Nuuk: Suliniutit innuttaasunut attuumassuteqartut suut aningaasaliiffigineqarnersut takukkit
Suliniutit taakku aqqaneq-marluk assigiinngisitaartuupput. Nuummi innuttaasunut inooqataanermut, kulturikkut sulianullu
tunngasutigut pitsanngorsaataasunik pilersitsiviusussat 2025-mi katillugit 2,75 millionit koruuningajannik aningaasaliiffigineqarput.
Suliniutit ilaat 500.000 koruuninik aningaasaliiffigineqartoq tassaavoq Katuap eqqaani pinnguartarfik.
Assiliisoq: Leiff Josefsen
Nuummi Najukkami Ataatsimiititaliap 2025-mi aningaasaliissutinik atuinissamut
pilersaarutaa Kommuneqarfik Sermersuup Aningaasaqarnermut Inuussutissarsiornermullu Ataatsimiititaliaanut tunniunneqarpoq. Nuummi
ataatsimuussuseqarnerulersitsisunik, inuunermik naleqarnerulersitsisunik aamma illoqarfimmi
kulturikkut ileqqoreqqusami siunertarineqartumut naapertuuttunut agguataarneqarput.
Suliniutit assigiinngiiaarput, assersuutigalugu erinarsoqatigiit taperserneqarnerat, Aasarpalaaq, Disc Golf Banemik pilersitsineq, pinnguartarfik, eqqumiitsuliortut
illuat sungiusartarfilik,
qalipakkanik qalipaasarfilik, isiginnaartitsisartut sungiusartarfilik aammalu
imigassartaqanngitsumik susassaqartitsinermut atorneqarsinnaavoq. Aamma pinngortitamut tunngasunik tapersersuinermut aningaasaliineq, tassaallutik illuaqqanik oqquiffiusinnaasunik pilersitsineq, isikkivigissumi
issiavinnik takisuunik aammalu illuaqqanik unnuiffiusartussanik pilersitsineq,
atuisut amerlasuut pinngortitamik atuilluarnissaannut kaammattuutaasunik.
600.000 kr. aappaagumut sipaarneqartut
Ataatsimiititaliap decembarip 17-ani ataatsimiinnissaanut oqaluuserisassani allassimavoq 600.000 koruunit missaanniittut 2025-p ingerlanerani qinnuteqarfigineqarsinnaanngorlugit aningaasaliissutigineqartut.
Suliniutit aqqaneq-marluk taakku aningaasat qanoq atorneqarsinnaanerannut malittarisassat naammassineqarmata Nuummi Najukkami Ataatsimiititaliap siunnersuutaa malinneqassasoq Kommuneqarfik Sermersuumi atorfilittat qullersaata Ole Jakobsenip politikkerinut innersuussutigaa.
Aningaasat tapiissutit 60.000 koruuniniit 500.000 koruuninut amerlassuseqarput.
Suliniutit naatsumik allaaserineqarsimasut uani takuneqarsinnaapput:
2025-mi aningaasaliissutinik atuinissaq
