Niviarsiaqqat Dana Cupimi peqataassasut
Niviarsiaqqat kalaallit arsaattartut nunat tamalaat akornanni inuusuttut aasaru unammiuaarneranni ataqqisaasumi Dana Cupimi peqataassapput.
Arkivfoto: Sermitsiaq
Arctic Importip, REMA 1000-p aamma Dana Cupip CSR-imik suleqatigiinnerisigut kalaallit niviarsiaqqat nunat tamalaat akornanni inuusuttut arsaanneranni Dana Cupimi 2025-mi peqataanissamut periarfissaqalerput.
Aningaasaliissutit nerisassat, unnuiffissat angalanermullu atisat akilerpaat, taamaalilluni niviarsiaqqat aningaasatigut aporfeqaratik peqataasinnaallutik. Inuusuttut timersornikkut atugarissaarnissaat ineriartornissaallu anguniarneqarpoq.
- Suleqatigiinneq tamanna uagutsinnut aningaasaleeqataanerinnaanngilaq. Inuusuttunut taakkualu peqatigiiffiinut aningaasaliineruvoq, Arctic Importimi tuniniaanermut pisortaq Henrik Kronborg oqarpoq.
- Isikkamik arsaanneq ataqatigiinnerulersitsisarpoq piginnaanernillu pingaarutilinnik ineriartortitsisarluni, tulluusimaarutigaarpullu kalaallit arsaattartut Dana Cupimut peqataanissaannut nunanilu tamalaani arsaattartut akornanni misigisaqarnissaannut periarfississinnaagatsigit, nangippoq.
Holdit arlallit siornatigut peqataasut
Dana Cup Hjørringimi sapaatit akunnerani 30-mi ingerlanneqartarpoq, ukiullu tamaasa holdit 1000-nit amerlanerusut nunanit tamalaaneersut peqataasarput. Unammiuaarnermi peqataasut, kajumissutsiminnik suleqataasut, tapersersuisut dommerillu 34.400-nit amerlanerusut nunanit 50-ineersut peqataasarput, ullullu tamaasa inuit 20.000-init amerlanerusut unammiffimmut orniguttarput.
Kalaallit holdii Dana Cupimi siusinnerusukkut peqataasarsimapput. 2024-mi ilaatigut Qaqortumeersut K-1933-p niviarsiarartaat U16-it aamma B-67-ip Nuummiut nukappiaqqat niviarsiaqqallu ukiui assigiinngitsut peqataaffigaat. Arsaattartut ilarpassui siullermeerluni Danmarkimut angalapput, misigisaallu timersornermut unammilligassanik kulturimillu misigisaqarnermik aqqusaagaqarfiuvoq.
Isikkamik arsaanneq Kalaallit Nunaanni pingaaruteqarluinnarpoq inuusuttullu illoqarfiit nunaqarfiillu akimorlugit attaveqatigiilersittarlugit. Aningaasaliissuteqarnikkut kalaallit niviarsiaqqat arsaattartut nunani tamalaani unamminissamut periarfissaqaliinnaratik aammali Dana Cupimi ataatsimoornermik, nuannaarnermik ilikkagaqarnermillu misigisaqarsinnaassapput.
Arctic Importip aamma REMA 1000-p suleqatigiinnerisigut Kalaallit Nunaanni inuusuttut amerlanerusut timersornermik nuannarisaqarlutik ineriartornissamut, piginnaaneqalernissamut nunanilu tamalaani timersoqatigiit peqatigiiffiinut peqataanissamut periarfissaqalernissaat qulakkeerneqarpoq.
