Pinngitsaaliissummik arsaarinnittarnerit pillugit akerliussutsimik takutitsisoqassaaq
Kalaallit Danmarkimi najugallit meeraannik pinngitsaaliissummik arsaarinnittarnermut angajoqqaallu piginnaanerinut misissuinerit kalaallinut naleqqutinngitsut atorneqartarnerannut Københavnimi Nuummilu akerliussutsimik takutitsisoqassaaq.
Assiliisoq: Leiff Josefsen
Peqatigiiffik MAPI Københavnimi Rådhuspladsimi angajoqqaatut piginnaasanik misissuinerit atorneqartarnerinut kalaallillu meerartaannik pinngitsaaliissummik arsaarinnittarnermut akerliussutsimik takutitsinissamik pilersaaruteqartoq, Nuummi aamma arfininngornermi novembarip qulingiluaani nalunaaqutaq 10.00 tapersersuilluni ingerlaaqatigiinnissaq pilersaarutaavoq.
Københavnimi akerliussutsimik takutitsinermi Nuummilu tapersersuilluni akerliussutsimik takutitsinermi angajoqqaat piginnaanerinik misissuinerup (FKU) maannakkutut isikkoqartup sammineqarnerulernissaa atorunnaarnissaalu anguniarneqarpoq. Misissuineq Danmarkimi kommunini assigiinngitsuni atorneqartarpoq, misissuinerli ikinnerussuteqartunut, soorlu kalaallinut, naleqqutinnginnerata isornartorsiorneqareernerata kingorna kommunini ataasiakkaani atorunnaarsinneqarpoq.
- Misiliutit FKU-mik taaneqartartut angajoqqaatut piginnaasat illuinnarsiortumik, angajoqqaat kulturiat tunuliaqutaallu isiginiaqqaarnagit, atorneqartarput.
- Meeqqallu pinngitsaaliissummik inissinneqartarnerannik kinguneqartarpoq, allaammi pinngitsaaliissummik meeravissianngortinneqartarnerannik, naak tunngavilersuutit piviusumik kinaassutsimilluunniit ataqqinninnermik takutitsisuunngikkaluartut. 2023-imi Danmarkimi meeqqat kalaallit 411-t angerlarsimaffiup avataanut inissinneqarnikunut takussutissaassapput, tamannalu ernumanartorujussuuvoq, Nuummi innuttaasut Kalaallit Nunaanni tapersersueqataallutik akerliussutsimik takutitsinermik aaqqissuussisut oqarput.
Aaqqissuussaanerup allanngortinneqarnissaa piumasarineqartoq
Kiera Alexandra Kronvold, ernereernerup kingorna pinngitsaaliissummik meeqqaminik arsaagaasussanngortoq, Sermitsiap sammimmagu angajoqqaat piginnaaneri pillugit misissuinerit oqallisigineqangaatsiarput. Kiera Alexandra Kronvold Kalaallit Nunaanneersuuvoq Danmarkimi najugaqartoq. Ingerlalluarpoq, atornerluisuunngilaq angerlarsimaffeqarlunilu, maannakkulli naartunera ukiorpaalunni sioqqullugu pinngitsaaliissummik meeqqaminik arsaagaasimavoq.
- FKU-mik misissuinerit atorunnaarsinneqarnissaat imaluunniit kulturimut naleqqussarluinnarlugit angajoqqaallu piginnaasaannik naapertuilluartumik ataqqinnippaluttumillu nalilersuisoqarsinnaaniassammat allanngortinneqarluinnarnissaat piumasaraarput.
- Politikkerit tusarnaarnissaat iliuuseqarnissaallu piffissanngorpoq. Meeqqat tamarmik namminneq kulturertik oqaatsitillu pisinnaatitaaffigaat, aammalu Danmarkimi Kalaallit Nunaannilu inuit immikkoortitsinermik eqqugaanerpaanerat akuerineqarsinnaanngilaq.
Københavnimi Rådhuspladsimi nalunaaqutaq 13.00-mit akerliussutsimik takutitsineq aallartissaaq.
Nuummi nalunaaqutaq 10.00-mit ingerlaaqatigiittoqassaaq. Peqataasussat Amisuni naapissapput, Naalagaaffiullu Sinniisoqarfiata tungaanut ingerlaariarlutik Naalakkersuisoqarfimmukassapput.
