Nathanielsenip Danmark isornartorsiorpaa: Amerlavallaanik inissiisarneq akuerineqarsinnaanngilaq
Nuummi pineqaatissinneqarsimasunut inissiisarfiup ulikkaaqqavallaarnera isornartorsiorneqarpoq. Isornartorsiuineq Naalakkersuisut danskit naalakkersuisuinut arlaleriarlutik annguttarsimasaat.
Inatsisit atuutsinneqarnerannut naalakkersuisup Naaja H. Nathanielsenip (IA) inatsisit atuutsinneqarnerannut ministeri Peter Hummelgaard (Socialdemokraterne) maajip arfineq-aappaanni ataatsimeeqatiginerani Nuummi pineqaatissinneqarsimasunut inissiisarfiup ulikkaarnera pillugu isornartorsiuineq uteqqippaa.
Assi: Leiff Josefsen
Nuummi pineqaatissinneqarsimasunut inissiisarfiup ulikkaarnera Europap Siunnersuisoqatigiivisa Naalliutsitsinerup pinaversaartinnissaa siunertaralugu Ataatsimiititaliaata nalunaarusiaani pingasunngornermi saqqummersumi isornartorsiorneqarpoq.
Ulikkaaqqanera pissutaalluni pineqaatissinneqarsimasunut inissiisarfimmiittut ineeqqami ataatsimi marlukkaartarneranik kinguneqarpoq.
Naalakkersuisut ajornartorsiut ilisimavaat, Naalakkersuisummi namminneq danskit naalakkersuisuinut ukiut ingerlaneranni isornartorsiuisarsimanerannut assingungajappoq.
Inuutissarsiornermut, nukissiutinut, aatsitassanut, inatsisit atuutsinneqarnerannut naligiissitaanermullu naalakkersuisoqarfik tusagassiutinut nalunaarummi taama allappoq.
Inatsisit atuutsinneqarnerannut naalakkersuisup Naaja H. Nathanielsenip (IA) isornartorsiuineq taanna inatsisit atuutsinneqarnerannut ministerimut Peter Hummelgaardimut (Socialdemokraterne) maajip arfineq-aappaanni uteqqippaa.
- Inissanik ammasunik matoqqasunillu amigaateqartoqarnera aammaarlunga isornartorsiorsimavara. Qallunaat naalakkersuisuisa ajornartorsiummut aaqqiisoqarnissaata piaarnerpaamik pinissaa naatsorsuutigigaat, misigaara.
- Amerlavallaanik inissiisoqarneranik pisoq akuerineqarsinnaanngilaq aamma sulisut inissinneqarsimasullu isumannaatsuunissamut, inatsisitigut isumannaatsuunissaannut aamma atugarissaarnissaannut ajortumik kinguneqarpoq, tusagassiorfinnut nalunaarummi oqarpoq.
Tigummigallarneqartunut suliffiit amigaataasut
Siunnersuisoqatigiit januarimi tikeraareernermi kingorna nalunaarusiaq saqqummiuppaat. Piineqaatissinneqarsimasut tamarmik sulinissamik ilinniarnissamillu periarfissaqarnerat taakku torragaat.
Tigummigallarneqartulli taamatut periarfissaqannginnerat isornartorsiorpaat. Ikittuinnaammi torsuusami eqqiaanissamik periarfissaqarput.
Ilaat qaammatini arlalinni ukiuniluunniit arlalinni tigummigallarneqartarmata aaqqissuussaasumik sammisassanik, ingammik akissarsiaqarluni suliffeqarnissamik, neqerooruteqartoqarsinnaanera sulissutigineqaqqullugu siunnersuisoqatigiit kaammattuutigaat.
Naaja H. Nathanielsen isumaqataavoq.
- Tassunga atatillugu ajornartorsiut angisooq tassaavoq suliassaqartitsiniarnermik sulisunut atorfinitsitaanermi atugassarititaasut. 2026-mi tassunga aaqqiissutip takkunnissaa naatsorsuutigaara, tassani qallunaat naalakkersuisuisa inatsisit atuutsinneqarnerannut suliassaqarfimmi atorfinitsitaanermi atugassarititaasut pillugit misissueqqissaarnertik naammassiniarpaat.
- Atorfinitsinneqarnermi piumasaqaatit killissarititaasullu pisoqalivallaarsimapput aamma nalinginnaasumik aaqqissuusseqqinnissaq pisariaqartinneqarpoq, taannalu suliassaqarfimmut Naalakkersuisut pingaarnersiuineranni ilaavoq, oqarpoq.
Ataqqineqartussaasut
Nuummi pineqaatissinneqarsimasunut inissiisarfimi atugassarititaasut pitsaasut, illup sananeqarnera nersualaarneqarlunilu pineqaatissiinneqarsimasut sammisassaqartinneqartarnerat ataatsimut isigalugu nersualaarneqarnera Europap Siunnersuisoqatigiivisa Naalliutsitsinerup pinaversaartinnissaa siunertaralugu Ataatsimiititaliaata nalunaarusiaani allassimavoq.
Inissaqarniarnermut ajornartorsiutit aaqqinniarlugit allatut suliniuteqarnissaq qulakkeerneqassasoq Danskit naalakkersuisuinut ersarissumik inassutigineqarpoq.
- Nunami inissiisarfinni inissinneqarsimasut aamma ataqqineqartussaapput, aamma taakku inuunerminnik allannguiniarunik tapersersorneqarnissamik pisariaqartitsipput. Taamaammat kingumut innuttaasutut inooqataasinnaalersitseqqinnerup ukkatarineqarnissaa Naalakkersuisut attanniarpaat.
- Naggataagut nunami inissiisarfinni pitsaasunik atugassaqartitsisoqarnissaa uagut tamatta soqutigisarisussaavarput, aamma tamatuma anguneqarnissaanut qallunaat naalakkersuisunut kimigiiserneq Naalakkersuisut aalajangiusimaannarniarpaat, Naaja H. Nathanielsen oqarpoq.
Inatsisinut tunngasunut susassaqarfik suli angerlaanneqarnikuunngilaq, taamaattumik akisussaaffik naalagaaffimmiippoq.
