Paavip Romami naalagiartitsinerani inuusuttut millioninit amerlanerusut peqataasut
Paavi Leop Romami naalagiartitsinermini pilluarneq piviusoq siunertaqannginnerlu eqqartorpai. Naalagiaqataarusuttut amerlasuut inissaqarumallutik toqqinni sinissimapput.
Leo 14. amerikamiuni siullersaalluni pavinngorpoq. Robert Francis Prevostimik siornatigut taaneqartarpoq.
Assi: Remo Casilli/Reuters/Ritzau Scanpix
Paavi Leo Italiap illoqarfiisa pingaarnersaanni Romami naalagiartitsimmat inuusuttut millioninit amerlanerusut sapaammi najuupput.
Nutaarsiassaqartitsivik AFP allappoq. Vatikani naapertorlugu naalagiartitsinermi biskoppit 450-it palasillu 700-t missaanniittut najuupput.
Ilagiit katuullit ukioq manna nalliuttorsiorput. Ukiut 25-kkaarlugit nalliuttorsiortoqartarpoq, ullunilu kingullerni inuusuttut nalliuttorsiutigineqarnerat sapaammi naammassivoq.
AFP naapertorlugu inuusuttut millionit affaat sapaatip-akunnerata annersaani Romamiipput. Inuusuttut amerlanersaat sapaatikkut naalagiarnissap utaqqinerani tuperni siniffiullu puuini sinngussimasut, AFP allappoq.
Paavip Romip aqquserngatigut Ecuadorip erfalasuanik paarsaqarluni ingerlaartoq.
Assi: Simone Risoluti/Reuters/Ritzau Scanpix
Paavi qulimiguulimmik tikiuppoq, qiimmattaatigineqarlunilu tikilluaqquneqarluni. Kinguninngualu naalagiarneq aallartippoq.
- Sallusuissuseq qamuuna ujartortuagaraarput, maluginngitsuusaarsinnaanngisarpoq. Tamannalu pissutigalugu imminut ima aperinissaq pisariaqalersimavoq: Sallusuissuseq piviusoq sunaana?
- Inuunerup siunertavia suua? Siunertaqannginnermiit, susassaaleqinermit pingaakujunnermillu qanoruna iliorluta ingerlariaqqinniartugut?, 69-inik ukiulik paavi oqaluussiinermini aperaaq.
- Sumiikkaluaraangavilluunniit annertuunik anguniagaqarlutillu illernassuseq ujartuaruk. Angorusutanniik minnerit naammagiinnarnagit, oqarpoq.
Inuusuttut nunanit 146-neersut ataasinngornermalli Romamumiittut Vatikani paasissutissiivoq.
Paavi Francis apriilimi toqummat Leo maajimi paavinngortinneqarpoq.
