Tusagassiorfik innuttaasunut sullissisoq
ingerlallualerseqqinniarlugu politikkikkut KNR-imili piumassuseqartoqarpoq.
Aqutsisoqarnikkut ajornartorsiutit, aningaasaqarnikkut unammillernartut
suliassaqarnerujussuarlu piffissami sivitsortumi atorneqareersut tamanna pivoq.
Tusagassiorfik innuttaasunut sullissisoq
ingerlallualerseqqinniarlugu politikkikkut KNR-imili piumassuseqartoqarpoq.
Aqutsisoqarnikkut ajornartorsiutit, aningaasaqarnikkut unammillernartut
suliassaqarnerujussuarlu piffissami sivitsortumi atorneqareersut tamanna pivoq.
KNR-ip pisortaasut soraarsimasut ukiumi
kingullermi 1 million koruuningajannik – eqqorluartumik 992.340,48 koruuninik –
akissarsisillugillu soraarnerinut atatillugu ajunngitsorsitissimagai Sermitsiap
allagaatinik takunnissinnaaneranit paasineqarpoq.
Aamma tusagassiortut aaqqissuisullu arlallit
soraartarlutillu uippakajaarnermik napparsimalersimalluni nalunaartoqartarpoq.
Tamakkua saniatigut nutaarsiassaqartitsivimmi
pisortaq juulimi angerlartinneqarpoq, sulisoqarnermut pisortaq novembarimi
angerlartinneqarpoq, pisortarlu Annga Lynge ukioq manna januaarimi
angerlartinneqarluni. Aammattaaq siulersuisuni taarseraattoqarmat 2023-miit
maannamut inuit sisamat siulersuisuni siulittaasuusimapput.
Suliumajunnaarneq soraarsitsinerlu
Sulisut 16-it suliffimmi avatangiisit ajortut
suliassaqangaatsiarnerlu pissutigalugit suliunnaarmata pissutsit marsip 7-ani
ajornerulerput. KNR-ip tamatuma kingunerisaanik sulisut sisamat
soraarsillugillu sinneri aqqaneq-marluk allakkatigut mianersoqqussummik tunivai.
- Sulisitsisutut
pissusilersuutit KNR-imi takutinneqartut akuerinngilluinnarpagut, partiillu
siulittaasuinut eqqarsaatigillaqquarput sulisut ilungersortitaavallaarnerminnik
naammagiliinerat ilumut taama peqqarniitsigisumik sulisitsisunit (pisortanit)
akineqartariaqarnersoq. Pissutsinut iluaqutaanani killormut assut ajoqutaassaaq,
Arnaq Nielsen tusagassiuinermi sulisut peqatigiiffianni siulersuisut
sinnerlugit allappoq.
Unioqqutitsilluni suliunnaarnerup KNR-ip
ingerlatsineranut akornutaarujussuarnera KNR-imi pisortaagallartup Bjørk Lange
Olsenip soraarsitsinernut tunngavilersuutigaa.
Unammillernartut nutaajunngitsut
Suliffeqarfimmi ajornartorsiuteqartoqarnera
nassuerutigalugulu sulisut atugaat pisortanit pimoorunneqartuusut
erseqqissarpaa. Bjørk Lange Olsen Sermitsiamut allakkatigut akissuteqarnermini
taama nalunaarpoq.
- Sulisut atugarissaarnissaat
eqqarsaatigalugu aamma ingerlatsinerup ingerlalluarnissaa aamma kissaatigut
pisussaaffigullu malillugit tusagassiuutitigut pitsaasunik saqqummersitsisarsinnaanissarput qulakkeerniarlugu tamanna
aqutsisunit pingaartinneqarpoq, allappoq.
Sulisussanik, ingammik tusagassiortunik,
piukkunnartunik pissarsiniarneq sulisitsisunillu attassiniarneq KNR-ip
unammillernartitaasa ilagaat, Bjørk Lange Olsen oqaluttuarpoq. KNR-ip
unammillernartitaasa ilaat nutaajunngitsut aamma erseqqissarpaa.
- Piffissap ingerlanerani
pilersikkiartortinneqarsimapput, kisianni sulisutsinnut pitsaanerusunik
ataavartumillu atugassaqartitsiniarluta KNR-ilu suliffittut
pilerinarnerulersinniarlugu piffissami sivikitsumi sivisuumilu
suliniuteqarnissarput aalajangiusimavarput, Bjørk Lange Olsen allappoq.
Sisamanngornermi 10. april paasinarsivoq radiomi pisortaq Evi Kreutzmann KNR-imi pisortaqatigiit isumaqatigiissuteqarfigalugit aamma suliunnaarsimasoq.
