KL

DK

Qupanuk Olsen Naleraq sinnerlugu Inatsisartunut qinigassanngortippoq: Nunatta namminiilivinnissaa sulissutiginiarpaa

Qupanuk Olsen, nunatsinni inuit nuttartakkakkut attaveqaqatigiittarfiini malinnaaffigineqarnerpaasoq, Naleraq sinnerlugu Inatsisartunut qinigassanngortinniarluni sassarpoq.

Tôrtia Reimer-Johansen
Journalist
Offentliggjort

Qupanuk Olsen inuit nittartakkakkut attaveqaqatigiittarfiitigut saqqummertartutut 1,5 millioninit malinnaasoralugit tusaamaneqarpoq.

Maanna politikkikkut sassarnermigut tusaamaneqartussanngorpoq.

Taassuma Sermitsiami apersorneqarnermini oqaatigaa nunatta naalagaaffinngornissaa politikkikkut pingaarnertut anguniarniarlugu.

- Misigisimagama nunatsinnut allanngueqataasinnaallunga, taavalu aamma nunatta namminiivilinnissaa angorusukkakku. Upperilluinnaqqissaarakku nammineq naalagaaffiulluta namminersortutut ingerlasinnaasugut.

Saqqummertartutut politikeritullu inuuneq

Naak politikkimut appakaakkaluarluni saqqummertartutut sulinini politikkikkut akuliunniarnagu nammineq oqaatigaa.

- Q's Greenland a-politiskiutittuaannarakku (politikkimut attuumassuteqanngitsut aaqq.) Sapinngisamik a-politiskiutinniarsuaartuaannarakku, taanna ingerlatiinnassamaarpara. Q's Greenland qineqqusaarfittut atornavianngilara. Politikkimut tunngasut immikkut quppernermi Qupanuk Olsen ataani politikki ingerlajumaarpoq.

Ilanngullugu oqaatigaa Q's Greenland ingerlaannassasoq.

USA nunattalu namminiilivinnissaa

Nunatta nammineq oqartussaassuseqarnissaanut apeqqut nunarsuaq tamakkerlugu maannakkorpiaq oqallisaavoq soqutigineqarlunilu.

Qupanuk Olsenip ilanngullugu oqaatigaa nunat allat nunatsinnut soqutiginninnerat namminiilivinnissatsinnut qanillisaataasoq:

- Naalagaaffinngornavianngilagut USA-p ataani. USA-mut ilanngunnavianngilagut, nunatta namminiilivinnissaa anguniaratsigu. USA-p nunatsinnut soqutiginninnera pitsaasutut tiguara, taamaasilluta namminiilivinnissamut oqallinnerit siuartinneqaramik, aamma qujamasuppunga uagut kalaallit qanoq naleqarnerutiginersugut takusinnaaneruleratsigu. Danmarki kisimi tusarnaaginnarnagu.

Inatsisartunut qineqqusaarnermini anguniakkani piffissami qaninnermi saqqummiutissamaarnerarpai.

Politikkimi peroriartortoq

Qupanuk Olsenimut politikkit nutaajunngilaq. Taassuma angajoqqaavi peqqikkallaramik politikkikkut suliaqarnikuuppit. Ataatagigalua Kaj Egede Siumut sinnerlugu Naalakkersuisunut ilaasortaasimavoq. Arnaalu Karen Egede Kujataani kommunimi politikeriunikuuvoq. 

- Taamaammat politikki uanni nutaajunngilaq, naggasiilluni oqarpoq.

selvstændighed qupanuk olsen naleraq inuiaqatigiit influencer inatsisartut grønland valg samfund

ATORFIIT Se alle jobs

Powered by Labrador CMS