Politikerip parteeqatini borgmesterinngorniunnermi unammilleraa
Ane Hansen kommunimut qinigassanngorteqqinngimmat Kommune Qeqertalimmi kina borgmesterinngussava? Mariane S. Larsen Inuit Ataqatigiinneersoq qinigassanngortimmat qinersinissaq tikillugu unammisoqarsinnaavoq. Borgmesterinngortussaq Aasianneersuussasoq taanna isumaqarpoq.
- Pingaartippara innuttaasunik sullissineq massakkorneq pitsaanerusumik ingerlanneqarnissaa, angorusuppara Kommune Qeqertalimmi sulisut nuannaarlutik ataqqineqarlutik tusaaneqarlutik suliaminnullu tulluartumik inuuneqarlutik sulinissaat, Mariane S. Larsen allappoq.
Assi: Inuit Ataqatigiit
Kristian Jeremiassen Inuit Ataqatigiinneersoq borgmesterinngussava? Imaluunniit Mariane S. Larsen aamma Inuit Ataqatigiinneersoq? Imaluunniit alla?
Tamanna apriilip aallaqqaataani qinersisoqareerpat paasinarsissaaq.
Maanna borgmesteriusoq Ane Hansen (IA) kommunimut qinigassanngorteqqinngilaq. Taamaattumik kina borgmesterinngussanersoq pissanganarnerulissaaq, tassa Inuit Ataqatigiinneersut Mariane S. Larsen aamma Kristian Jeremiassen borgmesterinngortussatut sassarmata.
Borgmesteri Aasiammiuussaaq
Borgmesterinngortussaq Aasianneersuusariaqartoq Mariane S. Larsen isumaqarpoq:
- Aasiaat avataaniit borgmeaterinngortoqassappat ukiuni sisamani suliartorluni tikissaaq, taakkualu ukiut qaangiuppata aallaqqilluni. Aasiannilu innuttaasut ilisarisimanangit atungaallu nalullugit, taamaattumik suliartuinnarluni piffissap ilaannaani Aasianniittussamik pinnata Aasiammiumik borgmesteriutitaqarnissaq angujumallugu borgmesteritut sulinissannut piareersimallunga qineqqusaarpunga, Sermitsiamut allappoq.
Aqutsisut nukittuut, innuttaasunik sullissinermik sulisartullu atugaannik pingaartitsisut, najukkamiit aallaaveqarnissaat qulakkeerusuppaa.
- Pingaartippara innuttaasunik sullissineq massakkorneq pitsaanerusumik ingerlanneqarnissaa, angorusuppara Kommune Qeqertalimmi sulisut nuannaarlutik ataqqineqarlutik tusaaneqarlutik suliaminnullu tulluartumik inuuneqarlutik sulinissaat, nangilluni allappoq.
Kristian Jeremiassen (IA), Qasigiannguaneersoq, 2021-mi kommunimut qinersinermi 198-inik qinerneqarpoq, taamaalillunilu IA-mi taaneqarnerpaat pingajuattut inissilluni. Taanna kommunalbestyrelsimut qinigassanngorteqqippoq.
IA Inatsisartunut qinersinermi malunnaatilimmik kinguariarpoq
Jerimiassen oqarpoq borgmesterinngortinneqassaguni Aasiannut nuukkumaarluni.
2021-mi kommunimut qinersinermi Inuit Ataqatigiit Kommune Qeqertalimmi kommunalbestyrelsimi ilaasortanit 15-iusunit qulingiluat pissarsiaraat.
Taamanikkut aamma Inatsisartunut qinersinermi, ulloq taanna ingerlanneqartumi, ajugaapput.
Inatsisartunut qinersinermi naammassineqaqqammersumi partiip kommunimi qinerneqarnera affaannanngortoqt Valg.gl-imi kisitsisit takutippaat. Taamaattumik partiip kommunalbestyrelsimi inissisimaffini nukittooq attatiinnarsinnaaneraa pissanganassaaq.
