Malugaara aamma pisiassat, angallannermullu akit pillugit
allaaserisat amerlatsittut.
Eqqarsaatigisarpara ilaatigut silap pissusaata
allanngoriartornerata Kalaallit Nunaanni qanoq sunniuteqarnera.
Malugaara aamma pisiassat, angallannermullu akit pillugit
allaaserisat amerlatsittut.
Eqqarsaatigisarpara ilaatigut silap pissusaata
allanngoriartornerata Kalaallit Nunaanni qanoq sunniuteqarnera.
Toqqammavik tammariartoraangat
Silap pissusaata allanngoriartornera piffissaq ungasissumi
arlerinartuunngilaq – tamanna Kalaallit Nunaanni ullutsinni piviusuuvoq. Nunap
qeriuaannartup aakkiartornerani, illut aqquserngillu ataani toqqaviit
sisoorput. Illut qupititerput, ruujorit qaartarput, aammalu silap pissusaata
allanngoriartornerani aserfallatsaaliuinermut aningaasartuutit
qaffakkiartortarput. Infrastrukturi, aserfallareersoq, killissaq tikillugu
naqisimatinneqarpoq.
Tamatumalu saniatigut nerisassat, internet, misigisassat
angallannermullu akit qaffakkiartorput. Kalaallit Nunaanni inuuniarneq
akisoorujussuuvoq – akisunerulerlunilu. Aammalu tamakku tamaasa pineranni
innuttaasut ikiliartornerat aammalu peqqinnissaqarfimmi, utoqqaat illuini,
meeqqerivinnilu ilinniarsimasunik amigaateqarnermik ajornartorsiuteqarpugut.
Inuiaqatigiinni atugarissaarni tunngaviusut ajalusoorput.
Illoqarfiit nunaqarfiillu minnerusut ajornartorsiutit
malillugit inukilliartorput. Sinnerupput inissiat aserfallatsut, allaanngillat
siunissami ajunaarnersuaq pillugu filmiliamiit– kisianni maani maannalu pivoq.
Aammalu uani apeqqutit ajornarnerpaat ilaat, kisianni pisariaqartinneqarnerpaat
ilaat takkuttoqarpoq: Siunissami ilumut sumi najugaqassaagut?
Eqiterunneq pillugu oqallinnermi – innuttaasut illoqarfinnut
ikinnerusunut annertunerusunullu ataatsimoortinneqarnissaat pillugu – piviusoq
amerlasuunit takuneqarusunngilaq. Pissutigalugu kikkut angerlarsimaffimminni
isumannaatsumik, eqqaamasaminnik ulluinnarnilu inuunerminik qimagussorusuppat?
Aamma kikkut nukissaqarlutillu akissaqarpat? Illoqarfinni annerni inissiat akii
amiilaarnartuupput, amerlasuunullu nuuttoqarnissaa kiffaanngissuseqarluni
toqqagassaanngilaq, kisiannili pinngitsaalisaalluni ajalusoornerit kinguneri,
nalorninartorsiornerillu peqqutaallutik.
Kisianni siunissaq qulakkeerusukkutsigu oqaloqatigiinnermik
ingerlatsisariaqarpugut – unneqqarissumik ataqqinnillunilu. Ajornartorsiutinut
aningaasaliisariaqarpugut, piffissamik atuisariaqarpugut, inuit ilumut
toqqagassinneqarsinnaalersillugit: inissisimaannarnissaq, pisinnaappat,
imaluunniit naleqassutsimik tapersersorneqarlutillu ingerlanissaq.
Attaveqaatinik - infratrukturimik - atugassarititaasut
nutaaliorfigisariaqarput, najukkami ilinniartitaaneq qulakkeertariaqarparput,
sulisunik ammasunik pissarsiortariaqarpugut aammalu kalaallit atungaat
sinaakkutigalugit aalajangiisariaqarluta.
Ajalusoornermut akiuiniarneq silap pissusaata
allanngoriartorneranut tunngassuteqaanngilaq. Tassaavorli inuiaqatigiit
ataatsimoornerannut, siunissaq kiffaanngissuseqarlunilu toqqaasinnaaneq
pillugit sorsuuteqarneq – peqqissutsimik, aningaasaqarnikkut kinaassutsimilluunniit
akilersortariaqanngikkaluarlugu.
Nalunngilarput maanna nalunaaruterpassuaqartoq innuttaasut
ikiliartornerat, inissiat aserfallattut, aamma sulisussanik amigaateqarnermik
takutitsisut. Akileraaruteqartussat ikiliartorput, aningaasat pisortat
aningaasaateqarfianni ikiliartorput. Tamatumalu saniatigut silap pissusaata
allanngoriartornerata ulluinnarni inuunitsinnut unammilligassaqartitsivoq,
kisianni aamma tunngaviusumik, eqqortumik oqaatigalugu, inuppassuit
inuunerannut, angerlarsimaffiannut, infrastrukturimut, minnerunngitsumillu
inuussutissarsiutinut periarfissat allanngornerat, tassami uumasut, rejet
imaluunniit aalisakkat ikinnerulermata.
Inuulluarneq qanoq isumaqarpa – ullumikkut nammineq
piumassutsimik isumagisarsimasavut inuussutissarsiutigisinnaajunnaarlugit?
