpat, Nalunaarasuartaateqarnermi Aqutsisut politiinut nalunaaruteqarsinnaapput, pisariaqartumillu misissuititsinissamut piumasaqarsinnaallutik, Aqutsisuni pisortaq nassuiaavoq.
