Sapaatip akunnera aalajangiiffiusoq

Nunatsinni Eqqartuussiviup Paul Watsonip decembarip 18-iata tungaanut tigummigallarneqarnissaanik aalajangernera Nunatta Eqqartuussisuuneqarfiata sapaatip-akunnerani kingullermi ilimagineqareersutut attatiinnarpaa.

Watsonip siunissaa Danmarkimi inatsisinik atortitsinermut ministereqarfimmit sapaatip-akunnerani matumani aalajangiiffigineqangajalermat "naak inuttaa nammineq toqqaannartumik peqataanngikkaluartoq Watsonip tapersersortai Japanip imartaani eqqissiviilliortitsisinnaasut“ Japanimi tusagassiorfiit allaaserigaat Minori Takahashi DIIS-imi (Dansk Institut for Internationale Studierimi) namminersorneq aamma arfanniarnermut politikki pillugu ilisimatusartoq oqarpoq.

Watsonip tigummigallarneqarnera Japanimi qanoq isumaqarfigineqarnersoq ilisimatusartoq Japanimiu AG-p aperaa.

Japanimi tusagassiorfiit suliaq sammigaat oqarpoq, aallaqqaammut Watsonip Kalaallit Nunaanni tigusaanera breaking news-itut saqqummiuteriarlugu kingorna tigummigallarneqarnerata sivitsorneqarnera pillugu allaaserisaqartarlutik.

- Allaaserisat amerlanersaat nunanit allaneersut nutaarsiassaqartitsiviinit nutaarsiassanit naatsunit Japanimiutut nutserneqarsimasunit aallaaveqarput, Minori Takahashi oqarpoq, tusagassiortullu Japanimiut Paul Watson apersorniarlugu Kalaallit Nunaanniissimassasut taanna isumaqanngilaq, soorlu tusagassiortut allat – ingammik Kitaaneersut, aamma KNR – taamaaliorsimasut.

Arfanniarnermut akerliusunut akerliusut

Suliaq innuttaasunit soqutigineqarpallaanngikkaluarpoq.

Japanimi inuit pissutsinut malinnaasut marlunnik isumaqartoqarpasittut ilisimatusartoq nassuiaavoq:

- Japanimi arfanniarnermut tapersersuisut amerlanngitsut oqaatigineqarsinnaapput. Japanimiulli amerlasuut arfanniarnermut akerliuneq Europamiut Amerikamiullu isiginnittaasiat akueriuminaatsippaat, tamatumalu kingunerisaanik arfanniarnermut tapersersuipput — isiginnittaaseq "arfanniarnermut akerliusunut akerliusut“ taaneqartartoq.

Isiginnittaatsip aappaa tassaavoq Watsonip Japanimi arfannianut iliuuserisai sisamat unnerluutiginnissutaasut (saassussineq, inuussutissarsiummik akornusersuineq, umiarsuarmut iserneq pigisanillu aserorterineq aaqq.). Taakku eqqarsaatigalugit pisoq arfanniarnermut attuumassuteqarunnaarluni nakuusernermut tunngalerpoq. Tamanna apeqqummik uanga pilersitsivoq: Watsoni ataqqinartumik siunertaqarneraruni taava iliusai qanoq ikkaluartulluunniit naapertuuppat?

Minori Takahashi naapertorlugu Japanimi amerlanerit taakku marluk assigiinngitsunik isumaqarfigaat.

Taamaassorinninneq qularnartoq

Paul Watson sapaatip akunnerani kingullermi eqqartuussinermi isummani tusarliuteqqippaa. Tunniunneqarnissani anguniarlugu Japanip danskit anorisaatinik isumaqatigiissutaat unitsinniarlugu sioorasaarnerarpai. FN-ip 2025-mi Nicemi ataatsimeersuarnissaanik Japani peqataaniarani Frankrigimi naalakkersuisut tatigaa taanna isumaqarpoq. Ataatsimeersuarnermi tassani nunarsuup imartasa illersorneqarnissaat sammineqassammat. Taamaassorinninnera The Captain Paul Watson Foundationip nittartagaani aamma atuarneqarsinnaavoq.

Minori Takahashi naapertorlugu Japanimiunit taamatut iliorneqarnerat qularnarpoq.

- Naluara Japani tatisinninniarsimanersoq imaluunniit sioorasaarisimanersoq. Kisianni taamaaliortoqarsimassapput ilimagineqarsinnaagaluarpoq atorfilinnit arlaatigut iliortoqarsimassagaluartoq. Taamatut iliuuseqarneq qanoq sunniuteqarluartigissava? Japani tatisiniarsinnaasoq sioorasaarisinnaasorlu takorlooruminaappoq, ilisimatusartoq oqarpoq.

Japanimi inatsisartunut septembarimi qinersisoqarnerata kingorna naalakkersuisut nutaat novembarip aqqarnani ivertinneqarnissaata tungaanut isumaqatigiinniartoqartoq nassuiaavoq. Taamaattumik piffissami tassani atorfilittat arlaatigut tatisiniarsinnaanerat apeqquserneqarsinnaalluni.

Qallunaat kunngikkormiuisa Japanimiullu kejseriisa akornanni ukiorpassuarni aallartitat aqqutigalugit attaveqatigiilluartoqartoq Minori Takahaship ilanngullugu oqaatigaa. Danmarkip Japanillu ataqatigiinnerat ukiunik 150-inngortorsiorneqarnera 2017-imi malunnartinneqarpoq.

Nunat taakkua marluk akornanni politikkikkut akerleriittoqanngimmat Japanip Watsonimut suliaq atorluarlugu tatisinissaa, soorlu niuernermik unitsitsinissamik sioorasaarilluni, piviusorsiortuunersoq apeqquserneqarsinnaavoq. Aamma Japanip FN-imi aappaagu ataatsimeersuarnissamut peqataaniarani sioorasaarinera eqqarsaatigalugu.

Arfernik illersuiniaq Frankrigimi innuttaassuseqalersinnaanersoq Frankrigimi maanna misissorneqarpoq, nunanut allanut ministeri (maanna ministeriugallartoq aaqq.) Jean-Noël Barrot nutaarsiassaqartitsivik Franceinfo naapertorlugu oktobarimi oqarpoq.

Allaaserisap matuma allanneqarnerani inatsisinik atortitsinermut ministereqarfik Paul Watsonip Japanimi oqartussanut tunniunnissaanut tunngavissaqarnersoq suli nalunaaruteqanngilaq.