KL

DK

Scholz kingumut naqissusiivoq: Killeqarfiit innimigisassaapput

- Suulluunniit nunap sanilini nuna anginerusoq ersigisussaanngilaa, Tysklandip forbundskansleria, Trump-ip oqaaseqarnerata kingorna erseqqissaavoq.

Scholz takuneqarsinnaavoq Berlinimi SPD-p ataatsimeersuarnerani.
ritzau/AFP
Saqqummersinneqarpoq

Killeqarfiit "innimigisassaapput".

Arfininngornermi Tyskandimi ministeriunerup, Olaf Scholzip, partiimi socialdemokratiskiusup SPD-p ataatsimeersuarnerani oqariartuutaasa tamanna ilagaat.

Nutaarsiassaqartitsivik AFP taamak allappoq.

Oqariartuut tamanna kingumut uterpaa ullut arlallit matuma siorna, Amerikap præsidentissaata, Donald Trumpip, Panama-kanali aammalu Kalaallit Nunaat aqunneqarnissaat siunertaralugu aningaasaqarnikkut imaluunniit sakkulersornikkut pinngitsaaliinissamik piumasani malillugit pisinnaasut oqaatigereeraalu.

- Killeqarfiit innimigineqartussaanerat pillugu malittarisassaq nunanut tamanut atuuppoq, kangianiikkaanni kitaaniikkaanniluunniit, Scholz oqarpoq.

- Najoqqutassiaq taanna, nunat tamarmik malitassarivaat, nunap mikisuunera imaluunniit angisuujunera, nukilaannera nukittuneraluunniit apeqqutaatinnagu.

- Nuna sunaluunniit naqisimanninnikkut ilanngutiinnarneqarsinnaanngilaq tunuliaqutsiullugulu. Nunarsurmi nunat ataasiakkaat anginerusunut ersiortinneqartussaanngillat. Tassa nunat killertut immitsinnut taasartut naleqartitatta pingaarnersaat.

Trumpip marlunngornermi tusagassiortunik katersortitsinerani Panama-kanali aamma Kalaallit Nunaat sammineqarput, Danmarkimi Europamilu sumiiffinni arlalinni mianersornissamik kalerrisaarutit aallartippaat.

Pingasunngornermi Scholz tusagassiortunik katersortitsinissamut aggersaavoq, tassanilu oqarpoq Trumpip EU-mi siuttut akornanni "paatsuunganeq" pilersissimagaa.

SPD-p partiip ataatsimeersuarnera Tysklandimi sapaatip akunnerata naanerani matumani ingerlanneqarpoq, isumasiuinerillu naapertorlugit SPD ajugaasinnaanissaminut ilungersunartorsiorpoq, Forbundadagimut februaarip 23-ani qinersisoqarnerani.

Aamma talerperliit AfD ataatsimeersuarput sapaatip akunnerata naanerani matumani.

AfD, isumasiuinerit naapertorlugit siuariangaatsiassangatinneqarpoq, SPD-llu qinersisartunit tununneqarnera annertussangatinneqarluni. Qinersineq nalunaarutigineqarpoq, Scholzip naalakkersuisuisa ukiup naalernerani uppinnerisa kingorna.

Scholz arfininngornermi oqarpoq, Tysklandip qinersinermi "allannguinerup" tungaanut inissisimasoq. Taassuma oqaatigaa ukiut qulit tulliuttut pingaaruteqartut, neriuutigalugulu partiip katersuuffiujunnaariartornera allanngortinneqarsinnaassasoq, taamak oqarnermini qinersisartunik isumasiunerit innersuussutigivai.

panama inuiaqatigiit grønland donald trump canada samfund tyskland udland

ATORFIIT Se alle jobs

Powered by Labrador CMS