SIUMUP IMMIKKUT ITTUMIK ATAATSIMEERSUARNERA
Siulittaasussamik qinersinissaq sioqqullugu iliuusissat oqaloqatigiissutigineqarneri aamma politikkikkut anguniakkanik iluarsiinerit
Siumup Nuummi immikkut ittumik ataatsimeersuarnermini partiip politikkikkut ingerlatsinerata killiffia nutarsaanissallu suli oqallisigineqarput, taamatuttaaq oqaluuserineqarpoq qinikkat qanoq ataqatigiinnerulersinneqarsinnaanersut, qinersereernermi qimaguttarneq aamma "politikkikkut anguniakkanik sulissutigisanillu unioqqutitsisarnerit" pinaveersaartinniarlugit. Ullaap tungaani siulittaasussatut sassartut suli marluugallarput.
Ataatsimeersuarnermi unikaallartarnerit qanoq ilaatigut atorneqartarnersut una assersuutaavoq, oqaluuserineqartoq eqqoriassallugu ajornanngilaq. Siumup Inuusuttaasa Ineqi Kielsen siulittaasussatut innersuunnikuuaat, kisianni taanna suli nalunaaruteqanngilaq qinigassanngortissanerluni.
Assiliisoq: Jensine Berthelsen
Siumup immikkut ittumik ataatsimeersuarnerani ullup aappaa ingerlarsorpoq.
Siulittaasoq nassaarineqassaaq. Kisianni tamanna sioqqullugu partiip politikkia iluarsaanneqassaaq, immikkoortortaqarfiit politikkikkut anguniakkanut ilassutigerusutaat oqaluuserineqassapput, partiip aaqqissuussaanera immikkoortortaqarfinnilu aaqqissuussaanerat taakkulu attaveqaqatigiinnerat sukateriffigineqassapput, partiip naalakkersuinikkut malittarisassai qaffassarneqassapput ataatsimoornerlu nukittorsarneqassalluni.
Unillatsiartarnerit akuttupput, piffissaq aamma immikkoorluni oqaloqatigiinnernut atorneqartarpoq, ataatsimeersuarnermi pingaarutilimmik oqaluuserisassami, tassalu siulittaasup qinerneqarnissaa aammalu siulersuisut nutaat qinerneqartussaammata.
Partiimut tunniusimanissamik pissuserissaarnissamillu naatsorsuutiginninneq sakkortuumik unioqqutinneqartarpoq
Immikkoortortaqarfinni ilaasortat arlallit siunnersuuteqarput partiip anguniagaanut aammalu malittarisassaanut unioqqutitsisartut pillugit aalajangersimanerusumik sukannernerusumillu kinguneqartitsisoqartassasoq.
Immikkoortortaqarfiit arlallit taamaalillutik piumasaqarput sukaterisoqassasoq partiip imaannaanngitsumik ajornartorsiuteqarnera iluarsiivigineqaqqullugu, tassa ilaasortat ataasiakkaat qinersinermi qinigaasimasut, qinersinerup kinguninngua partiimit allamut nuuttarnerat imaluunniit aamma parteeqatitik tunullugit iliuuseqalersarnerat pissutigalugu partiip amerlanerussuteqarsinnaagaluarnera pinngitsoortarmat.
Assersuutigalugu Siumup immikkoortortaqarfiisa nunaqarfinni aqutsisunut siulittaasussamik toqqaanissaminnut periarfissaqaraluartut, amerlanerussuteqarlutik. Tamanna pisarpoq ilaasortat ataasiakkaat, qinerneqarnerminni amerlanerpaanik taaneqanngitsoorsimallutik inuttut soqutigisarsulertarnerat, taamaalillutik partiip allap siulittaasussamik toqqaanissaanut periarfissiisarlutik.
Assersuut alla tassaavoq partii qanoq periuseqartassanersoq partii amerlanerussuteqalerluni taamaalillunilu borgmesterimik toqqaasinnaalluni periarfissaqaraluarluni borgmesterinngortitsinissaminut. Kisianni qinigaanerpaasimasup pissaanermik annertuumik tunineqarsimaneratigut, aamma ajugaasoq politikkikkut misilittagaqanngikkaluarpalluunniit. Qeqertalimmi tamanna misigineqaqqammerpoq, tassanimi periarfissaq annaaneqarpoq, taamaammallu Siumut Qeqertalik piumasaqarpoq sukaterisoqassasoq. Siunnersuut siulersuisuuninngortussanut tulliuttunut suliassatut tunniunneqassasoq.
Partiip siulersuisui tunuartussanngortut siunnersuuteqaraluarput partiip kattuffianit ilaasortaajunnaarsitsisoqarsinnaalissasoq, kisianni ilaasortat siunnersuut akerleralugu taasipput, aamma partiip malittarisassaanik unioqqutitsinerit sakkortuut nalaanneqartaraluartut.
Assiliisoq: Jensine Berthelsen
Unillatsiarnerni immikkortukkaarluni oqaloqatigiinnerit, qularnanngitsumik siulittaasussamik qinersinissamut qanoq inissisimasoqassanersoq pillugu ilaqartut eqqaassanngikkaanni, aamma ataatsimoorneq, politikkikkut erinarsuutinik erinarsuataartarneq, hurraartuuttarneq, nutsugiaasamik guitarimillu ingiorneqarluni erinarsuataarnerit - Siumup ataatsimooraangami ilisarnaatai amigaataanngillat.
