- Nuup Kangerluani qipoqqarnik pisaqaqqusiunnaarneq qipoqqarniartartut aningaasarsiornerannut, nunattaluunniit neqissaqarniarneranut akornuseerujussuarsinnaanngilaq, tassami Nuup Kangerluani 2016-imili qipoqqarmik pisaqartoqarsimanngimmat. IA-mit aamma erseqqissumik oqaatigereerparput, Nuup Kangerluani qipoqqarnik pisaqaqqusisoqarunnaarnerata kingunerisaanik bundgarninik aseruisoqarsimatillugu, taarsiiffiginnissinnaaneq ammaffigigatsigu.
Kommuneqarfik Sermersuumi IA sinnerlugu kommunalbestyrelsimut ilaasortaq Juaaka Lyberth taama oqarpoq.
- Nuup Kangerluani qipoqqarnik pisaqaqqusiunnaarneq qipoqqarniartartut aningaasarsiornerannut, nunattaluunniit neqissaqarniarneranut akornuseerujussuarsinnaanngilaq, tassami Nuup Kangerluani 2016-imili qipoqqarmik pisaqartoqarsimanngimmat. IA-mit aamma erseqqissumik oqaatigereerparput, Nuup Kangerluani qipoqqarnik pisaqaqqusisoqarunnaarnerata kingunerisaanik bundgarninik aseruisoqarsimatillugu, taarsiiffiginnissinnaaneq ammaffigigatsigu.
Kommuneqarfik Sermersuumi IA sinnerlugu kommunalbestyrelsimut ilaasortaq Juaaka Lyberth taama oqarpoq.
Kisitsisit Aalisarnermut Piniarnermullu Naalakkersuisoqarfimmit pissarsiarai.
Taakkunani erseqqissumik takuneqarsinnaalluni Kitaani qipoqqartassiissutit ukiumut quliusartut nungunneqarsimanngisaannartut, 2010-mi Nunani Tamalaani Arfanniarnermut Ataatsimiititaliarsuup Pinngortitaleriffiup siunnersuinera tunngavigalugu qipoqqartassiisoqartalernissaa innersuussutigineqarmat, tassanngaanniit siunnersuineq tunngavigalugu killilersuineq piujuartitsinermik tunngaveqartoq uppernarsarneqarsinnaammat.
- Ininerniliineq imaappoq Nunatsinnut tamarmut qipoqqat pisassiissutigineqartartut, ukiut qulit ingerlanerini tamakkeqqajarnagit pisarineqartarsimasut, Juaaka Lyberth kisitsisit Aalisarnermut aamma Piniarnermut Naalakkersuisoqarfimmeersut misissoreerlugit taama oqarpoq.
Naalakkersuisoqarfiup taassuma Juaaka Lyberthimut ilisimatitsissutigaa, Nunatsinni 2019-mi qipoqqat sisamat pisarineqarsimasut, taakkunannga ataaseq Nuummi, sinneri Paamiuni. Pisassiissutinit ukiumut suli quliusunit, pingasut 2020-mi pisarineqarsimapput, taakkunannga marluk Nuummi pisarineqarlutik, ataaseq bundgarninit pisarisoorneqarluni.
Kommuneqarfik Sermersooq Nuup Kangerluani qipoqqarnik eqqissisimatitsinissamik siunnersuummut 2021-mi aamma aalajangiivoq. Tamannali qipoqqaqassutsimut sunniuteqanngitsoq oqaatigineqarluni.
Soqutigineqanngitsut
Juaaka Lyberthip qipoqqarnut tunngasut ukiuni arlalinni malinnaaffigisarsimavai. Kingullertut aggustimi Tunumiippoq Inoqarfinnut Avatangiisinullu Ataatsimiititaliaq peqatigalugu, qipoqqarnut tunngasut soorunami aamma oqallisigineqarput.
- Qipoqqaat angisuut arlallit qanimut takuavut – isumaqarpunga tallimat arfinillilluunniit sumiiffimmi annikitsumi katersuussimasut nereqatigiittut. Kulusummi mittarfiup avataani kangerliumanermiittut, Juaaka Lyberth oqarpoq, taassumalu arfanniartartut qipoqqarniarnissamut akuersissutaatillit ilisimavai, taakkuli akuersissutaatiminnik atuisanngillat.
- Tikaagulliit qipoqqarnit soqutigineruaat, oqarpoq.
- Arfanniartartut ilisimatitsissutigaat, atuisut qipoqqaat mattaannik, qiporaanik, neqaanik iloqutaannillu soqutiginnippallaartanngitsut.
Taamaalilluni qipoqqaat arfanniartartunit soqutigineqartanngillat.
- Pisisartoqanngikkaangat qipoqqarniartartunut uumasunik angisoorsuarnik taakkuninnga pisaqarneq imminut akilersinnaanngilaq, oqarpoq erseqqissarlugulu piniartut pisassiissutigineqartunik tamakkiisimanngikkaangata pissutsit allat aamma sunniuteqartartut, soorlu silap pissusia.
Juaaka Lyberthip aamma ilisimatitsissutigaa Kommuneqarfik Sermersuumi IAA-mut ataatsimiititaliap ataani sinerissap qanittuani piniarnermut aalisarnermullu siunnersuisoqatigiit pilersinneqartut. Siunnersuisoqatigiinni kommunimi aalisartut peqatigiiffii tamarmik sinniisoqarput.
- Kommunini piniarnermut aalisarnermullu malittarisassat nutarterneqarnissaat pillugu oqaloqatigiinnermik ingerlatsivugut. Ataatsimiititaliami siunnersuisoqatigiinni tullianik ataatsimiilerutta ’qipoqqaat pillugit ajornartorsiut’ oqallisigeqqissavarput, neriorsuivoq.
