Qamutit: Qaarsoq ingerlaffigiuminaatsoq qaartitigu
Nuummi qamuteralattartut peqatigiiffiat Qamutit nammineq aningaasaatitik kajumissutsimillu sulisut atorlugit qaqqap ilaanik immikkut ittumik qaartitererusupput. Ukkusissap Kangilequtaata avannaata tungaani aqqutip ingerlavigiuminarninngornissaa angorusunneqarpoq.
Leiff Josefsen
Nuup timaa qamuteralannik, pisuttuarnermik sisorarnermillu nuannarisaqartunut tikikkuminarninngortinniarlugu siunnersuut illoqarfiit pingaarnersaata kommuniani aningaasaqarnermut ataatsimiititaliap tusarniaassutigineqassanersoq ullumikkut aalajangiiffigissaavaa.
Qamutit sumiiffimmik aalajangersimasumik qaarsummik 270 - 300 m2-imik qaartiterisoqarnissaa qinngutigaat. Qaartiterneqartussaq 6x30 m-inik takissuseqassaaq, talerpiani 2 meterit missiliorlugit portutigisoq saamiatalu tungaani 1 meterip missaaniittoq. Qaartiternerlukut aqqusiniliornermut aamma atorneqassapput.
Aqqut siusinnerusukkut atorneqartoq
- Aqqut atorneqarusuttoq
taannaavoq ukiut 30-40-t matuma siornatigut qamuteralannik nutaanngitsunit atorneqartartuuvoq.
Ammukariaq ullumikkut aqqutitut atorneqartarpoq. Taanna sivinganeruvoq qummukarfigalugulu
ajornakusoornerusinnaavoq, aningaasaqarnermut ataatsimiititaliamut saqqummiussami, Sanarfinermut Avatangiisinullu ingerlatsivimmi pisortap Søren Pedersenip allagaani, allassimavoq.
Ammukajaakkut aqquteqalernissaa kikkunnut tamanut, aamma SAR-imi annaassiniartoqartillugu, qummut
ammullu qamuteralannik ingerlaffigineqarsinnaalissasoq qamuteralattartut peqatigiiffiata nalilerpaa.
Qamut qinnuteqaatimini innersuussutigaat Aqqitsup eqqaani februaarip 27-ani 2024-mi ajutoorneq, tassani ulluni siuliini silarluttoqarnerani aputinissimanerani apummik sisoortoqarpoq alianaqisumik kinguneqartumik.
Qaqqap ilaa Qamutit qaartiterusutaat uani takuneqarsinnaavoq.
- Qatserisartut politiillu qummukarneq ajuleramik qamuteralatik tassani qimaannartariaqarsimavaaq. Ammukariakkut aqquteqalernissaa kikkunnut tamanut qummut ammullu qamuteralannik ingerlaffigineqarsinnaalissasoq Qamutit naliliivoq, qinnuteqaammi allassimavoq.
Tamanut ammasumik tusarniaanissaq pisariaqartoq
Peqatigiiffik sanaartornermik suliaqartumit qaarsuup qaartiternissaanut neqeroorfigineqarpoq, piumasaqaataavorlu ilaasortat pisariaqartinneqartunik ikiuunnissaat – ilaatigut atortussanik sulisunillu assartuinermut. Ukiorpassuarni Qamutinut ilaasortaq Poul Due Hansen suliniummut isumassarsisuuvoq aqutsisuujumallunilu, taannalu ulluinnarni sanaartornermik suliaqartuuvoq, qinnuteqaammi paasissutissiissutigineqarpoq.
Qamutinut ilaasortaasut namminneq kajumissutsiminnik suliaqartarnertik eqqaavaat, assersuutigalugu Nuup Kapisilliillu akornanni oqquiffissanik qulingiluanik sanaartornikuunertik.
Suliniut kommunimut aningaasartuutaassanngilaq, akuersissutigineqartinnaguli suliarineqalersinnanilu sapaatip-akunnerini sisamani tamanut tusarniaassutigineqassaaq.
