Qeqertarsuup tunua: Teknikki silarlunneralu pissutigalugit Air Greenland kinguaattoortoq
Angalasut arlallit Qasigiannguani Ikamiunilu ullut 14-it tikillugit kinguaattoortinneqarput. Air Greenlandip neriorsuutigaa angalasut sinneri marlunngornermi apuuffissaminnut apuunnissaat.
Assi: Air Greenland
Qeqertarsuup Tunuani, pingaartumik Qasigiannguani nunaqarfinnilu, ilaasunik angallassineq unamminiarnartorujussuuvoq.
Air Greenlandimi attaveqaqatigiinnermut immikkoortortaqarfimmit Sermitsiamut tamanna nassuerutigineqarsimavoq.
Ilaasussatt arlallit Sermitsiamut saaffiginnipput angalaniarnermi kinguaattoorfiusoqarnera ilisimatitsissutigalugu, aammalu Air Greenlandimut maalaarusiorsimallutik arlalinnit atsiorfigineqartumit ilisimatitsissutigalugu. Qasigiannguaneersut Sermitsiamut oqaluttuarput angalanissartik ullut 14-t tikillugit taamaatinneqartarsimasoq.
Air Greenlandip uppernarsarpaa Ikamiuni innuttaasumit naammagittaalliuummik tigusaqarsimallutik, ilisimatitsissutigaallu angalanissat taamaatitsiinnarneqartarnerannut pissutaasut arlariiusut:
- Ilumoorpoq qulimiguulimmik timmisartuussinerit ilaat taamaatiinnarneqarsimasut, tamannalu aamma Qasigiannguanut Ikamunullu timmisartuussinernut sunniuteqarpoq.
Naammagittaalliuut Namminersorlutik Oqartussanut ingerlateqqinneqarpoq
- Timmisartuussinissat taamaatiinnarneqarnerannut pissutaavoq qulimiguuliup H155-ip pilersaarutaanngitsumik aserfallatsaaliorneqarnera aammalu silarluttarnera, tamatumalu kingunerisaanik qulimiguulik mikinerusoq AS2350 piffissap ilarujussuani timmisartuussisussanngortinneqartoq “naammaginartumik angummassinnaasimanngilaq”, Air Greenlandimi attaveqaqatigiinnermut pisortaq Inga Dora G. Markussen Sermitsiamut allakkatigut akissuteqarluni ilisimatitsivoq.
Air Greenlandip ilisimatitsissutigaa ilaasunik angallassineq pillugu Air Greenlandimut maalaaruteqarneq ineqarnermut attaveqarnermullu naalakkersuisoqarfimmut ingerlateqqinneqarsimasoq, aaqqiissutissatullu siunnersuutigineqartoq - tassa timmisartuussinerit aalajangersimasut ilaneqartarnissaat, taamaalilluni pingasunngornermi Ikamiuniit Aasiannut timmisartuussisoqarsinnaaleqqullugu - ilanngunneqarsimasoq.
Air Greenland ilisimatitsivoq maalaarut tunngavigalugu innersuussutigineqartut naalakkersuisoqarfimmit akuerineqarsimasut, suliallu aallartissimasut.
Ilaasut sinneri apuuffissaminnut ullumikkut apuutissapput
Tallimanngornermi februaarip arfineq-aappaanni Air Greenlandip qulimiguuliutaa Qasigiannguanit timmisartuussinissamut piareeqqippoq. Timmisartornissaali sila pissutigalugu taamaatiinnarneqarpoq. Sapaatip akunnerata naaneranili qulimiguulik Qasigiannguanut aamma Qasigiannguanit ilaasunik angallassivoq, maannalu nunaqarfinnut ingerlaqqilerluni:
- Naatsorsuutigaarput Ikamiuniit ilaasut ullumikkut tikitassaminnut ingerlaqqissasut, aamma Saqqami Qeqertanilu ilaasut aqagu ingerlaqqittussaapput, Air Greenland ilisimatitsivoq.
Air Greenland ilisimatitsivoq najugaqarfinnit mikinerusunit aallartussat allanngorangaatsiartartut, ilaannikkut qulimiguullit ilaasunik ulikkaarluarsinnaasarput, allatigulli najugaqarfiit akornanni ilaasussaqartinnagu timmisartuussinerit aamma taamaatiinnarneqartariaqartarput.
