Nioqqutissat akii oqallisigineqaqqittussanngorput

Mariane Paviasen Jensen (IA) Naalakkersuisunut apeqquteqarpoq (192/2024) ulluinnarni nioqqutit akiisa qaffakkiartornerat pillugu, ilaatigut imatut tunngavilersuuteqarluni:

- Juulip tallimani 2024-mi Araba Kaffit Narsami brugsenimi aamma Pilersuisumi 63,95 koruuninerlugit pisiarineqarsinnaapput, 29. juli 2024 pisiassat taakkoqqissaat 69,95 koruuneqalersimapput, taamattoqariasaartarnera inuiaqatigiit isertitaannut naleqqutinngilluinnartutut oqaatigineqartariaqarpoq. 

- Inoqarfinni mikininneri nioqqutissat qaffakkaluttuinnarneri annermik pissakinnerusunut ulluinnarni atorluarneqartunut akitsuiuartarneq inuiaqatigiit nammassinnaajunnaariartorpaat, naalakkersuinikkullu akitsuutinik piaagaluarneq malunniutinngitsoorpoq. 

- Niuertut killeqanngiusartumik akitsueriasaartarnerat iliuuseqarfigineqartariaqarpoq piaartumillu iliuuseqarsinnaasut tassaasorinarput Naalakkersuisut. Akueriinnarneqarsinnaanngilaq inuiaqatigiit akissaalatsikkaluttuinnartut niuertullu qaffaapiloorsinnaatitaajuaannartut.

Nunatsinni iluanaarniapiluttoqanngilaq 

Pisiniarfinnik piginnittunut isornartorsiuisarneq sinnilimmillu iluanaarniapiluttoqarsorinnittarneq suli oqallisigineqartuarsinnarpoq, aamma pissutsit qanorpiaq innersut pillugit misissuinerup takutereeraluaraa akitigut iluanaarniapiluttoqartarnera nunatsinni atuutinngitsoq, aammalu Kalaallit Nunaat Ukrainemi sorsunnerup aamma Covid-19-ip kingunerisaanik nunarsuarmioqatigiit akitigut qaffakkiartornerannut allatulli sakkortutigisumik nunarput  eqqugaasimanngitsoq.

AAMMA ATUARUK

Akinik misissuineq: Iluanaarniapiluttoqanngilaq

Nassuiaataasinnaasunut ilaassagunavippoq politikkikkut aalajangikkamik akit apparsimaartinneqartarnerat nunatsinni takornartaannginnera, tassa "akit apparsimaartinneqarnerat aningaasallu naleerukkiartornerannut pakkersimaarinninnerit" aqqutigalugit akinik apparsimaartitsisoqartarmat. Taakku piffissaliussap aalajangersimasup iluani taamaallaat atuuttarput, taakkulu atorunnaarneranni pisiniarfiit  nunarsuarmioqatigiit akigititaannut utertariaqartarput.

Kingullertut takussutissaavoq pisiniarfeqarfik pisortanit pigineqartoq Pilersuisoq, tassani Polar-Oilip annertuumik iluanaarutaa atorlugu 2022-mi Pilersuisumi tuniniakkat pisiariumaneqarnerpaat 140-it akii appasinnerulersinneqarsimapput. Aaqqissuussineq taanna 2023-mi peerneqarpoq, tamatumalu kingunerisaanik Pilersuisup ulluinnarni nioqqutissanut akigititai qaffaqqissimallutik.

Paviasenip apeqqutigaa nioqqutissat ataasiakkaat sapaatip akunnialuinnaat ingerlanerini akiisa qaffapiloorsinnaasarnerat Naalakkersuisut qanoq isumaqarfigineraat. Aningaasaqarnermut akileraartarnermullu Naalakkersuisoq, Erik Jensen (S) ima akissuteqarpoq:

- Erseqqissaatigineqassaaq, pisiniarfinni akit, nalinginnaasumik niuerfinni akit nunatsinni atuuttut tunngavigalugit, namminersorlutik pisiniarfinnit aalajangersarneqartartut. Taamaammat Naalakkersuisut ulluinnarni pisiassat akiinik akisussaanngillat imaluunniit piginnaasaqarnatik.

Iluanaarutit qummut killeqartinneqarnissaat suli anguniarneqarpoq

Pingaartumik partii Siumut ukiuni kingullerni sulissutiginnippoq nioqqutissat ulluinnarni atugaasartut akiisa aqunneqarnerat nakkutigineqarnerusariaqartoq.

Partiip politikkikkut oqaaseqartartua, Doris Jakobsen Jensen, arlaleriarluni sulissutiginnippoq siunnersuuteqartarlunilu iluanaarutit qummut killeqartinneqalernissaannik inatsisiliortoqassasoq. Kisianni arlaleriarluni Inatsisartut siulittaasoqarfiannit itigartitaasarsimavoq, maannali iluatsissimavaa siunnersuutissamik iluanaarutit qummut killeqartinneqalernissaanik imaqartumik siunnersuummik (UKA2024/85) saqqummiussinissaminut.

"Niuertarfinni iluanaaruteqartarneq pillugu inatsisissatut siunnersuummik Naalakkersuisut suliaqaqqullugit peqquneqarnissaannik Inatsisartut aalajangiiffigisassaattut siunnersuut." suliarineqartussanngorpoq.

AAMMA ATUARUK

Ulluinnarni nioqqutissat akii: Iluanaarutit qummut killeqartinnissaannut inatsit Siumumit siunnersuutigineqalersoq

Doris Jakobsen Jensen arlalinnik tunngavilersuivoq niuertarfinni iluanaaruteqartarneq pillugu inatsiseqalernissamik siunnersuuteqarnermini:

- Nunatsinni nioqqutissat tikisittakkatta akivii Danmarkimi akigitinneqartunut naleqqersuutissagaanni, nunatsinni akigitinneqartartut akisunerujussuusarput aammattaaq maluginiagassaavoq niuertarfinni akigitinneqartut apparneq ajornerat, naak politikikkut akit qaffatsaaliorniarlugit iliuuseqartoqaraluartoq. 

Taamaattumik piginneqatigiiffiit – pingaartumik suliffeqarfiit inuiaqatigiit pigisaasa - appaaneq ajornerat inuiaqatigiinnut artukkiisarpoq. 

- Nunani allani takornartaanngilaq niuertut akornani unammillerfiugaluartuniluunniit kisermaassisutut pissuseqartumik ingerlatsisoqalinnginnissaa siunertaralugu nakkutilliisoqartarmat. Uagullu nunatsinni nakkutilliinissaq pisariaqarnerusutulluunniit isigineqartariaqartoq isumaqarpunga, tassami amerlasoorsuunnginnerput pissutigalugu namminersortut akornanni unammineq immini killeqarsinnaavoq taamalu unammeqatigiinneq tunngavigalugu akitigut nalimmassaasarneq apeqqusernarsinnaasarluni.

- Niuertarfinni iluanaaruteqartarnerup nakkutigineqarnerusinnaanngornissaa pillugu suliaqaqqusineq Inatsisartunit ilalerneqassappat, makku ilanngullugit nalilersorneqassasut takorloorneqarsinnaapput, taakkulu tikinnginnerini naqissuserusuppara, atuisut illersorneqarnissaat siunnersuummi pineqarmat, pineqarani niuertut unneqqaserluttutut pasinarsarneqarnissaat.